Juan 5:7-20

⁷—Jaa, Xanen Ibuun. Jakia nai tsumapan jene shubimai anu tsuan ea bakebain pukutimaken en unanxubida kaya isin teneai betsan ea maemai binukain jabu dukun pukukubainmisbuki— aka

⁸jawen nuikin xuxawanun, iwanan, Jesúsun yuikin: —Jaskakenan, benitan min dakati iabaini kadiwe— aka

⁹jawaida jawen yuda dakushi kayatan benikauan sábado juindukuntitian dayatimabiaken jabiatiandi jawen dakati iabainaiwen taexun

¹⁰judio xanen ibubun yukakin: —¿Jaskakin juindukuntitian min dakati iabainkin Moisin nuku nemani min chibanma kaneai?— akabu

¹¹—Ea xuxawaxutun yunukin: “Min dakati iabaini kadiwe”, ea wa en kai ikaii— jatu wa

¹²—¿Tsuan mia jaska yunuxumen?— akaibun

¹³janu ichabu anu Jesús jawaida nashui ikawen taexun jatun xuxawaxu unanma jadakidi jawa jatu yuitima nibai kaken

¹⁴chipu Jesús Templo jemaintin anu jaki ana nukuxun yuikin: —Uinwen, ikis en ma mia xuxawaxuki. Jaskaken chakabu shinankin Diosun jancha ana kaneyamaxanwen, min ana jamapai betsa kaneaidan, jawada chakabujaidawen min ana pikutidukidan— aka

¹⁵ja juni jaska wa kaxun judio xanen ibubu jatu yuikin: —Na en xuxaxu man ea yukadan, Jesúsun ea akakiaki— jatu wa

¹⁶juindukuntitian Jesúsun xuxawawen taea jaki sinatakin judio xanen ibubun Jesús danankin yuainbun

¹⁷jatun jancha ninkatan Jesúsun jatu yuikin: —En Epa Diosun jatu medabewai dayakunkainmiski. Eadi jabiaskadiai en dayadiakunkainaii— jatu wa

¹⁸ninkatan june judio xanen ibubu yuinamei: —Sábado juindukuntitian yununi kaneai bestimaki. Chakabu betsa wadiai jamebi Dios keskakatsis ikin yuikin: “Dios en Epaki”, ikin yuidiaikiki— ikaiwen taea jaki sinatajaidakin Jesús tenankatsis ichakayamaibun

¹⁹Jesúsun ana jatu yuikin: —Chanima en matu yuiaii. Diosun baken jawen shinanen besti jaska atidumaki. Jakia jamapai shadabu Epa Diosun akai uinkin jabiaskadi wakin jawen bakendi adiatiduki. Jaskaken Epa Diosun shinanen ea jawen baken en adiaii.

²⁰Jaska inun, Epa Diosun jawen bake bechipaikin dasibi akin uinmamiski. Jaska inun, ana kushipajaidawen dami atimaska betsa betsapa jawen bakewen matu uinmaya uin man e ikunkainxanaii.