Juan 8:8-21

⁸Daja mimipe putsu, neicha tud'isana. Yahua su daja hue dereiniame atana.

⁹Da su bezu piada putiyu putana huecuana. Edhi cuana equene piada putiyu putana. Da su pamapa pia cuana tije pupetitaibana. Jesús da epuna neje bahui anitiana.

¹⁰Da su Jesús netiana putsu, epuna eneti tu mehua batana. Tuahueda epuna quisabatana uja: —Epuna, ¿juque da mi tuaquisaji cuana? ¿A mida aiya biame mue matse?

¹¹Epuna ja jeutsutana uja: —Ehe, Echua Puji, ai mahue. Da su Jesús ja epuna atana: —Da su aimue yama biame mi ematse mahue. Puchiditiyuque. Be jucha puichaji beju.

¹²Daja hue neicha Jesús ja cristiano cuana quisainiame atana uja: —Ema da hueda nime. Yama micuana Diusu sa jabuetsuati cuana ebuetsuainia saida, butsepi micuana edusuti puji. Quebata quema jabuetsuati cuana su epuniuneti su, tueda da hueda su epuniuneti cristiano nime. Aimue apuda su epuniuneti cristiano nime mahue. Tueda da beju nimeeichacua.

¹³Da su fariseo cuana ja Jesús uja atana: —Mida mi mehua equisanetiacuinatiani. Da putsu, mique mimi aimue chujeji mahue.

¹⁴Jesús ja jeutsutana huecuana: —Ema quema puji saida equisanetiacuinatiani biame, quema mimi cuana beju chujeji, ema bahue que jenetia ema pueana, quepia ema epuhu putsu. Micuaneda mu bue mahue que jenetia ema pueana, quepia ema eputi.

¹⁵Micuaneda ema juzgaja yainia, butsepi shanapaji mahue biame. Yama mu beju aimue jiahue micuana ejuzgainia mahue.

¹⁶Ahua jiahue yama juzga a cua su mu, beju butsepi yama micuana ejuzga, quema Tata ema beituji ja di ema neje micuana ejuzgata putsu.

¹⁷Ahua beta jatuaquisatiji detse tupupai equisanetiacuinati su, jei a taji. Daja derejiji Moisés chenu sa jacuatsasiati quirica su.

¹⁸Jade. Ema quema puji saida equisanetiacuinatiani. Quema Tata ema beituji ja di quema puji saida equisanetiacuinatiani. Da su etseju tupupai equisanetiacuinatiani.

¹⁹Da su Jesús quisabatana huecuana uja: —¿Quepia mique tata? Jesús ja jeutsutana huecuana: —Micuaneda aimue ema shanapa. Daja huecha quema Tata di aimue shanapa. Ahua micuaneda ema shanapa cua su, quema Tata di detse micuaneda shanapa cua.

²⁰Daja mimiana Jesús, templo su ebuetsua epuneti je. Beju tueda netina chipilu irutsuaji emeji cuana naja su. Mue aiya biame tueda ina atana, tusa ina hora beju cuinaji mahue putsu.

²¹Neicha Jesús ja ehuidusuji, fariseo cuana uja quisatana: —Beju ema eputiyu. Quepia ema eputi aimue micuaneda puti cua mahue, micuaneda micuana sa jucha cuana neje emanueni putsu. Micuaneda ema echacu biame, aimue ema eteje mahue.