Jon 6:8-59

⁸Ali anudak ananu Jisas ananinamu disaipel Andru douk nanu Saimon Pita amam sanyowan uli nakli,

⁹“Ananu chokunali neyotu agundak uli douk noluk bias chokusi yelbus sanu 5-poleitu chokutali balitu bret. Ali echebuk douk chopuk eke chunek moneken gipiya umu echudak wolobaichi elpech?”

¹⁰Ali Jisas naklipapu nakli, “Klipech chupe atap.” Agnabuk douk wolobaipi wichap patoglu ali chanatimaguk chabih chape. Wolobaichumali, almam atum umu douk hanubu wolobaimi 5,000-poleim.

¹¹Douk chabih chapemu julug, ali Jisas nohul bret nahwotu nenek tenkyumu God ali nape neyaisatu nekech. Neyaisatamech umu julug, ali asudak bias yelbus douk nosuhul nenek namudak ati. Ali echech chanatimaguk chachah aliga dugolech uli atich.

¹²Douk chanatimaguk dugolech ali naklipu ananipu disaipel nakli, “Putulich putalmu bret douk chatawah ali tenek lep takus uli. Kobi mutiteh anagunitamu tukusuk meyoh, wak.”

¹³Memnek namudak ali matalmatu motoluk 12-poleig basketog ali chichuknig atimu tutukanitamu atudak 5-poleitu balitu bret douk echudak wolobaichi elpech chanu batowich chatawah ali tenek lep takusuk uli.

¹⁴Douk echudak elpech chatik enyudak God atunu neneken uli moul douk anan Jisas neneken uli ali chakli, “Aduligu atugu, anudak alman douk anudak profet God naklimu eke nukaganu nunamali apudak atap uli.”

¹⁵Jisas natulich ali anadukemech umu echech ahalakatimu eke chunaki didigep pupe chuhwanu ali chunekanu nupe echechinu king. Namudak ali natukemechuk anan atunu nanak nalto maunten.

¹⁶Douk aliga wabigun ali ananipu disaipel maitak maglumu enyudak raunwara.

¹⁷Mabih malto anatu bot ali mablo manak umu makli munamu wabul Kapaneam. Ababuk nyultab douk ayowab, wakuli Jisas douk watak nunaki nutoglomapu e, watak.

¹⁸Ali ababuk nyultab, nebenali wihun douk nalu nohul yous nebebi molub batuk ali yous yoweg.

¹⁹Apak eke amonek pul manak 5 o 6 kilomita lougun umu algas ali nameitamu Jisas nalaheli chihahibal umu abal nanaki halakatimu bot. Douk matik namudak ali manubu elgeipu.

²⁰Ali Jisas naklipapali nakli, “Kobi elgeipu, wak. Enyudak douk yek Jisas wo.”

²¹Douk memnek ali monehilawomu mulawanu nulto bot. Ali ahudak atuh matik umu bot atanak tatoglu gani woblahah enyudak raunwara douk apak mape monek pul manak umu.

²²Wehluwih ali echudak wolobaichi elpech douk wata chape gani woblahah enyudak raunwara. Chadukemech umu nabatik wak anatu alagun bot tulu agnabuk e, wak. Atutu meyoh talu ali douk ananipu disaipel atupu malto monek pul manak. Jisas wo nunamapu munak e, wak.

²³Ali ababuk nyultab, onog botog gwalali wabul Taibirias uli douk gwanak gwatogloli. Gwatogloli halakatimu agundak douk Jisas nenek tenkyumu God umu bret ali noku echudak elpech chatawah umu.

²⁴Douk echudak elpech chatik umu Jisas nanu ananipu disaipel wo mupe agnabuk e, ali chabih chalto ogudak botog chanamu Kapaneam umu chutimu Jisas agnabuk.

²⁵Douk aliga chanak chogwatanu gani woblahah-inyumu enyudak raunwara ali chaklipanu chakli, “Nebenyali Tisa, makwnih nyanaki agundak?”

²⁶Ali Jisas nebemech balan nakli, “Aduligu atugu yaklipepu, ipakip ulkwip douk wo pulomu enyudak yeneken uli nebenyi moul olsem anagu mak yek yagilapepamu ali dakio panaki patime e, wak. Ipak douk pawak bret chuknipu atipu ali pape patimemu douk namudak.

²⁷Kobi pupe punek moul umu echudakmali kakwich douk eke pichah ali chunak chuwichuk uli, wak. Wakuli ipak imas punek moul umu putimu echudak enech kakwich douk eke pulawech ali eke chunekepu pupe kalbu eheh nyumneh uli. Echudak kakwich douk yek Anudak Alman douk yatoglu aduligeinyi elpen uli eke ikepeyech. Umu moneken, Aninu God douk aneke namba ali naklipe wasik umu inek enyudakmali moul.”

²⁸Namudak ali chasolikanu chakli, “Ali apak eke munek moneken, umu God nutulupu ali nukli wasik nunehilau-mapamu?”

²⁹Ali naklipech nakli, “Moul douk God naklimu puneken uli douk enyudak. Anan douk nakagasi yek yanaki, ali nakli ipak imas pusuh yekin balan dadag pugipechen.”

³⁰Namudak ali echech wata chasolikanu chakli, “Eke nyunek moneken God atunu neneken uli moul umu apak mutulin ali munek bilip umu nyakin balan? Eke nyunek moneken?

³¹Apakich yamech douk chawak atudak bret mana gani wohigunmu elpech wak umu. Chatawah kobi God ananin balan nyetemu ananik buk uli nyaklimu. Nyakli namudak. ‘Anan nekech bret tabihi iluh heven uli chatawah.’”

