Juan 4:23-53

²³Masadamatu ecuita cuanara Yusu muidadiya tuque eje bucha muitacara juya eque. Tuja inime eque tuna anibuque. Yusuja Esprituja casa eque tunajatu mui neri adadiya. Jadyatu ecuanaja Etata Yusuja bijida tuque jadya muiqui cuanaja mui ishu.

²⁴Yusu tu cuitama. Ejitajuque ama tume. Tuja Espíritu equetu caadebameretiya. Tuja Espíritu eque cuita camadya tuque micuana tuque emuita bucha muie eau Yusu, tuja quisarati yuneri eque cuita camadya, —jadyatu Jesúsra epuna acuare.

²⁵—Jejee, adebayadya tuque era ejeque huecaca Yusuja Emepeque, Mesías junabuqueque. Tuque junatsu, tura ecuana bahuityanabuque ecuana bahue jutaquique, —jadyatu epunara acuare.

²⁶—Idya Mesías, miatsehue iyaja cuita quisaratiyaque, —jadyatu Jesúsra acuare.

²⁷Jesús tumeque epuna tsehue quisaratiyaju ecuana tura mepehua cuanaque judirunucacuare. Bape ecuana badirucuare tuque epuna tsehue quisaratiyaju. Jadya ama bucha, “¿Eje bucha equemi tumeque epuna tsehue quisaratiya? ¿Ai tuquemi bacahua?” ni ejera tuque ecuana jadya bacadurataqui ama bacuare Jesús.

²⁸Tumetu epuna tuja sura ena cani peque shanaquenatsu cuacuare epuju. Ejeque tsuruyaquedya jutidya tujatu cuejaajecuare:

²⁹—Necuara ena caniju. Yuhuatu aniya ecuita. Adebamaradya jutidya tura ique eje buchique cuejahua. ¿Tudya ni tu Mesías? ¿Tudya ni tu Yusuja Emepeque? —jadya tujatu ecana cuejaajecuare.

³⁰Jadya bacatsu tuna epu juque cuinanatsu cuacuare Jesús queja.

³¹Ecuita cuana junatimaju tuque ecuana Jesús acuare: —Jee taa ecuana ara ishu cuanaque quemitihua cuanaque. Nearaarara, —jadya tuque ecuana Jesús acuare.

³²—Ecuetu aniya era ai sareyaque micuanara adebayaque ama, —jadya tura ecuana acuare.

³³—¿Aira cuana ni taa rejari behua ara ishuque? —jadya tuque ecuanaja inime jucuare.

³⁴Ecuanara ara ishuque adebayaju ecuana Jesúsra quemitsacuare: —Ecuetu ataqui Ique Cuadishaquira amerehuaque. Tura amerehuaque tuque ecue atillataqui.

³⁵“Pushi badi juatsutu amena tupu ecuanara uhuahuaque huesa ishu”, jadya micuana jubahue. Era micuana cuejaya. Nepetacue junabareya cuanaque. Tunaratu sareya ejeja tsahuatsu masadama eaqueja catyati ishu. Tuna tuna teeju euhuaque amena ejahuane buchique.

³⁶Euhuaque huesaqui cuanaque etsujequi inatsu pureama juya bucha, tume bae cuitadyatu Yusu merequi cuanaque pureama jubuque, peya cuana eaqueja catyatiyaju baatsu. Tuna ai juyaque tu ejitajudya judadiya; tumequetu tere baecuaque. Yusratu dyaque jida amerebuque dutya tuque merequi cuanaque, tunaja mere ejitaju ama bahuishaya cuanaque, tumebaedya masadama ejitaju baya cuanaque.

³⁷Jadique quisarati tu yuneriquedya: “Peadya tu uhuauhua puji; peya bacue jahuanehuaju huesaquique”. Tumebaedyatu umaera tsahuaya icuene cuita ecue quisarati bacaqui juhua cuanaque eaqueja catyati ishu, peya cuana quisarati cuejaqui cuana eque.

³⁸Cuadishaya micuana era ecue quisarati iyacuaque cuejara. Micuana micuana peyara uhuahuaque huesaqui buchique, peya cuanara icuene quisarati yunerique cuejahua tibu. Micuana quisaratiyaju bacaqui cuanaque tuna eaqueja catyatidadiya, ai micuanara jipidya cuejayaju ama, peya cuanara icuene cuejahua tibu, —jadya ecuana Jesúsra acuare, ecuita cuana tuaqueja junayaju.

