Juan 11

1

2

3

4

5

6

7

8

9

10

11

12

13

14

15

16

17

18

19

20

21

¹Mülerkey kiñe kutrankülechi wentru Lasaru pingelu, Betania waria mew Maria ka Marta ñi lamngen.

²Fey tüfachi Maria, Lasaru ñi lamngen, tati domo ürke tukulelfilu perfume Ñidol tañi namun mew, ka piwümeltufilu kisu ñi tünay longko mew.

³Femngechi tati epu lamngenwen feypifalfi engu ta Jesus: —Ñidol, eymi tami weni ta kutranküley.

⁴Jesus, kimlu tüfachi dungu, feypi: —Tüfachi kutran ta rumel langümlayaeyew, welu kümeay tañi pengelngeael Ngünechen ñi fütra pepiluwün, ka femngechi ta Ngünechen ñi Fotüm tañi fütra pepiluwünngen.

⁵Jesus rume piwkeyeniefuy ta Marta ka Maria ñi domo lamngen ka Lasaru,

⁶welu feypingelu ta Lasaru ñi kutrankülen ka mülewerkey epu antü chew ñi mülepuelchi lelfün mew.

⁷Feymew wüla feypifi kisu ñi pu disipulu: —Ka kiñe rupa amuiñ ta Judea mew.

⁸Ti pu disipulu feypieyew: —Kimeltufe, newe chumül müten nga tati pu judiu mülelu üyechi trokiñ mapu mew, ayüfuy engün tami langümafetew re kura mew. ¿Ka wiñome küpa amuymi ta üyew?

⁹Jesus feypi: —¿Feyngelay anta antü ñi nien ta mari epu ora? Fey kiñe che miyawiyüm ta antü ñi pelon mew, mutrurkelay, fey peniefilu am ta pelon ñi mülen ta tüfachi mapu mew.

¹⁰Welu kiñe che miyawle ta pun, mutrurafuy, fey am nienolu ta pelon.

¹¹Ka amul feypiley: —Taiñ weni Lasaru ta dew umawtuy, fey amuan tañi trepelmetuafiel.

¹²Fey ti pu disipulu feypieyew: —Ñidol, fey kisu küme umawkülele, kisu mongetuay.

¹³Welu tüfey ñi feypiel ta Jesus fey ñi dew lan ta Lasaru, welu ti pu disipulu rakiduamingün ñi dungumeken re tati umawtun mew.

¹⁴Feymew Jesus fente küme feypi wüla: —Lasaru ta dew lay.

¹⁵Fey iñche rume ayüwkülen tañi mülenon mew ta üyew, fey femngechi doy kümelu am ta eymünngealu tamün feyentuael. Welu amuiñ taiñ pemeafiel.

¹⁶Feymew Tomas, tati epuntun pingelu, feypifi ti kakelu pu disipulu: —Iñchiñ ka amuaiñ taiñ layael Jesus iñchiñ.

¹⁷Fey Jesus puwlu, kimpuy meli antü ñi dew rüngalngen ta Lasaru.

¹⁸Betania waria mülerkey Jerusalen ñi fülpüle kiñe küla kilometro,

¹⁹fey rume fentren judiu longkolelu amurkey engün ñi witranngemeael ta Marta ka Maria mew, tañi yafüldungumeafiel ñi lan mew kisu engu ñi lamngen.

²⁰Feymew Marta kimlu ta Jesus ñi fülpan, tripay ñi llowmeafiel, welu Maria mülewey ruka mew.

²¹Fey Marta feypifi ta Jesus: —Ñidol, eymi mülekefulmi tüfa mew, iñche ñi lamngen lalayafuy.

²²Welu iñche kimnien fachantü Ngünechen ta eluafeymew tami ngillatufielchi dungu.

²³Jesus llowdungueyew: —Eymi tami lamngen ta wiñomongetuay.

²⁴Marta feypi: —May, dew kimnien tañi wiñomongetuael, feychi tati pu la wiñomongetule ti afaelchi antü mew.

²⁵Feymew Jesus feypieyew: —Iñche mew müley ta wiñomongetun ka tati mongen. Tati feyentulu iñche mew, tunte lallefule rume, mongetuay.

²⁶Fey kom tüfeychi petu mongelelu ka feyentulele iñche mew chumkawnorume lalayay. ¿Feyentuymi kay tüfachi dungu?

²⁷Marta feypi: —May, Ñidol, iñche feyentun eymi tami Cristongen, Ngünechen tañi Fotüm, tati felelu ñi küpayael ta mapu mew ―pi.

²⁸Fey dew feypilu tüfachi dungu, Marta amuy ñi mütrümafiel ñi lamngen Maria, fey ellka feypifi: —Tati kimeltufe ta mülepay tüfa mew ka ‘küpape’ pieymew.

²⁹Fey pürüm ka müten allkülu, Maria witrapüray ka amuy ñi pemeafiel ta Jesus.

³⁰Jesus petu konpurkelay tati waria mew, mülerkey ti lelfün mew chew ñi pewün ta Marta engu.

³¹Fey pengelu Maria ñi witrapüran ka ñi rume matu tripan, fey ti pu judiu mülepalu kisu ñi ruka mew, tañi yafülpapeetew, inaeyew, rakiduamlu engün am ñi amuael ta Maria ti küfwe mew ñi ngümameael.

³²Feymew puwlu Maria chew ñi mülemum ta Jesus, lukunagpuy kisu ñi namun püle, fey feypi: —Ñidol, mülekefulmi tüfa mew, iñche ñi lamngen lalayafuy.

