1Tamakaya aliyate kava vayamogatama aliya vayatamimo-gamina fatago kavakeya humateho. Tamakaya ago havimainae kava kanotamia ikapinaga nagoke maine.
2Tamakaya nunamuna atafa hutama tokiyaage hu-linetama tamau kalo-kalola ohutama efi efi hutama tamakesa havitama musena hiho.
3Kalaisifena nayoma hu falakitenaya mono kea nagaya huhalena hua yateti nagaila navaleya kina hunatagena mainoanagino Anumaya Kotia kama yakinatesigena ani kema nagoene huhalena hisua yafena nunamuna havigeho.
4Anumayamona haisia avamete kanaleya huna aepaaene huhalena hisugeya havisaya yafe Anumayamotega ke hutama havigeho.
5Tamakaya kanale havi haviyaamima hanea vea kana hutama Yisasi kema nohavisaya veapima mainutama fatago hutama mainetama afaa omaitama Yisasi kea hamapaiho.
6Hamapaisaya kemoa mukia kanafina hagageya hamaisifa kegeya nehutama mukia veapima kenonaamima hugahena kanale kegeya hutama hamapaisae.
7Tikikusia nagaya mukia navagea tamahapaigahie. Ani kanoa nagaila nenahaiya nenafue, Anumayamo aliyatela efi efi huno kanale aliya kanogita tokaetaa aliyana nealuane.
8Tamakaya tagayama nemauna tavagea tamaha-painagetama havitama muse hisageno tamaipamoa kanale hisiafene huna hutogeno tamakaitega umaine.
9Onesimusina agaiene Tikikusiganina hunatesugeana ugae. Onesimusia efi efi huno kanale aliya alino maigeno nenahaiya nenafua, tamakai kumateti kanogino malema folote humainea yamo kea tamahapaigae.
10Alisatakusia nagaiene nofipi mainea kanoene Makia Panapasina akuamoene Yisasia nago agia Yasatusiene huya falu fala hulamatae. Ani vayamoyage Yuta vayapitila nagaienena Anumaya Kotima kava yagaisia yafena vaiyatete huya hamanepaiya nagaila aluya huya naya hageno naipamoa kanale humaineafe Makifena nagaya agoma humainoa kele nehavianagitama tamakaitema uvayi hisigetama avaletama ali kayone huteho.
12Epafalasia tamakai kumate kanogino tamakaila huno falu fala hu nelamate. Ani kanoa Yisasi Kalaisi aliya kanogino mukia kanafina tamaya hisia yafena Anumaya Kotitega mage huno havinege “Anumaya Kotina hau-mainea kavafena havilama huteya hetiya tokiyaage veane fatago huya maisae.” huno havinegeane.
13Havinegeno tamakayaene Leotisia veanene Hielapolisi veanene tamaya hisia yafena tusiya huno aliyana aligena agelama hutena tamakaitela huhalena nehue.
14Lukua tahau tayamopafi nelahaiya tota kanotiene Temasiene huana falu fala hulamatae.
15Leotisia kumate mainaya tafu-tagana-gamiene Nifaene agai nopi melitalu huya Yisasife haviya amakupi malenaya veanene hu falu fala humatogi hamapaiho.
16Tamakaya mani avoma hapalitama havitetama Leotisia maineya Yisasife haviya amakupi malenaya veate atalegeno vinageya amakaiene hapaliya havisageya amakaima amaminoa avona tamakaila tamamisagetama hapalitama haviho.
17Tamakaya Akipusina mage hutama hapaiho “Anumayamoma kaminea aliyana kava yagaika tokiyaage huka mukia alio.” hutama hapaiho.
18Mani kea nago kanoa hapaugeno kae-maleneanagi nagaya Polona nagainia nayapiti “Kanaleya hutama mainao?” huna hu falu fala hulamate kenia negaove. Nagaya nofipi mainogi tamakesa havitama namiho. Anumaya Kotia kayone hisia yamaamoa tamakaiene hanesie. Kenia male hano hie. Nagaini nagia Polonae.
