Juan 20:5-21

⁵Cani ducu peta ishu remecuare ique. Tume tuque remetsu cuajinaticuare. Bacuare tuque sahuana cuita camadya Jesús piruriqui juchineque cani ducu eiya. Nubicuare ama ique.

⁶Tudyatu Simón Pedro ique tupujudya junaticuare. Junatitsutu Pedro nubinaticuare cani ducu. Tura batinucacuaredya sahuana tunara Jesús piruriqui achineque eiyaque.

⁷Tumebaedyatu bacuare tunara Jesús iyuca dunuqui achineque. Tumeque eracatu tunara ecuita piruriqui achine tsehue ama jucuare. Peya queja amacatu piruri iya jadya ea jucuare. Emajuquetu tuhua ama jucuare.

⁸Pedro tupuju junatihuaque nubinatihuaju ique icuene junatihuaque tupuju nubicuare emajuque caniju ishachine ducu. Banaticuare tuque eje bucha juhuaque. Baatsu tuque ejenecuare yuneridya Jesús majutsu chacha junucahuaque.

⁹Adebacuare ama jari tuque ecuana Yusuja quisarati: “Mesiastu majutsu chacha netitsuranucabuque” jadique.

¹⁰Tume yatse cuinanatsu etareju dirunucacuare.

¹¹María Magdalaju aniyaquetu emaju caniju cuanucacuare yatse tuhuaque cuinanama jarijudya. Tuquetu neticuare cani tsecue peque, payaque. Paatsutu huipuchitanacuare cani ducu cuaji ishu.

¹²Tudya tujatu bacuare beta barepa juque Yusu tsahuaquique ecatse. Ejutuqui pajada tsehue ecajututi tatse jucuare. Jesús emajuque jarahuaju tatse juanicuare. Peadyatu anicuare Jesúsja iyuca juhua queja amaca. Peya bacue anicuare Jesúsja ehuachi juhua queja amaca.

¹³Tudyatu Yusu tsahuaqui ecatsera bacaduracuare: —¿Eje bucha juatsumi paya, mama? —Paya ique, Ique Cuatsashaquique emajuque tunara ejera cuana chirinahua baatsu. Ique baecua eju cuana taa tunara ecue iyatihua, —jadya tujatu ecatse acuare.

¹⁴Jadya juatsutu María cahuallaticuare. Tudya tujatu bacuare Jesús junetiyaju. Arepa petaya ama bucha tujatu cueyanecuare ama Jesús.

¹⁵Turatu bacuare tumeque ecuita euhua cuanaque naruquique bucha jutidya. Tudyatu Jesúsra bacaduracuare: —¿Eje bucha juatsumi paya, mama? ¿Ai tuquemi sareya? —jadyatu Jesúsra acuare. —Ique Cuatsashaquique emajuque tuque sareya. Mira peya queja dujuhuaque juatsu, cuejacue ique eju mira iyatihuaque. Eratu emajuque caniju iyamerenucacara aya, —jadyatu Maríara acuare.

¹⁶Tudyatu Jesúsra acuare: —¡María! Jadya bacatsu tujatu cueyanecuare tuque Jesúsque. Bajiyu tsuratsu tujatu acuare tuja yana eque, israelita cuanaja yana eque: —¡Rabuni! —jadyatu Mariara acuare. (Rabuni tu “Ebahuityaquique” jadique.)

¹⁷—Jipeume ique. Ecue Etata queja tsurama jari. Dirucue ecue eatsehuequi cuana queja, era mepehua cuana queja. Cuejadirucue ecana: “Jesús patu Etataque queja, tumebaedya micuanaja Tata queja jadya tsuraya. Tsuraya patu tuja Yusu queja, tumebaedya micuanaja Yusu queja”, —jadyatu Jesúsra cuejamerecuare María queja.

¹⁸Tume ecuana María Magdalajura cuejaticuare. Ecuana queja jutitsu tura ecuana cuejaticuare: —Eratu Ecuana Cuatsashaquique bahua. ¡Enetitsuranuca tuque! Jadya ecuana aatsu tura ecuana cuejacuare tuque Jesúsra cuejamerehuaque.

¹⁹Tumeque domicu huecacadya ecuana chineju casitaticuare ecuana Jesúsra mepehua cuanaque. Dutya etsecue cuanatu eteritilla jucuare. Ecuanaja huaraji cuana tuque ecuana mubacuare. Arepa etsecue cuana eteri ama buchatu Jesús etsecue pacashama nubi jucuare. Isaranaticuare tura ecuana: —Banuchi. Are micuana bajida juya ama, —jadya tura ecuana anaticuare.

²⁰Jadya aatsu tura ecuana bamerecuare tuja emetucu ecatse curusuju tatatanahuaque. Tumebaedya tura ecuana bamerecuare tuja epere tsati tsehue esacuaque. Pureama ecuana jucuare Jesús chacha banucaya tibu.

²¹—Netsapeume inime. Pureama nejucue. Ique ecue Etatara riyaque yahuaju tuja quisarati cueja ishu cuadishacuare. Jadidya micuana era dyadi cuadishayadya jidaque quisarati cuejara, —jadya tura ecuana acuare.