Juan 4:4-31

⁴Diyot kodlivod dan, ko‑ilangan en nod baya sikandan diyot prubinsya to Samaria.

⁵Na, noko‑inguma sikandan diyot morani to bonuwa to Sicar no sakup to Samaria. Diyon sikandan to livuta no id boggoy dangan ni Jacob to anak din no si Jose.

⁶Woy rutun, duwon moraom no bolun no id bovallan ni Jacob. Pomon to novolloy si Disas to kod‑ipanow rin, id ounsad sikandin diyot ibpit taddon bolun woy iddon timpu, moko‑untud don kos allow.

⁷Na iddos mgo tinodduwan din, id pontollus diyot bonuwa amoy od bovolli to koka‑an. Laggun to id ounsad pa si Disas, duwon sokkad no molitan no toho Samaria nid inguma su od ponikoddu. Kahin Disas kandin to, “Uri, po‑inomma a pobbe‑en to oweg.”

⁹Mid ikahi iddos molitan diyot ki Disas to, “Mambo man tod buyu ka koddi to oweg, su Judio ka man woy siyak, molitan no toho Samaria?” Id oseng din idda su iddos mgo Judio, waa me‑en moppiyon koroniyan taddot mgo toho Samaria.

¹⁰Id tavak si Disas to, “Otik nosorollan du ra nanoy ko ondan kos id boggoy to Monama woy ko ondoy a no id buyu kikow to oweg, sikkow pe‑en ayu kos od buyu koddi, woy od boggayan ku en sikkow to oweg nod pokovoggoy to umuu.”

¹¹Kahi taddot molitan to, “Sir, moraom kos bolun woy waa sahuk du. Ingkon du man od ongayon kos oweg nod pokovoggoy to umuu?

¹²Id boggoy dangan konami inin bolun taddot kovuyyahan ta no si Jacob. Sikandin woy dos mgo anak din, ahad iddos mgo oyama rin, ka‑ay en pomon kos id inom dan. Na, ko ungketen, lampas ka pobbos taddot kovuyyahan ta no si Jacob?”

¹³Mid tavak si Disas to, “Iddos ahad ondoy nod inom ka‑ay'n oweg, od kotokkangan pa mandon.

¹⁴Piru iddos ahad ondoy nod inom to oweg no id boggoy ku, dii ron en sikandin od kotokkangan. Oyya su iddos oweg no id boggoy ku, od pokovoggoy to umuun waad tomanon. Od poko‑iling idda to sobsob diyot ginawa rin no od aus woy diid ko‑ottiyan.”

¹⁵Kahi taddot molitan to, “Sir, boggayi a ruwon no oweg amoy dii ad od kotokkangan woy dii ad od livodlivod ka‑ay nod ponikoddu.”

¹⁶Kahin Disas to, “Uli ka pobbo woy dumannow rini kos sawa ru.”

¹⁷Mid tavak iddos molitan to, “Waa man sawa ku.” Kahin Disas to, “Ollog en kos id oseng du no waa sawa ru,

¹⁸su iyon bonnaa, kolimma kad noko‑osawa woy dos mama no duma ru ko‑ungkay, konna ru tullid no sawa. De‑en bonnaa rad kos id oseng du.”

¹⁹Kahi taddot molitan to, “Sir, nosorollan ku ko‑ungkay no propeta ka vos.

²⁰De‑en ponudtuli a ko mambot sikiyu no mgo Judio, od ikahi no diyon da to Jerusalem kos ollog no lugaa to kodsimba to Monama. Piru ontongngiyu ikon buvungan. Sikami moho no mgo toho Samaria, id pomakoy no ika en no buvungan kos mooggot no simba‑an, oyyos duwon me‑en id ponsimba iddos kovuyyahan ta dangan.”

²¹Mid tavak si Disas to, “Uri, pominog ka tod osengon ku kikow. Od inguma en kos timpu no od simba kow to Monamon Amoy, konna ka‑ay no buvungan woy konna mandad diyon to Jerusalem.

²²Oyyos sikiyu no mgo toho Samaria, od simba kow, piru waa kow nokokilaa ko ondoy kos id simba row. Piru sikami no mgo Judio, nokilaa roy kos id simba roy, su iddos tohodtobbus, id pomon en dinit konami no mgo Judio.

²³Od inguma kos timpu woy ko‑ungkay ron en, no iddos mooggot nod ponsimba to Monama, od ponsimba ran to Monamon Amoy ukit to tivuk no ginawa ran woy bonnaavonnaan kodsimba. Oyya su ungketen en kos kodsimba no id kopi‑it Monama.

²⁴Dos Monama, ispiritu, de‑en iddos langun nod ponsimba kandin, ko‑ilangan nod simba kandin diyot tivuk no ginawa ran woy bonnaavonnaan kodsimba.”

²⁵Mid ikahi iddos molitan to, “Nosorollan ku nod undini iddos Mesiyas no id aam to Monama amoy'd harit langun. Na otid inguma ron sikandin, id paabbotlabbot din kos langun dinit keta.”

²⁶Kahin Disas to, “Iddos od tommanon du, siyak en idda.”

²⁷To id oseng din idda, id inguma ron iddos mgo tinodduwan din. Nosoobbuwan sikandan to nokita ran no id potongkooy si Disas taddon molitan. Piru waa en ahad sokkad kandan no noko‑intud taddot molitan ko ondan kos dontulon din. Woy waa ran mandad noko‑intud ki Disas ko mambot id tongko rin iddos molitan.

²⁸Na, id tuwos taddot molitan iddos gunsu rin woy id livod sikandin diyon to bonuwa, woy id osengan din iddos mgo minuvu to,

²⁹“Duma kow koddi amoy'd kokita row iddos minuvu no nokosaddoo moho to langun nid puungan ku. Kuo kid, su saddook sikandin don en kos Mesiyas.”

³⁰De‑en id pon‑undiyon to ki Disas iddos mgo minuvu no id pomon diyon to bonuwa.

³¹To waa pa id inguma iddos mgo minuvu riyot ki Disas, id inggat sikandin taddot mgo tinodduwan din amoy'd ka‑an.