Kalan Kunum 4:24-34

²⁴Bakayem unsomeliwi, i kiliko, ibolow ki makmak kuw kesomi, Sunbin-Got elo weng bokolewomeliw: “Kamok Fian kutaka! Kute kuw abiil so, kawin so, okmun fian so, mesesem mesesem beem dim alakabe eisneng so, alik alik angom be talfut keleweko, kai kolewselew kale.

²⁵Kolewsomi, kukalem weng afak kunum elo kom Sunbin-Finik be dulewselew kasike, nukalem aliwol kumel Debit be Sunbin-Finik beem kitil e bokolomele: ‘Nimtew angom ete Isalael kawtiw num ibik biliw kawtiw i kaisuw fian kebomeliwi, aneng aneng angom kasel alik alik ikati teifulubin weng mongom banim mak Kamok Fian elo bokolewkabiliw e?

²⁶Aneng aneng angom biim emisik kak kunum so, biim kamokim so, alik alik i ganomin memen keko, bonggusomi, Kamok Fian kuso, kom wiin so amkoselew Mesaya beso, kaso yulo de mit da koyemomin ibolow kebiliw te.’, angse kale.

²⁷Feinka! Emisik kak kunum Kelot so, Ulom abiw mutuk fian kolewse kak kunum Fontius Failat eso, Salusalem abiw mutuk fian kasel iso, Isalael kawtiw num ibik biliw kawtiw nukalem abiw kaleelo talsiliw kawtiw iso, alik alik i bongguko, ibolow ki makmak keko, kom wiin so amkose weng afak Mesaya Yesus beelo de mit da kolewomin ibolow kesiliw te.

²⁸Kesiliw kate, sua kel akate, kukalem ete ibolow fukuneko, ‘Mesaya em dulum elo kanelokoliw te!’, angselew kasike, kawtiw bi ki keko, kukalem ibolow fukunin ete kuw geleweko, kanelewsiliw te.

²⁹Kamok Fian kutaka! Kame, ku kawtiw biim ibolow fukuneko, nulo maka keyemkabiliw be kiliko, atebamolewka! Atemeko, kukalem weng afak kunum waneng nulo dokoyemew kano, nu kalaing kuw keko, kom weng kale net kelinba kelewokoluw kate, nu weng beelo bakayem tem bakayem tem de unemokoluw te.

³⁰Num kanekabuluw ding dim bakate, kom wiin so amkoselew weng afak kunum Mesaya Yesus beem wiin dim e kukalem teing dilew kano, wakamin kawtiw kiliyemeko, auk so kitil so mesesem mesesem eisneng mak im kiin dim e aluwbolewka! Aluwew tewe, i atemeko, yol angeko, kal kemoliwka!”, dangsiliw kale.

³¹Dangsiliw ding dim bakate, im wensanbiliw am be felilewsomelei, Sunbin-Finik e ka biliw kunum waneng biim ibolow tem be weneko, gekei, i kalaing kuw kesomi, Sunbin-Got em weng be bakayem tem bakayem tem de unsiliw kale.

³²Kaem ding dim bakate, Yesus elo “Fein!”, angeko, gelewkabiliw kunum waneng alik alik i ibolow fukunin ki makmak keko, ikalem mesesem mesesem eisneng alik alik be ikalem amen kuw amen kuw kelinba kebiliw kate, alik alik be ikalem makuw bongguko, “Nukalem makuw bakate!”, angenaliw kale.

³³Angiwi, Sunbin-Finik e kalan kunum biilo auk so kitil so duyemse kasike, i kalaing kuw keko, “Feinka! Sunbin-Got e Kamok Fian Yesus elo fomkamin dim elote dawkalfolse te!”, angeko, bakayem tem bakayem tem de unsiliw kale. Keko beli, Sunbin-Got e akalem fein ibolow so kunum waneng biilo akalem ibolow folok so kasi koyemse kale.

³⁴Fein ibolow so kunum waneng biim mutuk e, wanin mesesem eisneng sukum kebiliw kunum waneng mak banim te. Nimtew angom? Emso kunum i ikalem am so, kawin so be weneko, beem tum win kuluko, kalan kunum im teing dim dayemiwi, i kuluko, em banim sukumbiliw kunum waneng ilo amen amen duyemsiliw kasike.