Text copied!
CopyCompare
PIŊKOP GEN - Kap - Kap 89

Kap 89:1-29

Help us?
Click on verse(s) to share them!
1Etan uŋun Esra amɨn kabɨkon nani kɨnda dakon kap. Kap on do Maskil yaŋ yoŋ. Yawe, gak da amɨn do but dasi galak taŋ yomɨsal, uŋun do nak toktogɨsi kap yokeŋ. Gak gengo aŋteban aŋek nin tagɨsi paŋpulugosol uŋun dakon geni babɨkon da babɨkon yaŋ teŋteŋokeŋ.
2Gak toktogɨsi nin do but dasi galak taŋ nimɨsal uŋun dakon geni yaŋ teŋteŋaŋ wɨgɨkeŋ. Gak gengo aŋteban aŋek nin tagɨsi paŋpulugosol. Uŋun aŋpak kundu da tebai tosok uŋudeŋ toktogɨsi tokdɨsak.
3Gak da yaŋ yagɨl, “Naga dakon amɨno manjɨŋek uŋun gat saŋbek saŋbek kɨlɨ agɨm. Oman monjɨno Dewit uŋun do yaŋ teban tok kɨlɨ agɨm.
4Aŋek yaŋ iyɨgɨm, ‘Israel dakon kɨla amɨn madep noman taŋ noman taŋ ani uŋun gak da kabɨkon dagɨn noman tokdaŋ. Babɨkon da babɨkon gak da kabɨkon nani kɨnda da kɨla amɨn madep yɨyɨt tamokon yɨtdɨsak.’ ”
5Yawe, Kwen Kokup aŋelo gak da yo tagɨsi agɨl uŋun do kap yaŋek mango awɨkwaŋ. Gak da gengo guramɨkdal uŋun do nandaŋek kap yoŋ.
6Nido Kwen Kokupmon Yawe gak yombem kɨnda mɨni. Aŋelo kɨnda gak yombem mɨni.
7Aŋelo dakon kɨla amɨn da muwukgaŋon Piŋkop do si pasolgoŋ. Uŋun aŋelo kabɨ aŋgwasɨŋek akgaŋ uŋun masɨ masɨmɨ, mani Piŋkop da uŋun kabɨ si yapmaŋek wagɨl masɨ masɨmɨsi.
8Piŋkop Tapmɨm Ami, gagon tapmɨm madep tosok uŋuden amɨn kɨnda mɨni. Toktogɨsi gak kulabɨk dɨma aŋek gengo guramɨk kɨmokdol.
9Gak da tap ɨdap tapmɨmɨ toŋ uŋun kɨla asal. Tap ɨdap si pɨdosok bɨsapmon gak da abɨŋ yɨpmaŋaki wayɨŋ dɨma asak.
10Gak da Isip dakon tapmɨm madepni tuwɨlek obɨsi aŋupbal agɨl. Aŋek tapmɨm madepgokon da uwalgo pabɨŋ yopgul.
11Kundu gat mɨktɨm gat uŋun gak dakon gɨn. Gak da mɨktɨm gat yo morap uŋudon toŋ gat wasagɨl.
12Gak da not tetgɨn dakon mɨktɨm wasagɨl, ae saut tetgɨn dakon mɨktɨm kɨsi wasagɨl. Ɨleŋ Tabor gat ae Ɨleŋ Emon gat gak do kɨsɨk kɨsɨk aŋek kap yaŋ gamamal.
13Yawe, gak tapmɨmgo madepsi. Tapmɨmgo pɨdaŋbisi.
14Gak kɨla amɨn madep egek aŋpak kɨlegɨkon da amɨn kɨlani aŋek gen kokwin pi kɨlegɨsi asal. Gak mɨŋat amɨn do but dasi galak taŋ yomɨŋek gengo aŋteban aŋek tagɨsi paŋpulugosol.
15Amɨn gak gawak gamɨŋek kap yaŋ gamaŋ uŋun kɨsɨk kɨsɨk tagɨ ani. Yawe, amɨn morap gak da ɨŋamon teŋteŋɨgokon akwaŋ uŋun kɨsɨk kɨsɨk tagɨ ani.
16Uŋun amɨn aŋpakgo kɨlegɨ do gɨldat kɨnda kaloŋ uŋun do nandaŋek kɨsɨk kɨsɨk aŋek mango aŋkɨsaŋ.
17Gak kaloŋgɨn teban toknin, ae gak do kɨsɨk kɨsɨk madepsi nandamaŋ. Nin do nandaŋ yawok nimɨŋek paŋpulugaŋaki emaron teban tomaŋ.
18Asisi, Yawe uŋun pasɨknin egɨ nimɨsak. Gak Israel amɨn nin dakon Piŋkop Telagɨsi nin da kɨla amɨn madepnin nimgul.
19Kalɨpsigwan oman amɨn kabɨgo tagɨsi do dɨpmɨn yolɨgɨl, aŋek yaŋ yoyɨgɨl, “Nak da emat amɨn tagɨsi kɨnda kɨlɨ manjɨgɨm. Nak da mɨŋat amɨnyo da binapmon naŋ kɨla amɨn madep egɨpjak do abɨdagɨm. Aŋek kɨla amɨn madep dakon pelɨt kɨnda busuŋɨkon yɨpmaŋ ɨmgum.
20Nak da oman amɨno Dewit kɨlɨ manjɨgɨm, aŋek yɨpbo ji dakon kɨla amɨn madep dagagɨt.
21Nak tapmɨmno yɨpbo uŋun gat toktogɨsi egɨpdamal. Nak dakon tapmɨm da aban teban tokdɨsak.
22Uwalni da emaron arɨpmɨ dɨma abɨŋ yɨpni. Ae amɨn yokwi da arɨpmɨ dɨma abɨŋ yɨpni.
23Nak da uwalni bamaŋ yomdɨsat, aŋek amɨn nandaba yokwi taŋ ɨmni amɨn dapbo kɨmotdaŋ.
24Nak da but dasi galak taŋ ɨmɨŋ kɨmagek uŋun gat toktogɨsi egɨpdɨsat. Uwal gat emat wamni bɨsapmon nak da aŋpulugaŋapbo pabɨŋ yopdɨsak.
25Nak da mɨktɨmni abo tap ɨdap Mediterenian uŋudon da wasaŋek kɨŋ pakbi madep Yupretis da arɨpmon kɨkdɨsak.
26Aŋek Dewit da yaŋ nayɨkdɨsak, ‘Gak Datno ae Piŋkopno. Gak da tɨp tebano egek toktogɨsi aŋpulugosol.’
27Nak da manjɨko monjɨno mibɨltogɨ dagosak, ae kɨla amɨn madep mibɨltogɨ dagaŋek mɨktɨmon kɨla amɨn madep morap yapmaŋ mudosak.
28Nak toktogɨsi but dasi galak taŋ ɨmɨŋ kɨmotdɨsat. Aŋek uŋun gat saŋbek saŋbek aŋapdo saŋbek saŋbek uŋun toktok teban taŋ wɨgɨkdɨsak.
29Toktogɨsi uŋun da kabɨkon kɨnda da kɨla amɨn madep egɨ egɨ akdɨsak. Kundu da toktogɨsi tosok uŋun da tɨlak, uŋun da kabɨkon kɨla amɨn madep kɨnda da toktogɨsi Israel amɨn kɨla akdɨsak.

Read Kap 89Kap 89
Compare Kap 89:1-29Kap 89:1-29