Kap 119:39-157

³⁹Nawa gengo uŋun tagɨsi. Aŋpulugaŋbɨ mayaktok dɨma pakeŋ. Mayagɨ pak do si pasoldot.

⁴⁰Gengo guramɨt do galagɨsi nandɨsat. Aŋpakgo kɨlegɨsi, do egɨp egɨpno aŋkutnoki.

⁴¹Yawe, bɨsapmɨ bɨsapmɨ nak do but dasi galak taŋ nabi, aŋek nak yokwikon naŋ abɨdoki dosi nandɨsat. Gak yaŋ ak do kɨlɨ yaŋ teban tagɨl.

⁴²Nawa gengo do nandaŋ dagosot. Do aŋpulugaŋaki nabɨpmaŋgaŋ amɨn do gen kobogɨ arɨpmɨ tagɨ paŋtobɨl yobeŋ.

⁴³Nawa gengo da nak tagɨ aŋpulugosak yaŋ nandaŋ teban taŋek jomjom asat. Do aŋteban aŋaki bɨsapmɨ bɨsapmɨ gengo bamɨ yaŋ teŋteŋokeŋ.

⁴⁴Bɨsap dagok dagogɨ mɨni nawa gengo guramɨk kɨmokgeŋ.

⁴⁵Gengo guramɨt do pini asat, do yo yokwi kɨnda da kosit dɨma sopmaŋ namjak.

⁴⁶Nak da kɨla amɨn madep gengo do yoyɨkeŋ. Uŋun da mayagɨ dɨma namni.

⁴⁷Gen tebango do but galaksi nandɨsat. Gen teban morapgo uŋun do but dasi galak tosot.

⁴⁸Gen tebango uŋun tagɨsi yaŋ nandaŋek, uŋun do but dasi galak taŋ kɨmokdot. Gengo uŋun do nandaŋ egɨpbeŋ.

⁴⁹Gak oman amɨngo nak do kalɨp yaŋ teban tok agɨl uŋun do nandaki. Uŋun da nak aŋtagap aban tagɨsi egɨpbeŋ yaŋsi nandaŋ teban taŋek jomjom asat.

⁵⁰Yaŋ teban tokgo da egɨp egɨp namɨsak. Jɨgɨ pasat bɨsapmon uŋun da butno aŋteban asak.

⁵¹Iyɨ do nandaba wɨkwaŋ amɨn da yaŋsul yokwisi aŋ namaŋ. Mani nawa gengo do manji dɨma yomɨsat.

⁵²Yawe, gak dakon nawa gen kalɨpmɨsi uŋun do nandaŋ egɨsat. Uŋun da butno aŋteban asak.

⁵³Amɨn yokwi da nawa gengo manji yomɨŋakwa japmɨsi nandaŋ yomɨsat.

⁵⁴Nak kokupno da dubagɨkon egek gengo do kap yosot.

⁵⁵Yawe, nak kalbi mango do nandak nandak aŋek nawa gengo yoldat.

⁵⁶Gak dakon gen guramɨkdat. Uŋun da but galak namɨsak.

⁵⁷Yawe, gak nak gat egɨsal, do yo do wadak wadak dɨma asat. Gengo yol do yaŋ teban tok asat.

⁵⁸Gak da nandaŋ yawot aŋ nabi do yaŋ teban tok agɨl, do yaŋsi abi do bɨsit gayɨsat.

⁵⁹Aŋpak morapno do kɨlɨ nandagɨm, aŋek tobɨlek gengo guramɨt do agɨm.

⁶⁰Jomjom dɨma abeŋ. Gen tebango tepmɨsi guramɨkgeŋ.

⁶¹Amɨn yokwi da nap naŋ nak aŋteban aŋek aŋpak yokwinikon ɨlɨk aŋaŋ kɨk do aŋ, mani nawa gengo do dɨma ɨŋtosot.

⁶²Kalbi binap nawa gengo kɨlegɨsi do ya yaŋ gayɨk do pɨdosot.

⁶³Amɨn morap gak do pasalek gengo guramɨkgaŋ amɨn not aŋ yomɨsat.

⁶⁴Yawe, gak da mɨktɨmon mɨŋat amɨn morap kɨsi do but dasi galak taŋ yomɨsal. Gengo do nayɨŋdet abi.

⁶⁵Yawe, yaŋ teban tok agɨl uŋun da arɨpmon oman amɨngo nak do aŋpak tagɨsi aŋ namgul.

