Kap 78:26-66

²⁶Aŋek gɨldat wɨsak tet da mɨrɨm yɨpban kɨgɨt. Ae tapmɨm madepnikon da saut tet da mɨrɨm yɨpban kɨgɨt.

²⁷Aŋek mɨnam morapmɨsi, kɨmbabaŋ ae tap nɨman da tɨlak, morapmɨsi yopban bɨkbɨknikon mawit.

²⁸Piŋkop da mɨnam morapmɨ yopban maŋek yut kabeŋni paŋgwasɨŋek tawit.

²⁹Maŋakwa naŋek arɨpmɨsi tugawit. Yo uŋun do galak tawit uŋun Piŋkop da yomgut.

³⁰Mani jap si galak tawit uŋun sigɨn naŋ egakwa

³¹Piŋkop da butjap nandaŋek Israel amɨn dakon monjɨ tebaisi ae tagɨsi uŋun dapban kɨmakgwit.

³²Piŋkop da wasok tapmɨmɨ toŋ yaŋ agɨt, mani mɨŋat amɨnyo da yokwi sigɨn aŋek dɨma nandaŋ gadaŋ ɨmgwit.

³³Do mɨrɨm da gen kagakon noman taŋek tepmɨsi pasɨlgaŋ uŋun da tɨlak tepmɨsi paŋpasɨl agɨt. Uŋun paŋupbal aban pasol pasol madepsi aŋek kɨmakgwit.

³⁴Piŋkop da dɨ dapban kɨmakgwit bɨsapmon dɨwarɨ but tobɨl aŋek tobɨl abɨŋ yolgwit.

³⁵Aeni nandawit, Piŋkop uŋun tɨp damanin. Piŋkop Wukwisi uŋun yokwikon baŋ tɨmɨt tɨmɨt amɨnin.

³⁶Mani uŋun si aŋgalak aŋek top yawit.

³⁷Uŋun but dasi dɨma yolgwit. Uŋun gat saŋbek saŋbek awit uŋun kɨrɨŋɨkgwit.

³⁸Mani bupmɨ nandaŋ yomɨŋek dɨwarɨni wɨrɨrɨk yomɨŋek dɨma paŋupbal agɨt. Bɨsap morapmɨ butjapni yɨpmaŋek dɨma japtaŋ yomgut.

³⁹Uŋun do aeni nandagɨt, uŋun mɨktɨm amɨn gɨn, uŋun mɨrɨm da yaŋ kɨŋ mudoŋ, aeni dɨma abaŋ.

⁴⁰Bɨsap morapmɨ mɨktɨm kɨbɨrɨ tɨmon kwen wɨgɨk aŋakwa bupmɨsi nandagɨt.

⁴¹Israel amɨn dakon Piŋkop Telagɨsi bɨsap morapmɨ aŋkewalakwa nandaban yokwi tok aŋyomgut.

⁴²Tapmɨm madepni do ɨŋtawit, ae uwal da kɨsiron baŋ tɨmɨkgɨt uŋun do dɨma nandawit.

⁴³Uŋun tɨlak tapmɨmɨ toŋ Isip mɨktɨmon Soan mɨktɨm tɨmon agɨt uŋun do dɨma nandawit.

⁴⁴Pakbi aŋtobɨlban yawi dagaŋba arɨpmɨ dɨma noknogɨ agɨt.

⁴⁵Ae bɨgal morapmɨ yabekban ɨnjɨŋ yomgwit. Ae meŋgak morapmɨ yabekban yo morapni paŋupbal awit.

⁴⁶Ae pɨlak pɨlak yabekban kɨŋ pigagani yo kwawit uŋun naŋ mudawit.

⁴⁷Ae ais yɨpban maŋek wain napni ae pik kɨndapni paŋupbal awit.

⁴⁸Ae ais yopban maŋek bulmakauni dapba kɨmakgwit.

