Kristus Klosan Lian 2:12-36

¹²Sia moos nusu baa malu naꞌak, “Tan saa bele dadi nuneꞌe? Lia neꞌe naꞌak saa?”

¹³Mais ema seluk sia naleuk naꞌak, “Hoi! Lalika titu sia! Ema nia sia lanu todan!”

¹⁴Baa oras nia, Petrus no Kristus klosan naꞌin sanulu resin ida seluk iha nia. Oras sia naree ema kabuun malu iha nia, Petrus soruk baa oin, hotu dale makaꞌas naꞌak, “Mamaluk sia! Emi mak ema Yahudi no emi mak hein iha kota Yerusalem neꞌe, taꞌan tilun rona diꞌa-diꞌak haꞌukaan dalen neꞌe, tan haꞌu atu katak lia boot ida baa emi.

¹⁵Keta haneo ami neꞌe lanu! La bele nunia, tan oras neꞌe, foin tuku siwi. Ema la nemu tua baa seisawan nuneꞌe!

¹⁶Emi rona ema neꞌe sia dale nodi emi ida-idak lian. Tuir loos, Maromak katak kedan tiꞌan lia neꞌe nodi makoꞌan Yoel naꞌak:

¹⁷‘Kalo raiklaran kreꞌis falu fila, Haꞌu atu katuun Haꞌukaan Kmalar Lulik baa ema hotu-hotu. Emikaan oan feto no oan mane sia, Haꞌu kalo baa Haꞌukaan makoꞌan. Emikaan ema nurak sia, bele naree saa mak Haꞌu katudu baa sia. Emikaan matas sia, bele meꞌi nola saa mak Haꞌu katudu baa sia.

¹⁸Kalo raiklaran kreꞌis falu fila, Haꞌu katuun Haꞌukaan Kmalar Lulik baa Haꞌukaan atan sia hotu-hotu. Haꞌu katuun baa feto, Haꞌu moos katuun baa mane. Sia atu dale saa mak Haꞌu katak baa sia.

¹⁹Haꞌukaan Loron Kabaas sei la toꞌo dauk, Haꞌu kalo kedan tadak blaar iha laleꞌan. Tadak blaar hanesan loro matan nakukun, no fulan mean laak hanesan raa. Haꞌu moos kalo lia kasalak basuk iha raiklaran. Lia hanesan raa no haꞌi dubun fuꞌak saꞌe baa leten. Mais baa oras nia moos, ema mak nahii nusu tulun baa Haꞌu, Haꞌu nanis sori nia.’ ” Lia nia mak Maromak katak kedan hori uluk nodi makoꞌan Yoel.

²²Mamaluk Israꞌel sia! Taꞌan tilun rona diꞌa-diꞌak haꞌukaan dalen neꞌe. Yesus ema Nasaret nia, Nia mak Naꞌi Maromak boi kedan hori uluk atu solok mai sori ita. Tebes! Ami naꞌin duꞌuk haree Nia nalo lia kasalak basuk no nalo tadak blaar nodi Maromak beran. Emi moos haree, tan Nia moos nalo tadak blaar iha emikaan oin.

²³Naꞌi Maromak solok Nia nunia, mais emi hoꞌo Nia hodi hamaus hola ema aat, nebee sia nedi Nia baa ai karuus. Tuir loos, Naꞌi Maromak natene tiꞌan lia nia sia hotu-hotu, tan Nia nakotu kedan nunia hori uluk.

²⁴Tebes! Emi neꞌe hoꞌo Yesus toꞌo mate, mais Naꞌi Maromak nalo Nia moris nikar, tan Nia la nakara Yesus nafati iha maten fatin.

²⁵Naꞌi Daud nakerek kedan hori uluk lia nosi Yesus nuneꞌe: ‘Haꞌu katene Maromak no haꞌu nima-nimak. La noo saa ida moos mak bele naloti haꞌu, tan Maromak no haꞌu nima-nimak.

²⁶Tan baa nia, haꞌu neon boot. Haꞌu moos tonu-kaboot Maromak. Haꞌu kein Nia kodi neon metin,

²⁷tan baa oras haꞌu kmate, Nia la nabusik haꞌukaan kmalar nafati iha ema maten fatin. Nia la nabusik Niakaan Ema Moon maten dois iha rate laran.

²⁸Nia natudu dalan moris loos baa haꞌu. Haꞌukaan neon nanis boot lo-loos, tan Nia namutuk no haꞌu.’ Naꞌi Daud mak nakerek nela lia nia tiꞌan.

²⁹Mamaluk sia! Foo leet baa haꞌu kalore lia nia. Bei Daud dale nunia, mais ita hatene nia la dale nosi niakaan maten duꞌuk, tan nia mate, hotu ema nakoi nia tiꞌan. Niakaan rate moos sei iha itakaan leet toꞌo oras neꞌe.

³⁰Naꞌi Daud nia, Maromak makoꞌan. Baa oras nia dale nunia, nia natene naꞌak Naꞌi Maromak narai aan tiꞌan nodi nameno naꞌak, Nia atu boi Naꞌi Daud husar-binan ida atu kaer ukun.

³¹Baa oras nia, Naꞌi Daud natene kedan lia mak sei dook basuk. Nia dale nosi Ema mak Naꞌi Maromak boi kedan hori uluk. Ema nia atu mate, mais Nia moos atu moris nikar. Hodi nunia, Nia la nafati iha ema maten fatin. Niakaan maten moos la dois.

³²Rona! Ema mak Naꞌi Daud dale tiꞌan nia, neꞌe mak Yesus! Nia mate, mais Naꞌi Maromak nalo Nia moris nikar. Ami neꞌe haree duꞌuk Nia moris nikar tiꞌan.

³³Oras neꞌe Niakaan Ama Maromak foti Nia kaer beran mak aas kaliuk. Nia nabesi aan iha Naꞌi Maromak sorin kwana iha fatin mak Naꞌi Maromak nadiꞌa kedan tiꞌan bodik Nia. Niakaan Ama moos foo Kmalar Lulik baa Nia, tuir saa mak Nia nameno kedan hori uluk. Oras neꞌe Niakaan Kmalar Lulik nia moos tuun baa ami. Lia mak emi rona no haree ohin nia, neꞌe mak Naꞌi Maromak foo Niakaan Kmalar Lulik.

³⁴Tuir loos, Naꞌi Daud la saꞌe baa laleꞌan, mais nia dale nosi lia Yesus saꞌe baa laleꞌan. Lia nia nuneꞌe: ‘Naꞌi Maromak katak baa haꞌukaan Naꞌin naꞌak, “Mai tuur baa fatin hakneter iha Haꞌukaan sorin kwana neꞌe.

³⁵Haꞌu atu kalo Okaan funu sia loꞌu baa O.’ ”

³⁶Tan lia nia, ema Israꞌel hotu-hotu musti natene tebes naꞌak, Ema mak emi hedi hoꞌo baa ai karuus nia, Nia mak Maromak boi tiꞌan dadi baa itakaan Naꞌin. Maromak moos foti-nahaas Nia tiꞌan.”