Kap 89:1-17

¹Etan uŋun Esra amɨn kabɨkon nani kɨnda dakon kap. Kap on do Maskil yaŋ yoŋ. Yawe, gak da amɨn do but dasi galak taŋ yomɨsal, uŋun do nak toktogɨsi kap yokeŋ. Gak gengo aŋteban aŋek nin tagɨsi paŋpulugosol uŋun dakon geni babɨkon da babɨkon yaŋ teŋteŋokeŋ.

²Gak toktogɨsi nin do but dasi galak taŋ nimɨsal uŋun dakon geni yaŋ teŋteŋaŋ wɨgɨkeŋ. Gak gengo aŋteban aŋek nin tagɨsi paŋpulugosol. Uŋun aŋpak kundu da tebai tosok uŋudeŋ toktogɨsi tokdɨsak.

³Gak da yaŋ yagɨl, “Naga dakon amɨno manjɨŋek uŋun gat saŋbek saŋbek kɨlɨ agɨm. Oman monjɨno Dewit uŋun do yaŋ teban tok kɨlɨ agɨm.

⁴Aŋek yaŋ iyɨgɨm, ‘Israel dakon kɨla amɨn madep noman taŋ noman taŋ ani uŋun gak da kabɨkon dagɨn noman tokdaŋ. Babɨkon da babɨkon gak da kabɨkon nani kɨnda da kɨla amɨn madep yɨyɨt tamokon yɨtdɨsak.’ ”

⁵Yawe, Kwen Kokup aŋelo gak da yo tagɨsi agɨl uŋun do kap yaŋek mango awɨkwaŋ. Gak da gengo guramɨkdal uŋun do nandaŋek kap yoŋ.

⁶Nido Kwen Kokupmon Yawe gak yombem kɨnda mɨni. Aŋelo kɨnda gak yombem mɨni.

⁷Aŋelo dakon kɨla amɨn da muwukgaŋon Piŋkop do si pasolgoŋ. Uŋun aŋelo kabɨ aŋgwasɨŋek akgaŋ uŋun masɨ masɨmɨ, mani Piŋkop da uŋun kabɨ si yapmaŋek wagɨl masɨ masɨmɨsi.

⁸Piŋkop Tapmɨm Ami, gagon tapmɨm madep tosok uŋuden amɨn kɨnda mɨni. Toktogɨsi gak kulabɨk dɨma aŋek gengo guramɨk kɨmokdol.

⁹Gak da tap ɨdap tapmɨmɨ toŋ uŋun kɨla asal. Tap ɨdap si pɨdosok bɨsapmon gak da abɨŋ yɨpmaŋaki wayɨŋ dɨma asak.

¹⁰Gak da Isip dakon tapmɨm madepni tuwɨlek obɨsi aŋupbal agɨl. Aŋek tapmɨm madepgokon da uwalgo pabɨŋ yopgul.

¹¹Kundu gat mɨktɨm gat uŋun gak dakon gɨn. Gak da mɨktɨm gat yo morap uŋudon toŋ gat wasagɨl.

¹²Gak da not tetgɨn dakon mɨktɨm wasagɨl, ae saut tetgɨn dakon mɨktɨm kɨsi wasagɨl. Ɨleŋ Tabor gat ae Ɨleŋ Emon gat gak do kɨsɨk kɨsɨk aŋek kap yaŋ gamamal.

¹³Yawe, gak tapmɨmgo madepsi. Tapmɨmgo pɨdaŋbisi.

¹⁴Gak kɨla amɨn madep egek aŋpak kɨlegɨkon da amɨn kɨlani aŋek gen kokwin pi kɨlegɨsi asal. Gak mɨŋat amɨn do but dasi galak taŋ yomɨŋek gengo aŋteban aŋek tagɨsi paŋpulugosol.

¹⁵Amɨn gak gawak gamɨŋek kap yaŋ gamaŋ uŋun kɨsɨk kɨsɨk tagɨ ani. Yawe, amɨn morap gak da ɨŋamon teŋteŋɨgokon akwaŋ uŋun kɨsɨk kɨsɨk tagɨ ani.

¹⁶Uŋun amɨn aŋpakgo kɨlegɨ do gɨldat kɨnda kaloŋ uŋun do nandaŋek kɨsɨk kɨsɨk aŋek mango aŋkɨsaŋ.

¹⁷Gak kaloŋgɨn teban toknin, ae gak do kɨsɨk kɨsɨk madepsi nandamaŋ. Nin do nandaŋ yawok nimɨŋek paŋpulugaŋaki emaron teban tomaŋ.