⁶⁶Gen tebango do nandaŋ gadasat. Do nandak nandak gat ae gen kokwin tagɨsi agak dakon nandak nandak do nayɨŋ dekgi.

⁶⁷Nak aŋkɨlek akdo pi dɨma agɨl bɨsapmon kositgo yapgum. Mani abɨsok gengo guramɨkdat.

⁶⁸Gak tagɨsi, do yo asal uŋun tagɨsi baŋ asal. Gengo do nayɨŋ dekgi.

⁶⁹Iyɨ do nandaba wɨkwaŋ amɨn da top morapmɨ yaŋ namgwit. Mani but dasi nandaŋek gengo guramɨkdat.

⁷⁰Uŋun amɨn nandak nandakni kɨlegɨ mɨni. Mani nawa gengo do but dasi galak tosot.

⁷¹Gak da jɨgɨ namgul uŋun tagɨsi agɨl. Uŋun da gengo do nayɨŋdet tagɨsi agɨt.

⁷²Nawa gengo do nandako yo madepsi asak. Uŋun da gol ae silva moneŋ morapmɨsi yapmaŋdak.

⁷³Kɨsitgo da nak wasagɨl. Nandak nandak namɨŋaki gen teban morapgo nandaŋ pɨsokeŋ do pi tagɨsi abeŋ.

⁷⁴Gengo da nak tagɨ aŋpulugosak yaŋ nandaŋ teban taŋek jomjom asat. Do mɨŋat amɨn morap gak do pasolgoŋ amɨn nak nandani bɨsapmon kɨsɨk kɨsɨk ani dosi nandɨsat.

⁷⁵Yawe, nak nandɨsat, gak dakon gen teban morap uŋun kɨlegɨsi gɨn. Gak gengo yolek aŋpakno aŋmɨlɨp ak do aŋek jɨgɨ namgul.

⁷⁶Gak nak do toktogɨsi but dasi galak taŋ nam do yaŋ teban tok kɨlɨ agɨl. Do gen yagɨl da arɨpmon nak oman amɨngo dakon but aŋteban abi dosi nandɨsat.

⁷⁷Nawa gengo do but dasi galak tosot. Do nak do bupmɨ nandaŋaki tagɨsi egɨpbeŋ dosi nandɨsat.

⁷⁸Iyɨ do nandaba wɨkwaŋ amɨn da top yaŋek ɨsal dogɨn abɨŋ nepgwit. Aŋpakni uŋun do gak da paŋmayak abɨ mayak toni dosi nandɨsat. Mani, nak toktogɨsi gengo do nandaŋ egɨpbeŋ.

⁷⁹Namɨn amɨn da gak do pasolgoŋ ae gak dakon gen teban nandaŋ uŋun da nagon apni dosi nandɨsat.

⁸⁰Aŋpulugaŋaki gen teban morapgo guramɨgek aŋpakno do mayaktok dɨma pakeŋ dosi nandɨsat.

⁸¹Gak da nak yokwikon naŋ abɨdoki do jomjom aŋek butjɨksi nandɨsat, aŋek tapmɨmno mɨnisi ayɨŋ. Mani gengo da nak tagɨ aŋpulugosak yaŋ nandaŋ teban taŋek jomjom asat.

⁸²Gak da yaŋ teban tok agɨl uŋun arɨpmɨ akdɨsal yaŋ do jomjom aŋek sɨŋtaŋ egɨt da dabɨlno tep namaŋ. Aŋek yaŋ yosot, “Ni bɨsapmon butno aŋteban abi?”

⁸³Nak wain tɨbɨt meme gɨp baŋ wasaŋbi kalɨpmɨ kɨnda amɨn da mukwakon yɨpba teban taŋbi yombem. Mani gen tebango do dɨma ɨŋtosot.

⁸⁴Bɨsap niaŋ da oman amɨngo nak jomjom sigɨn abeŋ? Yo yokwi aŋ namaŋ amɨn do ni bɨsapmon kobogɨ yokwi aŋ yobi?

⁸⁵Iyɨ do nandaba wɨkwaŋ amɨn, nawa gengo dɨma guramɨkgaŋ. Nak da mokeŋ do gapma wayɨkgaŋ.

⁸⁶Mɨŋat amɨnyo nin da gen teban morapgo tagɨ nandaŋ gadaneŋ. Amɨn da ɨsal dogɨn yokwi aŋ namaŋ, do aŋpulugoki do nandɨsat.

