Juan 8:5-15

⁵Riyaque epuna tuque ecuana dyaque inime metse baya. Moisésra cuatsashahua equetu tumu tsehue iyetaqui epuna peya deca tuja caquemitiqueremaque jaraquereyaque. Mira bacue ¿eje bucha baya? ¿Tumu tsehue iyetaqui, iyetaqui ama ni taa? —jadya tunajatu acuare tuque nime adebayaque.

⁶Tunaratu Jesús jidama quisaratishacara acuare, tuque jucha metse amerecara aatsu. Tura tuna quemitsacuare ama. Huipuchitanatsutu remecuare jutidya. Reme jadya juatsu tujatu emetucu sapara tsehue yahuaju huenetibunecuare.

⁷Bacadurajacacuare ama tunaja tuque. Remehuaquetu netitsuranucacuare. Pana neti junucatsu tujatu ecana acuare: —Ejeque ni micuana cajuchatima cabatiya ni riya piji buchique, turadya riyaque epuna tumu tsehue maremetse paa, —jadya tujatu ecana acuare.

⁸Yudijidya remenucatu jucuare Jesús. Remenuca jadya juatsu tujatu huenenucacuare yahuaju.

⁹Amena tuja quisarati bacatsu dutyadya ecana juchaquique caadebatibarecuare, dutya jidama inime tupuhuaque adebatsu. Dutya ecana peadya peadya cuinanabarecuare. Esiri cuanaque tuna icuene cuinanacuare, tupuju dutya ecuita cuana. Cuinanatsu tuna Jesús camadya epuna tsehue shanacuare. Amena dutya cuinanaterehuajutu Jesús neticuare.

¹⁰Peya ecuita cuana cuinanaterehua baatsu tujatu epuna jadya acuare: —¿Are mique jidama acara juhua cuanaque, mama? ¿Ni ejera buchiquemi tumu tsehue marehua?

¹¹Tudyatu acuare epunara: —Aama cuitadya, tata, ni ejera bucha. Dutya tuna cuinanaterehua. Tudyatu Jesúsra acuare: —Ni erami cuejaya amadya micue jucha tibu iyetanataquique. Dirucue. Cajuchatinucaume camadya, —jadya tujatu acuare.

¹²Yudijidyatu Jesúsra isaranucacuare ecuita cuana Yusuja etareju: —Ique hueca buchique. Yusuja quisarati micuana bahuityaya, micuana dyaque jida tuyu ani ishu. Eratu anishasiriya eaqueja nimee juya cuanaque. Jacaya amadya tuna era. Adebamereya tuna Yusu, tuna ni eje tupu apudaju juneniya cuanaque bucha juishu ama, —jadya tujatu ecana acuare.

¹³Tura jadya ahuajutu fariseo cuanara jadya acuare: —Miquemi micue inime tacadya jutidya quisaratiya. Jadya tibudya tuque ecuana ejenetaqui ama baya mira cuejayaque, peya mique eje buchique micue ishu quisaratitaqui tibu, —jadya tunajatu acuare.

¹⁴—Arepa ecue inime tacadya jutidya quisaratiya ama bucha, era cuejayaquetu yunerique. Ique bahue ejuque ique junahuaque, eju diruyaque jadya. Micuanara bacue adebaya ama.

¹⁵Arepa micuanara ique eje buchique adebaya ama ama bucha, micuanara “ecajuchati” jadya aya. Riyaque yahuaju cuanaja inime tupudya jutidya tuque micuana aya. Era bacue ni ejeque buchique “Ecajuchati mique” jadya aya ama, arepa era dutya adebaya ama bucha.