Jone 9:15-41

¹⁵Parisi dupwame, Apa pisala embena lenge rapi? lao baa dee kamba piso siyami. Dokopa baame nakama lamaiyuo, Baame nambana lenge dokona awai kisakapyamopa ipwa poeyanyi nembapala kapa kando karo, leya.

¹⁶Parisi lapome, Akali dokome koro petenge mawa pii yalo pelyamo dokona Anatumi baa rombo palyiyande daalamo, leyami. Dopa leyaminyipa lapome, Akali koo pyuo karenge dokome apa pyuo yulu andake dopale lasaka pyuo kararase? leyami. Dopa lao nakama apiyanda piyami.

¹⁷Dokopa nakamame akali lenge kwaeyamo doko kambako piso siyami. Emba baame lenge elya pyakapyamo doko baasa kando embame apa lao suu pilisi? leyami. Baa Anatunya poropeta akali, leya.

¹⁸Akali doko wamba lenge kwaeyamopa kapa kandeya doko Juu wambu dupwame kinyi dopa pipyalyamo lao suu pyaa nayami. Suu pyaa napala akali lenge elya pyakamiya dokona endangi rakangepa dolapo epena lapala

¹⁹piso soo, Nakambana ikinyingi lenge kwaesi manjo nyiyamba letambinyi doko dakese? Epapu baa apa pipala kapa kandelyase? lao piso siyami.

²⁰Banya endangi rakangepame isingi lamaiyuo, Akali dake nambwana ikinyingi lenge kwaesi manjo nyiyamba doko soo karambano.

²¹Soo karambwanopape epapu apa pipala baa kandelyamo lao apimi banya lenge elya pyakamipyape lao nambwa see nalyambanoko. Baa piso selapape. Baa andapae dokome rangeme lara, leyambi.

²²Banya endangi rakangepame Juu wambu dupwa pakapala dopa leyambi. Juu wambu dupwame wambo mendakinya palyuo, Mendeme Yesu baa Koraisa, lara ramo doko baa sinakoke anda epa nana lao ralinyi nembarama leyami.

²³Leyamisa endangi rakangepame dokona pakapala lao, Baa andapae karamo dokona range piso selapape leyambi.

²⁴Dokopa dee kamba akali doko epena lapala baa lamaiyuo, Anatunya kingi lao pii rolae laroŋo lao kingi ketae nembo rolo lape. Akali doko yulu koo pingi doko silyamano leyami.

²⁵Dokopa baame lamaiyuo, Baa yulu koo pingipi mee lao see nalyo. Namba mendaki iki soo karo doko, nambana lenge kwaelyamopa karenge doko epapu kapa karo leya.

²⁶Nakamame baa lamaiyuo, Baame emba apa pyakapyase? Apa pisala embena lenge doko elya pyakapyase? leyami.

²⁷Baame nakama isingi dopa lamaiya. Wamba langyuo kaeyalono kandapi doko nakama nambana pii soo nyakayami. Akipamo nakamame dee kamba semana letamisi? Nakama opetae banya disaepole ingyuo karamwali lao suu pilyamisi? leya.

²⁸Dokopa nakamame baa kilya kandalya kandana pyuo lamaiyuo, Emba banya disaepole, namwa Mosesena disaepole ingyuo karamano.

²⁹Anatumi Mosese pii lamaiya doko soo gisilyamano. Soo gisamwanopape akali dae lao karamo doko anja karo epeya lao see nalyamano leyami.

³⁰Akali dokome dopa lao isingi lamaiya. Pii nangende pyaka selamolyamo. Baa dokome dopa lao isingi lamaiya. Pii nangende pyaka selamolyamo. Baa anja karo epeya lao see namiko doŋo baame nambana lenge elya pyakapya.

³¹Anatumi yulu koo pingi wambu dupwana pii sakami nange. Sakami nalyamopape wambu mendeme Anatu ketae pyambuo yako lao karo baa letamuli pyuo pyuo karara ramo doko Anatumi dokonako pii sakamyuo karenge doko silyamano.

³²Isa yuu doko kanda soo ingiyamo dokopa piso epo wambu mendeme akali lenge kwaesi manjo nyiyaminyi mendena lenge elya pyakamiyami leyaminyi see nange.

³³Akali doko Anatumi rombo palyiyamopa epa nayali doko baame mende kapa pii napyali leya.

³⁴Nakamame baa kando lao, Koo andake pipala emba manjo nyiyami doko embame namwa mana langirisi? leyami. Lapala baa neta nembeyami.

³⁵Baa ramanyi nembeyaminyi doko Yesumi sepala koto kando nyepala baa lamaiyuo, Embame Ikinyingi Akali kapa ingingi lao suu pyao karepe? leya.

³⁶Dokopa baa isingi lao, Rapu Pingi baa apisi lao rolo langyarene dokopa nambame baa kapa ingingi lao suu pyao kararo, leya.

³⁷Yesumi baa lamaiyuo, Embame baa kando karapinyi emba pii langyuo karamo doko leya.

³⁸Baame isingi lao, Kamongo, nambame kapa ingingi lao suu pyao karo, lapala baame Yesu mupwa lao pongwa naro peteya.

³⁹Dokopa Yesumi dopa leya. Isa yuu dakena kote lao rolala epeyo dokome wambu lenge raa nao kareyami dupwame kando soo kararaminyipa lenge rao kareyami dupwa lenge kwaeramo parami leya.

⁴⁰Parisi lapo baa kareyamo dokona repeta kareyami dusipame baa lamaiyuo, Namwa opetae lenge koonde karamase? leyami.

⁴¹Yesumi nakama lamaiyuo, Nakama lenge kwao karo kata rolae kanda namili doko pii mende pali napyali. Nakamame range kando karamano letaminyi dokona yulu rolae kando kaeyo yalo karamisa pilyamo.