⁴⁹Butjap madepsi nandaŋ yomɨŋek yo yokwisi aŋ yomgut. Aŋek aŋelo kabɨ kɨnda yabekban kɨŋ paŋupbal aŋakwa jɨgɨ madepsi pawit.

⁵⁰Butjap madepsi nandaŋek yum dɨma pɨndakgɨt. Sot madepsi yoban kɨmakgwit.

⁵¹Isip amɨn morap kɨsi dakon monjɨ mibɨltogɨ dapban kɨmakgwit.

⁵²Mani uŋun sipsip kɨla amɨn yombem da iyɨ mibɨltok kɨŋek mɨŋat amɨn kabɨni kɨla agɨt. Mɨktɨm kɨbɨrɨ tɨmon kosit yolɨgɨt.

⁵³Tɨmɨk paŋgwan jɨgɨni mɨni egɨpgwit, do dɨma pasalgwit. Mani tap ɨdap da uwalni wɨtjɨgɨt.

⁵⁴Tɨmɨk paŋpaŋ telagɨ mɨktɨmnikon paŋapgut. Uŋun mɨktɨm ɨleŋɨ obani toŋ iyɨ da tapmɨmon abɨdagɨt.

⁵⁵Mɨŋat amɨni apgwit bɨsapmon amɨn ŋwakŋwarɨ yolban kɨwit. Kɨŋakwa mɨktɨm uŋun Israel amɨn kabɨ do kokwinɨk yomgut. Aŋek yopban yutnikon yɨkgwit.

⁵⁶Mani Israel amɨn da Piŋkop Wukwisi aŋkewalek kwen wɨgɨk aŋ ɨmɨŋek gen tebani dɨma guramɨkgwit.

⁵⁷Kalɨp babɨkni da awit, uŋudeŋ gɨn, kwen wɨgɨk aŋek Piŋkop manji ɨmgwit. Uŋun obip gɨreŋɨ dɨkdɨk suŋ yamaŋdak uŋun yombem.

⁵⁸Kokup kɨdat dakon alta wasaŋakwa uŋun do aŋek Piŋkop da butjap madep nandagɨt. Piŋkop yɨpmaŋek kokup kɨdat gawak yomɨŋakwa nandaba yokwi tok aŋ yomgut.

⁵⁹Piŋkop da aŋpakni pɨndagek butjap nandaŋ yomgut, do Israel amɨn do manji wagɨlsi yomgut.

⁶⁰Aŋek ɨmal yutni telagɨ Silo kokup papmon tagɨt uŋun yɨpmaŋ kɨgɨt. Kalɨp uŋun yutnon egɨpgut bɨsapmon mɨŋat amɨnyo da binapmon egɨpgut.

⁶¹Mani yum pɨndagakwan Saŋbek Saŋbek Kɨnam uwal da abɨdawit. Uŋun tamo tɨmon tapmɨmni gat ae tɨlɨmni uŋudon tagɨt.

⁶²Mɨŋat amɨn kabɨni do butjap nandaŋek yum pɨndagakwan uwal da emat agak sɨba baŋ dapba kɨmakgwit.

⁶³Monjɨ bulagɨ emat madepmon kɨmagakwa mɨŋatjok wɨli mɨni, do amɨn dɨma pawit.

⁶⁴Uwal da mukwa sogok amɨn dapba kɨmagakwa mɨŋatni da bupmɨ kunamyo ani dakon bɨkbɨk dɨma taŋ yomgut.

⁶⁵Amɨn da dɨpmɨnon da pɨdoŋ uŋudeŋ Amɨn Tagɨ pɨdagɨt. Ae amɨn tebai wain morapmɨ naŋek pokgoŋ da don pɨdaŋek yaŋ tɨdoŋ uŋun da tɨlak Yawe pɨdagɨt.

⁶⁶Aŋek uwal gat emat aŋek yolban kɨŋ mudawit. Pabɨŋ yopmaŋakwan mayaktok toktok teban pawit.