⁸⁷Palɨsok nɨkba kɨmakgɨm, mani gengo dɨma yɨpmaŋ dekgɨm.

⁸⁸Nak do toktogɨsi but dasi galak taŋ namɨsal, do aŋpulugaŋaki dɨma kɨmokgeŋ. Yaŋ aŋaki gen teban morapgo guramɨkgeŋ.

⁸⁹Yawe, gak dakon gengo toktogɨsi taŋ aŋaŋ kɨkdɨsak. Uŋun Kwen Kokup tebaisi tosok.

⁹⁰Aŋpakgo tagɨsi uŋun amɨn don altaŋek egɨpdaŋ kabɨkon toktogɨsi taŋ aŋaŋ kɨkdɨsak. Mɨktɨm yɨpgul da tamonikon taŋek dɨma dɨwalɨk kɨsak.

⁹¹Gaga yagɨl uŋun da arɨpmon yo morap tawit da abɨsokyo kɨsi toŋ gɨn. Nido yo morap kɨsi da gak dakon pi aŋ.

⁹²Nawa gengo do but dasi dɨma galak tagɨm tam, nak jɨgɨ paŋek kɨlɨ kɨmakgɨm.

⁹³Gengo dɨmasi ɨŋtokeŋ. Nido uŋun yolapbo gak da egɨp egɨpno aŋkutnal.

⁹⁴Nak gak dakonsi, do yokwikon naŋ abɨdoki. Nak gengo guramɨt do pini asat.

⁹⁵Amɨn yokwi nɨkba kɨmokgeŋ do jomjom aŋ. Mani, gen tebango do nandaŋ egɨpbeŋ.

⁹⁶Abɨsok nak nandɨsat, yo wagɨl tagɨsi kɨnda mɨnisi. Mani gengo uŋun yo tagɨsisi, ae tɨlakni mɨni.

⁹⁷Nak gen tebango do but dasi galak tosot. Gɨldat kɨnda kaloŋ uŋun dogɨn nandaŋ egɨsat.

⁹⁸Gen tebango nagon toktogɨsi tosok, do nandaŋ kokwin tagɨsi amɨn kɨnda dagaŋek uwalno dakon nandak nandak yapmaŋdat.

⁹⁹Nak toktogɨ gak dakon gen bamɨ dogɨn nandaŋ egɨsat, do nandak nandak tagɨsi tɨmɨgek yoyɨŋdet morapno kɨsi yapmaŋdat.

¹⁰⁰Gengo kɨlegɨsi uŋun guramɨkdat, do nandaŋ kokwino tagɨsi da amɨn pelaŋ dakon nandak nandak yapmaŋdak.

¹⁰¹Aŋpak yokwi ak do dɨmasi nandɨsat, nido gengo baŋgɨn guramɨt do nandɨsat.

¹⁰²Gak da gaga dakon gen do nayɨŋ dekgɨl, do gen uŋun dɨma yɨpmaŋ dekgɨm.

¹⁰³Kabaŋ kok uŋun gen kaganokon galagɨsi, mani gengo da uŋun yapmaŋek wagɨl galagɨsisi asak.

¹⁰⁴Gengo da nandak nandak tagɨsi namɨsak, do aŋpak yokwi morap do dɨmasi galak tosot.

¹⁰⁵Gengo da nak aŋpulugaŋban kosit kɨlegɨ agɨpbeŋ dakon lamno asak. Ae kosit agɨpbeŋ dakon teŋteŋno asak.

¹⁰⁶Gen tebango kɨlegɨsi guramɨt do yaŋ teban tok kɨlɨ agɨm, do yaŋ gɨn akdɨsat.

¹⁰⁷Yawe, jɨgɨ madepsi da wutjɨŋ namɨsak. Yaŋ teban tok agɨl da arɨpmon aŋpulugaŋbɨ kalugɨ egɨpbeŋ.

¹⁰⁸Yawe, nak ya yaŋ gayɨsat uŋun da paretno asak, uŋun tɨmɨkgi. Gen tebango do nayɨŋ dekgi.

¹⁰⁹Nak toktogɨsi kɨmot da kapmatjok kɨŋ kɨŋ asat. Mani nawa gengo dɨma ɨŋtokeŋ.

