Kap 120:1-7

¹Piŋkop gawak ɨmɨm tamokon kɨgɨk dakon kap. Jɨgɨ noman taŋ namgwit bɨsapmon Yawe do yaŋ tɨdoko bɨsitno nandaŋ namgut.

²Bɨsit yaŋ agɨm, “Yawe, top amɨn da nak aŋkewalni yaŋ do nak pulugaŋ nepbi.”

³Top amɨn ji, Piŋkop da ji do yo ni baŋ aŋ damjak?

⁴Uŋun da emat amɨn dakon gobɨŋ baŋ yamaŋ damdɨsak. Aŋek kɨndapni tedepmɨ jikon tagaldɨsak.

⁵Nak ji da binapmon yokwisi egɨsat. Amɨn da Mesek mɨktɨmon bo Kade amɨn da binapmon yokwisi ekwaŋ uŋun da tɨlak jikon yokwisi egɨsat.

⁶Nak mɨŋat amɨnyo yaworɨ egɨp egɨp do ɨkwayɨt aŋ amɨn gat kɨsi bɨsap dubagɨsi ekwamaŋ, do kuragɨsi nandɨsat.

⁷Nak da tagɨsi yɨtni do yosot bɨsapmon uŋun emat gɨn ak do nandaŋ.