1Ea ’ne bena abina au ata, eau nuagu i hisihisili ariri omi debamiu eai, eo isi Laodikea eai hinage, eo isi headi, gamagaridi sora nige agu ao bulumagu eai ta se ita.
2Bena nuadi se biga, bena gadosisi eai nuadi se ino‐esegaidi, eo gogo saesaena eai wa, nuatu adidiri eo italobai se monau, bena Eaubada nuatuyamuyamuina abo abina se ata, iaede Keriso,
3sonoga gogona maisa‐lailaina maudoina ia arinai se toreamuiyao.
4Teina ta ea ribaei, ata tau esau riba amna aridi eai i boraimiu.
5Paana bulumagu eai ata bena ea miasuaraemiu, taiede earuagu eai eau maemiu, ea kode emi mia‐komakomani ea ita, eo emi sunuma Keriso arinai i otaesegai.
6Doha Keriso Iesu Guiau aue abi nuamiu eai, au laulau hinage ia boeana eai;
7lammiu ia arinai au tore, ia boeana eai se abi‐hetoromiu, sunuma eai au torotahitahi doha hinage se heatamiuo, arinai emi lautoi au helai.
8Au komani ata tau esau i boraimiu tanoubu ta ena sonoga eai, eo ena nuasaesae gaibu eai, doha tatao beabeadi edi laulau, doha tanoubu ta kamanina, na nige doha Keriso enana.
9Paana Eaubada ana ao maudoina i mia‐hemonau, ia wa tauna eai.
10Omi hinage au monau, ia boeana eai, ia gigibori maudoina, eo tanutanuaga, uruurudi ede.
11Ia boeana eai omi hinage peritome aue abi, peritome wa nige nima eai se ginauri, tauna bulumana emi aba‐torehesuarana ede Keriso ena peritome eai:
12emi bapatiso eai ia maemiu se puruhimiuo, arinai hinage ia maemiu au torouioo, paana Eaubada ena paipaisoa au sunumaei, arinai Iesu mate eai wa i hetoro.
13Omi emi baaea boeadi eai aue mate, eo bulumamiu wa nige se heperitome, ia maemiu i hemauriesegaimiu, emi baaea gamagamagari i nuatugabaedio.
14Laugagaeo nima eai se uri arinai se hegiruda wa, i saugabaei, i lau baaeaida wa na i laehesuara, satauro eai i poasihepatulaei.
15Arinai basileia eo gigiboridi i hetatagorigoridi, i hemasaraha‐auridi, eo i saepoidi.
16Arinai tabu tau esau i hegirumiu ena buluma au aidi, e emi nomnom eai, e huia tabudi heasisina eai, e nawalai ena huia poe, e sabati asubenadi.
17Meta tautau mo, ginauri sora nige se tubu heaheasonidi, na ginauri mamohoina wa Keriso enana.
18Tabu tau esau i boraimiu emi ainauia i girihai, iabom ena nuatu eai bena nuatu‐dobidobi gaibu e aneru tabaohuna i heatamiu, ginauri nige abina i ata arinai i hemodeuioi, ia ena nuatu buluma mo, i nuasaesae,
19na Uru wa nige i abididini; uruna iaede tauna maudoina tauheaina, popona eo wonowonogarana i ino‐esegaidi, arinai tauna wa ie tubu, ena tubu wa Eaubada i mosei.
20Ena omi tanoubu laulaudi aridi eai aue mate, Keriso maemiu, paana saha doha tanoubu eai ma‐miamiu aiudi udoi udoi au awaabiedi?
21(Tabu u abi‐ita, Tabu u ai‐ita, Tabu u abilau;
22ginauri gamagaridi ta ta hepaisoaedi na se tatagorigori.) Tatao mo edi lauheata eo edi laugagaeo ina.
23Teina ginauridi ta adi ao doha sonoga, itabom eda nuatu tabaohuna eo nuatu‐dobidobiuio, eo tauda ta healapaipai; ia‐mo nige gonoana se saguida buluma lelehina arinai.