¹¹⁰Amɨn yokwi da nak abɨdok do pat yɨpmaŋ, mani gengo dɨma yɨpmaŋ dekdat.

¹¹¹Toktogɨsi gengo abɨdaŋ kɨmokdot. Aŋapbo uŋun gen da kɨsɨk kɨsɨk namɨsak.

¹¹²Gengo guramɨk kɨmokgeŋsi, aŋapbo wɨgɨ kɨmokgeŋ da bɨsapmon wɨgɨsak.

¹¹³Amɨn gak gol do but bamot aŋ uŋun do dɨma galak taŋ yomɨsat. Mani nawa gengo do but dasi galak tosot.

¹¹⁴Gak kaloŋgɨn pasɨlɨ tamono ae pasɨkno. Gengo da nak tagɨ aŋpulugosak yaŋ nandaŋ teban taŋek jomjom asat.

¹¹⁵Yokwi pakpak mɨŋat amɨnyo ji nepmaŋ dekgɨt. Piŋkopno dakon gen teban guramɨt do nandɨsat.

¹¹⁶Yaŋ teban tok agɨl da arɨpmon aŋteban aŋaki egɨpbeŋ. Aŋaki yo abɨdok do nandaŋ teban taŋek jomjom asat uŋun dɨma suŋ tosak.

¹¹⁷Kɨsitnokon abɨdaŋaki tagɨsi egɨpbeŋ. Aŋaki toktogɨsi gengo do nandaŋ egɨpbeŋ.

¹¹⁸Mɨŋat amɨn morapyo gen tebango yɨpmaŋ dekgaŋ uŋun manji yomɨsal. Top geni uŋun suŋ tokdaŋ.

¹¹⁹Gak da amɨn yokwi morap sɨbɨt sɨbɨt gɨn yaŋ nandaŋ yomɨŋek mabɨ kwaŋ, do gengo do but dasi galak tosot.

¹²⁰Nak gak do pasalek gɨptɨmno madepsi nɨmnɨmɨkdak. Gen kokwin tamokon gak da amɨn gen yaŋ yomdɨsal uŋun do nandaŋek madepsi pasoldot.

¹²¹Nak aŋpak kɨlegɨ tagɨsi baŋ agɨm. Yum nandaŋaki uwalno da yokwi dɨma aŋ namni do nandɨsat.

¹²²Pi amɨngo nak aŋpulugok do yaŋ teban tok abi do nandɨsat. Yum pɨndagaki kwen wɨgɨk amɨn da jɨgɨ dɨma namni.

¹²³Yokwikon naŋ abɨdoki do yaŋ teban tok agɨl uŋun arɨpmɨ akdɨsal yaŋ do jomjom aŋek sɨŋtaŋ egɨt da dabɨlno tep namaŋ.

¹²⁴Oman amɨngo nak butdasi galak taŋ namɨŋek gen bamɨ do nayɨŋ dekgi.

¹²⁵Nak oman amɨngo, do nandak nandak namɨŋaki gengo do tagɨ nandabo pɨsosak.

¹²⁶Abɨsok mɨŋat amɨnyo nawa gengo kɨrɨŋɨkgaŋ uŋun Yawe gak da kobogɨ yobi dakon bɨsap.

¹²⁷Gol uŋun yo tagɨsi, mani uŋun yapmaŋek gen tebango do but dasi galak tosot.

¹²⁸Gen morapgo kɨsi guramɨkdat. Aŋpak yokwi morap do dɨma galak tosot.

¹²⁹Gen tebango uŋun wagɨl tagɨsisi do aŋek guramɨkdat.

¹³⁰Amɨn kɨnda da notni kɨnda aŋpulugaŋban gengo dakon mibɨlɨ nandɨsak kaŋ, teŋteŋɨkon egɨpdɨsak. Gengo uŋun da nandak nandakni mɨni amɨn nandak nandak yomɨsak.

¹³¹Nak amɨn da pakbi do tep toŋ uŋun da tɨlak gen tebango do galagɨsi nandɨsat. Uŋun nandak do but dasi galak tosot.

¹³²Amɨn morap mango do but dasi galak toŋ uŋun bupmɨ nandaŋ yomɨsal, uŋudeŋ gɨn abɨŋ bupmɨ nandaŋ nabi.

¹³³Yaŋ teban tok agɨl uŋun da arɨpmon kosit nolayɨki. Aŋkutnaŋaki yokwi kɨnda da nak abɨŋ nep do pi dɨma asak.

