JUECES 11:7-13

⁷Huan Jefté quinnanquili nopa huehue tlacame tlen tlali Galaad: ―¿Para tlen innechtemohuaj ama quema intlaijiyohuíaj? Nelía innechcualancaitaj huan hasta innechquixtijque ipan ichaj notata.

⁸Huan nopa huehue tlacame tlen tlali Galaad quinanquilijque Jefté: ―Monequi xitechpalehui huan yeca tihualahuij timitzitaquij. Xihuala tohuaya huan san sejco ma tiquintehuica amonitame huan ta technahuatis nochi tlen tiehuani tlali Galaad.

⁹Huajca Jefté sampa quintlajtlani nopa tlayacanca tlacame tlen tlali Galaad: ―¿Intla nimocuepas imohuaya huan san sejco tiquintehuise nopa amonitame huan intla TOTECO quichihuas para ma huetzica nomaco, nelía temachtli nielis niimotlayacanca?

¹⁰Huan nopa huehue tlacame tlen tlali Galaad quinanquilijque Jefté: ―Tijtestigojquetzaj TOTECO para queja nopa elis.

¹¹Huajca Jefté yajqui ininhuaya nopa tlacame huan nochi nopa altepetl quitequitlalijque Jefté para ma eli ininjuez huan inintlayacanca. Huan nopona campa itoca Mizpa tlamiyacapa Jefté quiilhui TOTECO nochi nopa tlajtoli tlen monequiyaya para quiselis itequi ica yejyectzi.

¹²Huan teipa Jefté tlatitlanqui ma quitlajtlanitij inintlanahuatijca amonitame: “¿Tlaque tijnequi tohuaya para ama tijnequi techtehuis ipan totlal?”

¹³Huan nopa tlanahuatijquetl amonita quinanquili itlayolmelajca Jefté huan quiilhui: “Timechtehuíaj pampa inisraelitame intechichtequilijque nochi totlal quema inquisque tlali Egipto. Inmoaxcatijque tlen pejqui ipan nopa atlajtli Arnón huan yohui hasta nopa atlajtli Jaboc huan onajsi hasta atemitl Jordán. Huajca ama techcuepili totlal ica cuali.”