³⁹Epunara tuja epuju cuanaque Jesús bana ishu cuejabareyaquepa tujatu ecana acuare: —¡Dyaque taa tuja casa aniya! Tuja ique bamaque cuitadya tura adebahua ique eje buchique. Tura cuejayaque bacatsu tunajatu umadara ejenecuare Jesús, Mesiasque Yusuja Emepeque.

⁴⁰Quisaratiyaju bacatsu tunajatu bacacaradya jutidya acuare. Jadya tibudya tunajatu tuaqueja jutitsu —Rehuadya ecuana queja eje uma huecaca cuana anicue jari, —jadya aticuare. Tumetu Jesús beta huecaca tuna queja anicuare.

⁴¹Tura cuitadya cuejayaju bacatsu tuna dyaque umada tuaqueja catyaticuare. Ejenecuare tuna tuque Mesías jadique.

⁴²Jesús queja catyatihua cuanaratu epuna acuare: —Icuene cuita tuque ecuana ejenehua tuque Mesiasque, mira cuejayaju bacatsu jutidya. Iyacuatu ecuanara cuitadya bacahua. Catyatihua ecuana tuaqueja. Amena tuque ecuana adebaya Yusura tuque riyaque yahuaju cuanaque Ijahua quejaque inajacamerera cuadishahuaque, —jadya tunajatu epuna acuare.

⁴³Beta huecaca juatsu ecuana Jesús tsehue Samaria juque cuanucacuare, Galilea yahuaju.

⁴⁴“Yusuja quisarati cuejaquiquetu peya epuju cuanara muibaya; tuja epuju cuanara cuita bacue muibaya ama”, jadyatu Jesús beru jucuare.

⁴⁵Jadya ama bucha tunajatu Jesús Galileaju junatihuaju tuhua cuanara jida batsacuare. Tuna dyadipa tuna Jerusalénju Pascua chine ishu cuacuaredya. Tuhuadya tunajatu bacuare Jesúsra ayaque ni ejeque ecuitaja ataquique ama. Jadya tibudya tunajatu pureama tsehue batsacuare.

⁴⁶Tuequedyatu Jesús Caná Galilea yahuaju yudijidya dirunuca jucuare, icuene ena uva nacaca cabapetishacuareju. Tuhuatu jucuare huaraji, ecuari merequique. Ebacuaque tujatu dyaque ujejeda jucuare Capernaumju.

⁴⁷Jesús junanucahuajutu huaraji ecuita cuanara cuejacuare: —Jesús ri rehua. Juetinucahuatu Judea juque. Jadya cuejahuaju tujatu Jesús isaraticuare. Canerecatinaticuaretu tuaqueja: —Nerecabacue taa ique. Ecue ebacua taa majutaqui cuita. Necua ecue etareju. Ecue ebacua chachaneticue, —jadya tujatu aticuare.

⁴⁸Tudyatu Jesús jucuare: —Ni ejeque buchique micuana eaqueja catyaticara juya, Yusuja casa bamere ishuque era ayaju bamaque, ni ejeque ecuitaja ataquique ama ayaque bamaque.

⁴⁹Huarajitu quisaratinucacuare: —Ecuatsashaquique, jecue ebajarara, ecue ebacua majuma jarijudya.

⁵⁰—Dirunucacue micue etareju. Micue bacua tu amena chacha. Majuya ama tuque, —jadyatu Jesúsra acuare. Huarajiratu ejenecuare Jesúsra tuja ebacuaque chachanehuaque, arepa japada ama bucha. Amena tuque ejenetsutu dirucuare tuja etareju.

⁵¹Tudya tujatu tsurutsacuare edijiju tuja mere puji cuana. Isaratsacuare tuna tunaja patrón: —Micue bacua tu chacha. Amenatu dyaque mejemeje cuita juhua, —jadya tunajatu atsacuare.

⁵²Tudyatu ecuitara bacaduratsacuare tuja mere puji cuana: —¿Ai ura dyane ecue ebacua jida mejemeje juhua? —jadya tujatu ecana atsacuare. —Riyabarepa a la una tujatu baara netichine, —jadya tunajatu atsacuare.

⁵³Jadya cuejayajutu ecuita huecatanacuare: “Tumeque ura cuita di taa riyabarepa Jesúsra ‘Micue bacua tu amena chacha’ jadya achine”. Tumetu Jesús queja catyaticuare. Tumebaedya dutya tuja etareju aniya cuanaque Jesús queja catyatibarecuare.