1 Eme Judare guru garikiŋfâc‐jeŋic jaŋere sâc mâreŋ rukec qajarepie qaŋeŋne Edom mâreŋko fisiwec. Ehuc Ziŋ mâreŋ burocne juwic jâmbâŋ hurâ rawec.
2 Eme jaŋere ma i juwic Hâwec Hâmocne tataranao hâwec raʒikicne fokac irecnec fuŋkerâ mâreŋ juwicpec rawec.
3 Erâ mâreŋ juwicpec jaha raku Akerabim heâŋ fotâcnerâ Ziŋ mâreŋko fisiwec. Ehuc Kadesi‐Baranea juwicpec Hezoroŋ haeopec feraku Adari haeo fisiwec. Ehuc bâŋorierâ Karaka haeo fisiwec.
4 Erâ raku Azamoŋ haeo fisirâ fotâcnerâ Aigita opâopec raku hâwecko mickewec. Izi hâcne mâreŋ juwicpec irec majeŋic ewec.
5 Eme ʒoaŋ wewefunaopec irec ma ine Hâwec Hâmocne qacnerâ feraku Jordaŋ micnao fisiwec. Â mâreŋ faicpec irec ma ine Jordaŋ micnao hâwec raʒikicne irecnec ferawec.
6 Eme ma izi Bete‐Hogela haeo fisirâ fotâcnerâ Bete‐Araba hae faicnao fisiwec. Erâ feraku Rubeŋte ŋokâ Bohaŋ ere qânâ ŋewecko fisiwec.
7 Erâ Akoro wâneŋkopec feraku Debiri haeo fisirâ faicpec jaha raku bâŋorierâ Giligali haeopec rawec. I Adumin heâŋ‐ticne irec ŋifecnao juwicpec wâneŋ forakac izi ma ewec. Eme ma i ʒuhuckerâ raku Eŋ‐Semesi opâo fisirâ fotâcnerâ raku Enerogele haeo mickewec.
8 Erâ ʒuhuckerâ feraku Hinom ŋokâ‐ticnere wâneŋ fotâcnerâ Jebusi ŋic jaŋere tikio Jerusalem hae ŋewec irec tapine juwicpec fisiwec. Erâ feraku tiki botâŋnao fisiwec. Tiki izi ine Hinom wâneŋ ʒoaŋ huhunaopec foha faicpec Refaim wâneŋ mickekacko ŋewec.
9 Eme tiki botâŋnaonec ʒuhuckerâ raku Nefitoa opâ ʒâŋeo fisiwec. Eme irecnec raku Eforoŋ tiki irec hae ŋerawecko fisiwec. Eme irecnec ŋehasickerâ Bala hae, Kiriati‐Jearim hâcne, ira fisiwec.
10 Eme Bala haeonec ʒoaŋ huhunaopec ŋehasickerâ Seiri tikio fisi fotâcnerâ raku faicpec Jearim tiki, Kesaloŋ hâcne, irec ombâŋnao fisiwec. Ehuc Bete‐Semesi haeo hurâ Timina haeopec rawec.
11 Erâ mazi faicpec tiki ombâŋnao fotâcnerâ raku bâŋorierâ Ekoroŋ haeo fisiwec. Erâ raku Bala tikio fisi fotâcnerâ Jabinele haeo rawec. Erâ raku hâwecko mickewec.
12 Eme ʒoaŋ huhunaopec ine Hâwec Sâko qacnerâ ferakac izi majeŋic ewec. Eme i hâcne Juda guru garikiŋ‐jeŋic sâc mâreŋ majeŋic ewec.
13 Wofuŋzi Josua mutâcnecnewec irec sâcko Jefune ŋokâ‐ticne Kalebe Judare guruo mâreŋ dâkâne moc Arabare hae, Heboroŋ hâcne, i râcnewec (Aroba e Anakare mamac).
14 Eme Kalebezi Anaka ŋokâfâc‐ticne jahec â moc: Sesai, Ahimaŋ â Talamai jaŋe mâreŋ irecnec jopa jâpec ejarewec. Jaŋe Anaka ere ɋâricfâc hâcne.
15 Eme irecnec ine Debiri haere ŋecjucfâc jopaocte rawec. Debiri haere ʒâŋe ine mârâc Kiriati‐Sefe iŋuc fowec.
16 Eme Kalebezi muwec: “Moc e Kiriati‐Sefe ŋic imac‐joparâ hae i rome otâ‐nane Akisa ŋonâŋ‐ticne eocte râcnepemu.”
