Juan 4:45-54

⁴⁵Meneng pegdateng din doton te probinsya te Galiliya, nepela sikandin so limiyag se menge tege Galiliya kandin, so medita dan se timanod te Pista te Pegpelowà kidoen te Jerusalem, aw kinità dan se menge kepelahan ininang din kidoen.

⁴⁶Limikò si Jesus doton te lonsod te Kana sakop te Galiliya. Yan se lonsod ininangan din te kepelahan, so binaloy din bino se wayeg kidoen. Doton te doma lonsod te Kapirnaom, doen sebad opisyal te gobirno te Roma, aw nesekitan se batà din.

⁴⁷Pegdineg din te nesayo den si Jesus lekat te probinsya te Judiya aw dimateng den kidoen te probinsya te Galiliya, dimoton sikandin ki Jesus, aw nemoyò te domoton sikandin te Kapirnaom amon megpegolì te batà din, so ontò den netigdaan.

⁴⁸Minikagi si Jesus, “Aw wedad pengilala aw kepelahan kitaen niyo, eked kaw pemenal kanak.”

⁴⁹Minikagi se opisyal, “Sir, ayas ka taking kanak te eked pa kematay se batà ko.”

⁵⁰Minikagi si Jesus, “Olì ka den, so negolian den se batà nikaw.” Nemenal se opisyal te inikagi i Jesus kandin, aw nesayo.

⁵¹Te wedà pa dateng doton te balay din, pig-isongon din se menge sineligan din kidoen te dalan, aw mig-indan dan kandin te negolian den se batà din.

⁵²Penga niyan, mig-insà sikandin aw eden orasi se pegkèpiya din. Timaba dan, “Gebenini te ala ona te meapon, minowas se keinit te lawa din.”

⁵³Penga niyan, neeneng-enengan din te yan se oras te peg-ikagi i Jesus te negolian den se batà din. Yan se doun te nemenal sikandin ki Jesus aw kedita te doma otaw mig-ogpà kidoen te balay din.

⁵⁴Yan se ikedowa kepelahan ininang i Jesus. Ininang din iyan kidoen te probinsya te Galiliya te pegdateng din lekat te probinsya te Judiya.