¹³⁴Pulugaŋ nepmaŋaki nak abɨŋ nep do yoŋ amɨn da dɨma aŋupbal ani. Yaŋ aŋaki gengo guramɨkgeŋ.

¹³⁵Butgo oman amɨngo nagon yɨpmaŋek yo tagɨsi aŋ nabi. Gen teban morapgo do nayɨŋ dekgi.

¹³⁶Amɨn da nawa gengo dɨma guramɨkgaŋ do aŋek kunam tagapbo dabɨl pakbino pakbi madep da yaŋ pokgoŋ.

¹³⁷Yawe gak kɨlegɨsisi. Ae gen teban morapgo kɨsi kɨlegɨ gɨn.

¹³⁸Gen teban morap nimgul uŋun kɨlegɨ ae nin da tagɨ nandaŋ gadaneŋ.

¹³⁹Uwalno gengo do nandak nandak dɨma aŋ, do butjap madepsi nandaŋek tapmɨmno moŋ.

¹⁴⁰Yaŋ teban tokgo uŋun paŋkɨlɨgek uŋun bamɨsi yaŋ kɨlɨ pɨndakgɨm. Do oman amɨngo nak yaŋ teban tok gengo uŋun do but dasi galak tosot.

¹⁴¹Nak amɨn ɨsalɨ naŋ amɨn da abɨŋ nepmaŋgaŋ. Mani gengo do dɨma ɨŋtosot.

¹⁴²Aŋpakgo kɨlegɨ uŋun toktogɨsi taŋ aŋaŋ kɨkdaŋ. Ae nawa gengo uŋun bamɨsi.

¹⁴³Jɨgɨ morapmɨ nagon noman toŋ, mani gengo do but galaksi nandɨsat.

¹⁴⁴Gengo uŋun toktogɨsi kɨlegɨsi. Aŋpulugaŋbɨ gen uŋun do nandaŋ pɨsaŋek tagɨsi egɨpbeŋ.

¹⁴⁵Yawe, nak gak do bɨsit tebai asat. Bɨsitno nandaŋaki gen morapgo guramɨkgeŋ.

¹⁴⁶Nak gak do yaŋ tɨdosot. Yokwikon naŋ abɨdaŋaki gen tebango tagɨ guramɨkgeŋ.

¹⁴⁷Wɨsa dɨma dagaŋakwan pɨdaŋek aŋpulugoki do yaŋ tɨdosot. Gen tebango da nak tagɨ aŋpulugosak yaŋ nandaŋ teban taŋek jomjom asat.

¹⁴⁸Kalbi dɨpmɨn dɨma pokdot. Toktogɨsi yaŋ teban tok gengo dogɨn nandaŋ egɨsat.

¹⁴⁹Yawe, toktogɨsi but dasi galak taŋ namɨsal, do bɨsitno nandaki. Gak kɨlegɨsi, do kɨlano aŋaki egɨpbeŋ.

¹⁵⁰Amɨn nandak nandakni yokwi da nak aŋupbal ak do nak da kapmatjok abaŋ. Uŋun amɨn nawa gengo dɨma guramɨkgaŋ.

¹⁵¹Mani Yawe, gak nak da kapmatjok egɨsal. Ae gen teban morapgo uŋun bamɨsi gɨn.

¹⁵²Gengo uŋun aŋteban aŋaki dagok dagogɨ mɨni toktogɨsi tosok uŋun kalɨpsigwan kɨlɨ nandagɨm.

¹⁵³Nak nawa gengo do dɨma ɨŋtosot, do jɨgɨno madepsi uŋun kaŋek aŋpulugoki.

¹⁵⁴Uwal da gen yaŋ namaŋ, do aŋpulugaŋek yokwikon naŋ abɨdoki. Kalɨp yaŋ teban tok agɨl uŋun yolek egɨp egɨp nabi.

¹⁵⁵Amɨn yokwi gen tebango uŋun dɨma guramɨkgaŋ, do yokwikon baŋ dɨmasi tɨmɨtdɨsal.

¹⁵⁶Yawe, bupmɨgo uŋun madepsi. Gak kɨlegɨsi, do kɨlano aŋaki egɨpbeŋ.

¹⁵⁷Amɨn morapmɨ da yokwi aŋ namɨŋek uwal aŋ namaŋ. Mani gengo bamɨ dɨma yɨpmaŋ dekdat.