Juan 7:20-49

²⁰Inchene misaamera nu pasrabiibe trencha løtabelø køn: —Ñibe kwaimandzig tøgaig køn cha. ¿Ñune mu kwetchab lab kø?— cha.

²¹Inchene Jesúsbe trencha løtabig køn: —Isrin kwaløm kan mana asiimíig asha kønrrai marigwandø ñimbe mayeeløba kwaara asha køn cha.

²²Pøs inchawei Moisésbe circuncidanrrai ñimune karua pasrig køn cha, (truibe Moisésweinukkurri arrubig kømøtø, ñimui merrabsrø kølli misaamerainukkurri pølbasra arrubigwan). Inchen ñimbe isrin kwaløm kuindøgucha kan møg-unan circuncidabelø køn cha.

²³Inchawei tru maig maramigwan martrai Moisés pøriilan maig taigwan kalø mara kørrømarmønrraptø, kan møwan isrin kwaløm kuindøgucha ñimma circuncidabelø købendø, na isrin kwaløm kan møwan kwanrrøwan kerrigu newan tamarene, trube, ¿ñimbe nane chindimba namøgue cha?

²⁴Ñimuin kabyu maig misag asønaben ke trunundø asha marøb pønrrømøtø, marøppe, maig kønrrabigwan sølgandø asha maramig køn— cha, trenchibig køn Jesúsbe.

²⁵Inchen møiløgøben jerusalénsreeløbe trenchibelø køn: —¿Øigwanweinrre kwetchab lab amøñimuitarru? cha.

²⁶Au, ya mayeelai malau waminchib pasrøben, mugucha chi chimøn cha. ¿Kabe tru ashib karubeløbe øibe Cristo kui asha treeg mara tøgagø chinderah? cha.

²⁷Inchendø nambe ø møøbe chugurri arrig kui asha ker cha. Trune Cristo arrubene, chugurri arrin kui mugucha ashchaamøn— chibelø køn.

²⁸Inchen Jesúsbe Tiuswei yau kusrenanøb pasrøwa, truba mur waminchib trenchibig køn: —Ñimbe nane mu kui ashib, katø nabe chugurri arrig kui ashawein køn cha. Nabe arrua pasrappe, naimburaptø arrua pasrømøtø, tru ciertonig nø karua ørig pasrar cha, tru ñim mu kui nebua asiimíig.

²⁹Inchen nabe nune mu kui ashibig kur cha, kaguende nabe nuinukkurri arrub, katø nø nan karua ørig kua.—

³⁰Inchen nun merrarrawa, sruamrrab inchendø, mugucha merrarrameelø køn, kaguende nun treeg maramig ura pumø srø køben.

³¹Inchen puebloyu misaamera truba nu nun kørewabe, trenchibelø køn: —Cristo arruppe, ¿Tius nøba pasrain kui asha kømig mariilø i møg lataig maskucha mana martrab kø?— cha.

³²Fariseosmerabe misag truba nørrø Jesúsweimburab niløtø truba waminchamørøb kui mørabe, nømbe judíos sacerdotesmeran karubeløba misra, Tiuswei yau ashib pønrrabelan ørøbelø køn Jesúswan merrarranrrai.

³³Inchene Jesúsbe trenchibig køn: —Yu ñimbabe katøgucha kan maya yanatø uñchab kur cha. Trugurrimbe nan karua ørøbigweisrømay katø inrrab kur cha.

³⁴Inchen na ibene, ñimbe labendø, nane wetørranrrab kaimanrrun cha. Katø tru na wanrrab yaisrømbe ñimbe amrrab kaimanrrun— cha.

³⁵Inchene judíosmerabe nømasiyaitø trenchib payibelø køn: —Ø møøbe ¿chumay inrraindah? cha, nam wetørramgaibe. Kabe ¿tru judíosmera griegosmerai utusrø amba warabelaisrømay ya, tru griegosmeran kusrenanrrab inrrab inda, chindah cha?

³⁶¿Øyeebe mandø tah? cha, tru: “Nan lappe, labendø, nane kalanrrun” chib. Katø: “Na waisrømbe ñimbe amrrunrrab kaimanrrun” chippe.—

³⁷Incha tru srabe kwaløm, fiesta purø tabig purayam kwaløm Jesúsbe pasramisra, mur waminchib trenchibig køn: —Møikkøben pimulgwaibe naimay arrua, muchi cha.

³⁸Tiuswei wamwan pørigu maig taig, møikkøben nan kørebiibe nui manrraugurrimbe managuen kølømø pimera lulrrun— cha.

³⁹Øyeeg chippe, Jesúsbe tru nun kørebeløbe Espíritu Santon utønrrab køn cha, truigweimburab trendaig køn. Pøs katøgucha Espíritun tranimíig srø køben, kaguende Jesúsbe purø nuig purø tabig tørigwan utømø srø kua.

⁴⁰Inchen møiløgøsrøn tru nu misag søtøyuelø nø wamindiilan mørabe, trenchibelø køn: —Iibeguende, Tius maig karuigwan eshkabig, tru møg køn— cha.

⁴¹Inchen kaneløbe trenchibelø køn: —Iibe Cristo køn— cha. Inchen katøganeløbe trenchibelø køn: —¿Cristogan Galileagurri attraitarru? cha.

⁴²Cristobe Davidwei misagugurri arrub, katø tru David tsui pueblo, Beléngurri attrabig køn cha. ¿Tiuswei wamwan pørigube yamba trenchibig kømuitarru?— cha.

⁴³Incha misaabe Jesúskurrindø nømdø ke nøørøtø misrøb chab tarømisra,

⁴⁴møiløbe kemørtrab inchendø, møikkucha chinchimeelø køn.

⁴⁵Incha tru Tiuswei yau chigøben puraimønrrai ashib pønrrabeløbe tru sacerdotesmeran karubeløba, fariseosmeraba purraisrø katø pubene, truiløbe nømune trenchibelø køn: —¿Jesúswane chindimba sruamrrumøgue?— cha.

⁴⁶Inchen tru ashib pønrrabeløbe trencha løtabelø køn: —¡Kan managuen ø møg lataibe muguen wamindig kaagøn!— cha.

⁴⁷Inchene fariseosmerabe trenchibelø køn: —Kabe ¿may waminchen ñimgucha tabig chitanmab tru kuindø kørewa pønrrappeendi? cha.

⁴⁸Kabe ¿namui ashib karubelø kui, fariseosmera kui møikkøben truiløma nun køreitarru? cha.

⁴⁹Pøs i misag søtø tru maig maramigwan martrai Moisés pørigwan ashmeeløbe larrø kaig nebuim pønrrønrrai pønsrailø køn— cha.