Kap 27:4-10

⁴Yawe do yo kaloŋɨ kɨnda do bɨsit asat. Uŋun da nandaŋ naban mɨktɨmon egɨpbeŋ bɨsapmon gɨldarɨ gɨldarɨ iyɨ da yutnon egɨpbeŋ do nandɨsat. Aŋek Yawe uŋun wagɨl tagɨsisi do dabɨlno uŋudongɨn yɨpmaŋek kɨsɨk kɨsɨk aŋek egɨpbeŋ. Aŋek Telagɨ Yut Madepnikon Yawe dogɨn nandaŋek egɨpbeŋ.

⁵Nido yo yokwi da nagon noman toni bɨsapmon uŋun da iyɨ da yutnon aŋkɨsɨbɨŋ nepban egɨpbeŋ. Yoma sopmaŋek tagɨsi aŋkɨsɨbɨŋ nepjak. Tɨp madep kɨnda da kwenon nepban tagɨsi egɨpbeŋ.

⁶Yaŋ aban uwalno nak aŋgwasaŋ uŋun pabɨŋ yopbeŋ. Nak kɨsɨk kɨsɨk aŋek yaŋ tɨdaŋek iyɨ da telagɨ yutnikon paret aŋ ɨbeŋ. Aŋek kap yaŋek mani aŋkɨsikeŋ.

⁷Yawe, gak do bɨsit abo bupmɨkon da bɨsitno nandaŋek aŋpulugoki.

⁸Gagon opbeŋ do nayɨsal, do Yawe nak kɨlɨ uŋun obɨsat.

⁹Dɨma gandakeŋ yaŋ do dɨma pasɨlgi. Nak oman amɨngo, do butjap nandaŋek dɨma akwayɨkgi. Piŋkop, gak paŋpulugokno. Gak da nak yokwikon naŋ abɨdosol. Dɨma nepmaŋ dekgi.

¹⁰Meŋ datyo da manji namjil kaŋ, Yawe da kɨlano sigɨn akdɨsak.