Josua 6:9-26

⁹Ma siŋwaga tolaukasap sêsêlêŋ sêmuŋ dabuŋwaga, taŋ sêjac dauc kêtaŋ ŋapaŋ.

¹⁰Ma Josua kêjatu lau gebe “Anam lasê atom, anam taôm tôŋgeŋ, asôm biŋ teŋ êsa awemsuŋ atom e êndêŋ bêc aê jasôm êndêŋ amac gebe Anam lasê, go anam lasê.”

¹¹Amboac tonaŋ eŋ kêsakiŋ Apômtaunê katapa kêgi malac tau auc kêtu dim tageŋ. Su, go sêô lasê gamêŋ becoboŋa kêtiam ma sêc bêc aŋga tonaŋ.

¹²Gêdêŋ bêbêc kanucgeŋ Josua gêdi sa ma dabuŋwaga sêbalaŋ Apômtaunê katapa.

¹³Ma dabuŋwaga 7 sêkôc dauc 7 sêsêlêŋ sêmuŋ Apômtaunê katapa ma sêjac dauc ŋapaŋ. Ma siŋwaga tolaukasap sêsêlêŋ sêmuŋ êsêac ma lau ŋagêdô têdaguc Apômtaunê katapa, ma dauc kêtaŋ ŋapaŋ.

¹⁴Ma gêdêŋ bêc kêtu luagêcŋa êsêac sêsêlêŋ sêgi malac auc kêtu dim tageŋ amboac tonaŋgeŋ ma sêmu sêja gamêŋ becoboŋa. Sêgôm amboac tonaŋ kêtôm bêc 6.

¹⁵Gêdêŋ bêc kêtu 7ŋa êsêac dêdi gêdêŋ geleŋ mata ma sêsêlêŋ sêgi malac auc amboac sêgôm-sêgôm kêtu dim 7. Gêdêŋ bêc tageŋ tonaŋgeŋ tec êsêac sêsêlêŋ sêgi malac auc kêtu dim 7.

¹⁶Ma gêdêŋ taŋ sêgi malac auc kêtu dim 7ŋa ma dabuŋwaga sêjac dauc kêtaŋ naŋ, Josua kêsôm gêdêŋ lau gebe “Anam lasêmaŋ, gebe Apômtau kêkêŋ malac tau gêdêŋ amac.

¹⁷Ma malac to ŋagêŋ samob êtu Apômtaunê gêŋ enseŋ suŋa. Mockaiŋo Rahab to nê lau samob, taŋ sêmoa sêwiŋ eŋ aŋga ênê andu naŋ, tauŋgeŋ go sêmoa mateŋ jali, gebe eŋ gêsa lau jaeŋŋa, taŋ aêac tasakiŋ êsêac naŋ auc.

¹⁸Ma amac ajop taôm êndêŋ gêŋ, taŋ gêjac anseŋ suŋa ŋawae. Matem katu gêŋ tau e akôc ŋagêdô, taŋ kêtu Apômtaunê naŋ, su atom. Embe aŋgôm, go lau Israel nêŋ gamêŋ becoboŋa êwê kaiŋ biŋ, taŋ êtap malac Jeriko sa naŋ, êwiŋ ma êtap gêŋwapac ŋanô sa.

¹⁹Ma silber to gold samob ma laclu, taŋ sêmasaŋ ŋa ki kokoc to jejec naŋ, êtu Apômtaunê gêŋ dabuŋ naêsêp Apômtaunê kanom.”

²⁰Amboac tonaŋ lau sêjam lasê ma sêjac dauc kêtaŋ. Gêdêŋ taŋ lau sêŋô dauc kêtaŋ naŋ, sêjam lasê ma tuŋbôm kêku sa, ma lau sêpi malac sêja. Lau samob gacgeŋ sebo sêsa malac sêja ma sêku malac tau tulu.

²¹Go seseŋ malac samucgeŋ su. Êsêac seseŋ ŋac to awê ma lau matac to lau ŋanô, seseŋ bulimakao to domba ma doŋki. Êsêac seseŋ gêŋ samob su ŋa siŋ ŋamata.

²²Ma Josua kêsôm gêdêŋ ŋaclagêc, taŋ sêkêŋ keleŋ gamêŋ naŋ, gebe “Asô awê mockaiŋo nê andu ana ma akôc awê tau to nê lau samob, taŋ sêmoa sêwiŋ eŋ naŋ, sêsa sêmêŋ amboac atôc lemem gêdêŋ eŋ naŋ.”

²³Amboac tonaŋ ŋac wakuc luagêc tau, taŋ sêkêŋ keleŋ gamêŋ naŋ, sêsô andu sêja ma sêkôc Rahel to têna agêc tama ma lui to nê lau samob, taŋ sêŋgôŋ sêwiŋ eŋ naŋ, sêsa sêmêŋ. Êsêac sêkôc ênê lau samob ma sêkêŋ êsêac sêŋgôŋ lau Israel nêŋ gamêŋ becoboŋa ŋamagê.

²⁴Ma êsêac sêkêc malac to ŋagêŋ samob ja geŋ. Tageŋ silber to gold ma ku, taŋ sêmasaŋ ŋa ki kokoc to jejec naŋ, sêkêŋ jakêsêp kanom, taŋ kêkô Apômtaunê andu naŋ.

²⁵Josua gêjam awê mockaiŋo Rahab to tamanê gôlôac ma nê lau samob, taŋ sêwiŋ eŋ naŋ sa. Eŋ gêŋgôŋ lau Israel ŋalêlôm e mêŋgêdêŋ galoc, gebe eŋ gêsa lau jaeŋ, taŋ Josua kêsakiŋ gebe sêkêŋ keleŋ malac Jeriko naŋ auc.

²⁶Gêdêŋ têm tonaŋ Josua kêjatu lau gebe têtôc lemeŋ sêkô Apômtau laŋônêmŋa ma kêsôm gebe “Aêac tapuc boa ŋac, taŋ êndi mêŋêkwê malac Jeriko tonec sa êtiam naŋ. Eŋ ênac da alê ŋamataŋa ŋa nê ŋacsêga. Ma ênac da malac ŋakatam ŋa nê ŋac sauŋ.”