Juan 20:19-30

¹⁹Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”

²⁰Penga niyan, impekità din diyà kandan se menge palì diyà te belad din aw kilid din. Ontò neluba se menge tinoledaan din te pegkità dan te Pengolo.

²¹Penga niyan, todà minikagi si Jesus, “Ibeg ko melinaw se pedowan niyo. Iling te pegsogò te Amay ko kanak, yan isogò ko den heman sikiyo.”

²²Penga te peg-ikagi din kenyan, mig-edop sikandin diyà kandan aw minikagi, “Domateng se Espiritu Santo kenyo.

²³Aw pegwedaden niyo se salà te doma otaw, pegwedaden iyan te Timanem. Meneng aw eked niyo pegwedadi se salà te doma otaw, eked iyan pegwedadi te Timanem.”

²⁴Nayan, si Tomas, se doma ngadan din si Pingin, sikandin se sebad diyà te sempolò teg dowa tinoledaan i Jesus. Pegpekità i Jesus diyà kandan, wedad kidoen si Tomas.

²⁵Yan minikagi se doma tinoledaan diyà ki Tomas, “Migpekità se Pengolo kenami.” Meneng minikagi si Tomas, “Eked a pemenal te neantay sikandin lekat te nematay singed aw onà ko kitaen se palì te lansang diyà te belad din, aw isawol ko se intetodò ko diyà te awang niyan, aw ilamen ko heman se kilid din.”

²⁶Penga te sebad simana, todà netipon se menge tinoledaan i Jesus doton te balay, aw kidoen heman si Tomas doma dan. Netakep se lelebangan, meneng pegketà dimateng si Jesus timindeg diyà te tengà-tengà dan, aw minikagi, “Ibeg ko melinaw se pedowan niyo.”

²⁷Penga niyan, minikagi sikandin diyà ki Tomas, “Soli se intetodò no dini. Tengtengi se belad ko. Ilami heman se kilid ko. Ikà egdowa-dowa, meneng pemenal ka kanak.”

²⁸Meneng olò minikagi si Tomas, “Sikona se Pengolo ko. Sikona se Timanem ko.”

²⁹Minikagi si Jesus, “Nemenal ka den so kimità ka den kanak. Meneng labi pa meluba se menge otaw memenal pengkey wedà dan kità kanak.”

³⁰Medita pa se kepelahan ininang i Jesus kinità te menge tinoledaan din, meneng wedà ko solati se kedita niyan diyà te libro seini.