³³Jesus, ka femngechi pefilu ti pu judiu ñi ngüman puwyelu Maria engün, rume fütra kutrantupiwkey ka weñangkünagi,

³⁴feymew ramtufi: —¿Chem eltun mew elmefimün? Fey feypingün: —Küpange, Ñidol, tami peafiel.

³⁵Fey Jesus ngümay.

³⁶Feymew ti pu judiu feypingün: —¡Leliwülfimün, müna piwkeyerkefuy tati!

³⁷Welu kiñekentu ti pu judiu feypiyey: —Tüfa nga peloltufi tati pu trawma, fey ¿pepilpelayafuy may ñi lanoafel ta Lasaru?

³⁸Jesus, ka wiñome rume fütra müleweduamkülewey, fey fülkonpuy ti küfwe mew. Kiñe lolo ürke, fey ñi konwe takulerkey kiñe kura mew.

³⁹Jesus feypi: —Kiñe püle nentufimün ti kura. Marta tati la ñi lamngen feypi: —Ñidol, dew wesa nümüpelay tati, meli antülu am ñi tukukünungeel küfwe mew.

⁴⁰Jesus llowdunguy: —¿Feypipelaeyu ama, eymi feyentulmi, peaymi ta Ngünechen ñi fütra pepiluwün?

⁴¹Fey kiñe püle nentungey ti kura. Jesus lelipüray wenu mapu, fey feypi: —Chaw Ngünechen, mañumtueyu eymi am allkütuñmakefiel ñi ngillatun.

⁴²Iñche kimnien rumel tami allkütukefiel, welu feypieyu tañi küme nor duamam tüfachi pu che mülelu tüfa mew femngechi ñi feyentuael engün eymi tami werküfiel.

⁴³Fey dew feypilu tüfa, wirari: —¡Lasaru, tripatunge tüfey mew!

⁴⁴Fey ti dew lafulu tripapatuy, ñi epu kuwü ka ñi epu namun trariley kiñe pañu mew ka ñi ange munulküley kiñe safana mew, fey Jesus feypi: —Nentupürolfimün ka elufimün ñi amutuael.

⁴⁵Fey Lasaru ñi wiñomongetun mew, feyentuy rume fentren pu judiu longkolelu tati amuyelu ñi yafülmeafiel ta Maria, fey pefilu engün am ñi femün ta Jesus.

⁴⁶Welu kakelu pu judiu, tati feyentunolu, amuy engün ta Jerusalen ñi pemeafiel ti pu farisew, fey nütramelpufi engün ta Jesus tañi femün.

⁴⁷Feymew ti pu farisew ka ti pu longkolelu tati pu saserdote mew, trawülfi engün tati longkolechi putrem fütake judiu, fey feypifingün: —¿Chem chumaiñ am? Tüfachi wentru ta femmekey rume fentren afmatufalchi dungu.

⁴⁸Fey elukünufiliyiñ ñi femmekeael ti afmatufal dungu itrokom che feyentuay kisu mew, fey ti pu romache ñi awtoridad küpayay engün ka teyfükayafingün taiñ ngillatuwe ruka ka langümafi kom che mülelu taiñ trokiñ mapu mew.

⁴⁹Feymew ta kiñe kisu engün, Kayfas pingelu, fey tüfa wünen longkolerkey pu saserdote mew tüyechi tripantu, fey Kayfas feypieyew engün: —Eymün ta kimlaymün chem no rume.

⁵⁰Ka ngüneduamkelaymün rume tañi doy kümeael eymünngealu ñi layael kiñe wentru müten tati waria che mew, welu tañi lanoael kom che mülelu taiñ trokiñ mapu mew ―pi.

⁵¹Welu Kayfas feypilay tüfa re kisu tañi ngünewün mew, fey kisu am longkolerkelu ti pu saserdote mew tüfeychi tripantu, famngechi feypi Ngünechen tañi femngechi rakiduameletew, Jesus tañi layael tati pu judiu ñi trokiñche mew.

⁵²Fey tüfachi trokiñche mew müten ürke no, welu may ka femngechi tañi trawültuafiel itrokom ta Ngünechen ñi pu yall tati kom chüf mapu mülelu.

⁵³Feymew tüyechi antü mew müten tati longkolelu pu judiu mew adkünuyngün ñi langümafiel ta Jesus.

⁵⁴Feymew ta Jesus doy miyawelay ti longkolechi pu judiu ñi adkiñ mew. Tripatuy ta Judea trokiñ mapu mew, fey amutuy kiñe lelfün mülelu tati uwe mapu mew, kiñe waria mew Efrain pingelu. Üyew mülewepuy kisu ñi pu disipulu engün.

⁵⁵Pülleleparkey dewma ti pu judiu ñi Paskua kawiñ antü, fey rume fentren che müleyechi waria mew amuyey ta Jerusalen ñi müngeltuafiel femngechi ñi wüne femael tati wimtun liftuwün dungu petu ñi akunon ta Paskua kawiñ.

⁵⁶Miyawürkey engün ñi kintuyawülfiel ta Jesus, fey welukonke ramtuwingün ti ngillatuwe ruka mew: —¿Chem pimün kay? ¿Küpapeay may tüfachi kawiñ mew kam femlayay chey?

⁵⁷Fey ti pu farisew ka ti pu longkolelu ti pu saserdote mew feypikünufi ti pu che femngechi tañi feypiael iney rume kimle chew ñi mülen ta Jesus, femngechi tañi püresuafiel engün.