Jon 7:6-22

⁶Ijefuon Jesu fu uri una kia, Tavan kafokafo e iji bu iro ikuai afuivo ijia ja tavan kafo vak ga tavan kafo ja arekva iji fun maren. Regavo iviakma naiji na tavan nun iji fuba abedo naba vak.

⁷E moikigia oinva iji ja bu ziegafiakva bakin revo bu na ziegafieknum dab arafiriek. Ijefuon maiji na unam ise bu kegoijo iji na samakaf visume kuardiavo ijefuon bu na ijeg rek.

⁸Ijefuon ni jar iro ijia vaf revo naiji naba vuak. Ijefuon maiji tavan nun iji fuba abenmano kiain.

⁹Fu ijeg kuardiame fun ijia areme Gareri ijia naki sibank fin.

¹⁰Areme Jesuon uviaifijaf iji bun Judia ijia iro iji bu inva ijia vakga Jesu fu rad isuar sauime jajia vain.

¹¹Fu vakgame e Jius e mamkanuk iji bu iro ijia karinva iji bu uri Jesu nisaimoknum e iji afuinva iji kia e iji fu izerkiga nijaiduofno kiain.

¹²Regavo e iji afuinva ijia e roin bu fuisina isuar karine bui kuai e iji fuka e mano kuaiv. Regavo e roin bu kuai e iji fuka e uruvana aferdiame una unam ise ijia nijaidiamno kuain.

¹³Bu dab ijeg fuisina kuaimoin revo buba abe uruvana kuaime samafren ijefuon maiji bu e Jius e mamkanuk iji juin.

¹⁴Rene iro iji bun ine rirkinenva ijia Jesu fun Godon ar ijia aru manine e iji vuak anerene nijaidiam.

¹⁵Fu ijeg nijaidiamga Jius e mamkanuk iji bu gava buka oiserdiamga bu kuai, E iji fu Godon buk akaij ijia vuak akaij iji buba abe fu nijain revo fu izeg vuak ma iji mukoi vierafenmano kuain.

¹⁶Bu ijeg kuaivga Jesu fu una kia, Vuak igi na kuardiavo iji fu nun bakin revo vuak iji fun God Asoij iji fu kiema na ari ruainva ijefuon vuak.

¹⁷E be erar fu Godon vierafenma ijia kegoino e ijar vuak igi na abe kuardiavo iji fur giek. Fu giega na vuak nun nar vierafenva iji abe kuardia vo na Godon vuak abe kuardiavga iji fur gieme vierafek.

¹⁸Regavo e be erar fum vuak fuon fur vierafeno iji abe kuardiaoino iji fu fuon aroinamikro fu iji vierafen. Regavo erar fu vierafe e iji fu kuamga fu ruainma iji abe aroikro fu ijeg vierafeno e iji vuak fuon fu kuaimon iji fuka ma ijesugin ga kufui kafo ijia fuka bakin.

¹⁹Mosis fuka akai uruvana kege ja vajiain gavo e fok guri ja karinva ijia e besum fu erar akaij iji mukoi igiainma bakin. Regavo ja irerafuon ja na kaniekuai nisaidievno kiain.

²⁰Jesu fu ijeg kuardiamga e iji bun uri kume, E gafi ka kaven ise ijar niroinma gafi a erar a kanakvega a iji kuaimno kumen.

²¹Bu ijeg kuardavga fu una kia, Na ire sumakin besum tavan iji ja isuar karine Godon sirimamejo ijia reja ja gieva jaka oiserdiain.

²²Regavo iviakma ja Mosisri akaij iji surif kania ufu anf navo iji miainma ijefuon ja ijin ijeg keg. (Regavo unam iji bu saifjon ijieb ijeg kege ruain revo Mosis akai fu rad isoime ke vajiain). Ja am ukakna ijiebuon surif iji ja kania ufu anf navo iji fu tavan akaij iji guf ijekma ja iji jaika vierafekva bakin. Ijefuon vo ja irerafuon e adagin gafi na tavan iji ja isuar karine God sirimamejo ijia amarva fu mainma ijefuon una oij isema na vierafeknum jaka ziemoij.