1Au i lok be ang ngan lomim galanga yau nen, au i ayei urata mai san yang be alonang. Inbe ayei urata mai nen ye di tooltool yo tiyepe Laodisia nga, inbe di tooltool kapala yo tikamata matak pitiao nga, ngan lapau.
2Au i ayei urata nen a be nen ngan apamede ang le imot ye lomim medana yo kataru pang Kirisi i, inbe alonang le lomim mai san pang di diemim kapala a kaye di kagauagaua dook mata. Inbe ayei urata nen a be nen ngan ang ngan lomim galanga dook ye so dook mata tani yo muku ngan iken sollono, bong nookoot nga Maro ipaposi le se iken mallangana i. Ngan so dook mata tani, in la Kirisi i.
3Inbe Kirisi ya taleu in la ke be ipagalangidi ye lo galanga ke Maro yo iken sollono nga. Ngan lo galanga ki, in dook mata kaiye le dawa ben balingi mai.
4Ngan awete pang nen nga, ngan be nen a tool sa ke be ikaua lungunu yang ye betanga ki yo iwete ngan kon paweserai ang ye, ngan tiap.
5Nookoot nga ayang tayepe tiap, bong ye Maro Amunu Silene yo igaua idi le lodo atu i, in dawa ben ayang tayepe gaongo. Ngan au i lok ponana ye yo alongo betanga be ang ngan kagauagaua dook mata, inbe kakodo le kamede ye lomim medana yo kataru pang Kirisi in nga.
6Ngan dawa ben ang ngan katoo betanga ke Kirisi a iyei Tool Mai pang nga, le nookoot nga kaye kagauagaua, inbe katoo dada dook mata yo lono be di tooltool ki titoo ngan le iken so.
7Inbe katara lomim medana le imede pang bingi dook mata yo tipatomonai ang ye i, inbe kanakana ngan kawete lo ponana kiang pang Maro. Nen le kakodo le kamede ye Kirisi dawa ben kai yo ramini idu lopo le iparama i, inbe dawa ben rumu yo tire ye saua medana le imede mata i.
8Inbe kin kakawai yang dook leu, ole nen ngan tool sa ikaua lungunu yang ye betanga doko a be nen ngan la katoo betanga yo ki nga. Ngan betanga tina ngan ole kalongo ben betanga moolmool, bong ngan betanga sokorai yo tikap ye di sasa kidi nga. Inbe betanga ke di tooltool yo nen nga, ngan ipa ye Kirisi tiap, bong ipa ye di tooltool ke tana, inbe ye di so sadi yo matadi kala tana mai i nga.
9Ngan awete pang nen, yesoo dada le gurana inbe lo galanga ipa ye so le imot yo ke Maro nga, ngan iken ye Kirisi, inbe ya in isi iyei tool moolmool dawa ben idi nga.
10Nen le ya in iyei kuto mai pang so matana matana tina yo gurana kidi mai mata inbe edi maimai nga. Ngan ang ngan ke Kirisi, inbe kaye kagaua. Ngan nen le so dook mata ke Maro tina yo iken ye nga, ngan ikap pang le imot lapau.
11Inbe ye gurana ke Kirisi nga, ngan ang ngan katoo dada moolmool yo ke koranga tiniidi i. Ngan dada tani ke koranga tiniidi in ben di tooltool tiyeii ye baedi a tikoro di tooltool tinidi ke diki nga tiap, bong Kirisi ya taunu la iyeii i, nen le igiri dada dook tiap ke noonoo yo iken lomim ngan.
12Ang ngan ye kene yo tirriu ang ye ran ye in nga, ngan dawa ben tikelmai ang kaye Kirisi. Inbe ang ngan katara lomim medana ye gurana ke Maro yo ipamaditi Kirisi ye ni ke matenge i, ngan le dawa ben kaye Kirisi kamadit ye ni ke matenge oo.
13Muku nga, ang ngan ben di tooltool yo tikoro tinidi tiap nga, inbe kapas le katoo dada dook tiap yo iken lomim nga leu. Nen le ye dada dook tiap ke noonoo tina yo kayei nga, ngan ang ngan kayepe le dawa ben di tooltool matedi ye Maro matana. Bong Maro ipamaditang kaye Kirisi le kaye kakaua yepongo yo paunu i, inbe igiri noonoo kiang le imot.
14Le moolmool, dada dook tiap yo tayei nga, ngan betanga ki iken, inbe iyei ben koi kiidi le ipaposidi ye noonoo kiidi, a be nen ngan Maro iyemenai idi ye. Bong Maro iwulngan betanga tina, inbe ipatoto lo kai palasingi kaini.
15Ngan ye urata tani yo Kirisi iyeii ye kai palasingi kaini i, in le Maro irautoo gurana ke di so matana matana yo gurana kidi mai mata nga, inbe yo edi maimai nga lapau. Inbe ikatte dawa kidi ke patokongo a ipammoo di ye di tooltool matadi.
16Ngan la kin kalongo pang tool sa yo iwete be ole Maro iyemenai ang ye so yo kakan too kayin, ngan be. Inbe kumata le di tooltool sa tiwete pang be katoo dada kidi ye kamatanga lal maimai ke sungunu, too lal ke taudu paunu, too lal ke maryoongoo nga, ngan kalongo betanga kidi be.
17Ngan so tina ngan ben tarkilanga ke Kirisi yo be pang dama ni ngan pombe i. Bong Kirisi pombe oo, le tarkilanga tina ngan la takamata ye Kirisi koot nga.
18Nen le kin katoo betanga ke di tooltool yo koodi mede be katoo di ye dada kidi ke sungunu, ngan be. Di ngan tiwete be kakap masngana pang ang tapmim, inbe kasung pang di bangabangana. Di tooltool yo nen nga, ngan tiwete be betanga kidi ngan ipa ye mianga, bong di ngan lodi kaua urata ye so ke tana i leu, le di tapdi tiyitmak edi, inbe tiwetewete betanga yo taukan punu nga.
19Le di tooltool yo nen nga, ngan tiyege Kirisi le tiye tigaua mulu tiap. Bong idi nga lod galanga nen, Kirisi in dawa ben idi kutodo, inbe idi nga ben ya baene le kene inbe soonoo kapala yo iken ye tinini nga. Ngan kumata be idi nga taye tagaua nga, ngan ole ilonidi, inbe ipamedidi dawa ben Maro lono be iyei nga.
20Ang ngan ben kaye Kirisi kammata oo. Ngan la dada dook tiap ke tana nga taukan gurana yo be iparamang mulu nga. E nga yelei a kayepe ben di tooltool ke tana i nga? Inbe nga yelei a katoo ger le dada ke di tooltool ke tana i nga?
21Di tooltool yo titoo ger tina, ngan tiwete nen, “Kin kouo so in be! Kin kon toko so in be! Kin kutoko so in be!”
22Bong ger yo nen nga, ngan iwete ye so yo takap a tayei urata ye kasin, ngan ole mooloo tiap be imot nga. Yesoo, ger kidi tina, ngan ipa ye di tooltool ke tana i, inbe titoo di tapdi lodi a tipatomonai di tooltool ye be titoo.
23Ngan moolmool, di tooltool kapala ole lodi tar nen, ger yo nen nga, ngan ipa ye di tooltool yo lodi galanga mata nga, yesoo tikapye be tisung pang Maro ye dada kidi tapdi, le di tapdi tirautoo di, inbe tikap masngana pang di tapdi tinidi, a be nen ngan tiyeii a lon ponana ye di. Bong ger tina ngan o ke be ilonidi a irautoo lodo yo iyolidi be la tayei noonoo in tiap.
