7 Lon ränin ai riaföü üpwe kökköruk, pun en kopwe pälüeniei.
8 Esap fokun wor eman me lein ekewe kot usun en, ai Samol, esap pwal wor och föför mi wewe ngeni om kewe föför.
9 Chon ekewe mwü meinisin ka föriir repwe feito o fel ngonuk, ai Samol mi Lapalap, repwe pwal alinga itom.
10 Pun en ka tekia, ka föri mettoch mi amwarar, en echök Kot.
11 Ai Samol mi Lapalap, kopwe aiti ngeniei mine ka mochen pwe üpwe föri. Iwe, üpwe aleasochis ngonuk fän allükülük. Kopwe fang ngeniei eu leluk esap tipekinikin, pwe üpwe niuokusiti itom.