³²Jisas nemnek ali naklipech nakli, “Aduligu atugu yaklipepu, atabuk bret tagluki iluh heven uli douk wo Moses nukepeyatu e, wak. Yekinu Aninu nekepu atudak aduligeitu bret douk tagluki iluh heven uli.

³³Bret douk God nekepeyatu uli douk tatukemaguk iluh heven ali taglukumali tugakomu apudak atapipali elpech umu pupe kalbu eheh nyumneh.”

³⁴Ali echech chaklipanu chakli, “Nebenyali, apak makli nyak nyupemu nyukapu atabukmali bret wihluwehlu.”

³⁵Ali Jisas naklipech nakli, “Yek douk atudak bret douk eke chulawatu ali chupe kalbu eheh nyumneh umu. Echebuk douk chunamali yek ali chusuh yekin balan chugipechen uli, echech eke kobi wata nyulub blech o wata abal blugahegech chopuk, wak.

³⁶Wakuli douk ayaklipepu, ipak douk apatuliwe wakuli wo pusuh yekin balan dadag pukli adulin e, wak.

³⁷Ihech elpech douk yekinu Aninu natalihech umu chunamali yek uli eke chunameli. Echebuk douk chunamali yek uli, yek eke kobi inoguglech ikechuk agab, wak meyoh.

³⁸Yek douk wo itukemaguk iluh heven ali iglukumali igipech yekin laik inek enenyi enen moul kobi yek ulkum molomen ulimu e, wak. Wakuli douk yanakumali igipech yekinu Aninu douk nekege yanakili ananin laik.

³⁹Ali anan nekege yanakili naklimu ineken uli douk enyudak. Nakli kobi itukemaguk enen echudak chanatimaguk elpech douk anan natalihech umu chunamali yek uli nyunak nyuwichuk, wak. Wakuli nakli yek imas ilukwech yapis chunatimaguk ali wata ichuhul chitak chupe abudak nyultab hugikuk uli nyumnah hutoglomu.

⁴⁰Aduligu, yekinu Aninu nakliyenyi douk akenyudak. Nakli chunatimaguk elpech douk chutik yek ananiwe Nuganinu ali chusuh yekin balan chugipechen uli, echech douk eke chunubu chupe kalbu eheh nyumneh. Ali douk eke wata ilukwech yapis ichuhul chitak chupe ahudak hugikuk uli nyumnah hutoglomu.”

⁴¹Echech Juda chemnek nyihihichich ali achape cheneyagwleh chokwin atin, umu agundak Jisas nakli anan douk atudak bret tagluki gani iluh heven ulimu.

⁴²Namudak ali chakli, “Anudak alman anan douk Josep ananinu nuganinu chohwalanamu Jisas uli. Ananich mamechich douk madukemech. Ali malmu namudak, umu dukwechuk nakli anan douk napeli iluh heven naglukumali?”

⁴³Jisas nemnek ali nebemech balan nakli, “Ipak kobi nyihihichipu ali ipak yet pupe piyagwleh balan punobomu chokweh pulikuk, wak.

⁴⁴Wak enen elpen deke nyunokwnumu nyunamali yek e, wak. Sapos Aninu douk nakagas yek yanakili nuhul enyebuk elpen ele, enyen wasik deke nyunamali yek ali nyusuh yekin balan nyugipechen. Ali enyebuk elpen, yek douk eke wata inyuhul nyitaki iwagu ahudak hugikuk uli nyumnah hutoglomu.

⁴⁵Balan douk amam profet henyemu nyetemu God ananik buk uli douk nyakli: ‘God eke nunek skulumu ihech elpech ananin pasin.’ Namudak ali chunatimaguk elpech douk chumnek Aninein balan ali chudukemen kalbaluli, echech eke chunamali yek.

⁴⁶Wak enen elpen nyutik Aninu e, wak. Yek douk yanu God wapeli ali yaitak yanakili otuwe yatulunu.

⁴⁷Aduligu atugu yaklipepu, echebuk elpech douk chusuh yekin balan chugipechen uli, echech douk eke chupe kalbu eheh nyumneh.

⁴⁸Yek Jisas douk atudak bret douk elpech eke chulawatu ali tunekech chunubu chupe kalbu eheh nyumneh ulimu.

⁴⁹Seiwak ipakich popech yamech douk chawak atudak bret mana gani wohigunmu, wakuli echech douk wata chagak.

⁵⁰Wakuli elpech douk chuwak atudak aduligeitali bret douk tatukemaguk iluh heven taglukili, echech douk eke kobi chugak, wak.

⁵¹Yek yet douk atudak aduligeitu bret douk tagluki gani iluh heven umu eke tunek elpech chupe eheh nyumneh uli. Elpech douk chuwak atudak bret uli eke chunubu chupe kalbu eheh nyumneh. Atudak bret douk yekihw yegenyihw. Eke ikech yekihw yegenyihw umu igakamu chanatimaguk apudak atapichi elpech umu chupe kalbu eheh nyumneh.”

⁵²Douk echech Juda chemnek namudak ali nyihihichich. Ali echech yet achape chalpak balan chakli, “Anudak alman nakli deke nukapu ananihw yegenyihw muhwah malmu?”

⁵³Ali Jisas naklipech nakli, “Aduligu atugu yaklipepu, sapos ipak kobi puwak yek Anudak Alman douk yatoglu aduligeinyi elpen uli yekihw yegenyihw o puwak yekig butog umu, ipak eke kobi pupe kalbu eheh nyumneh, wak.

⁵⁴Wakuli echebuk elpech douk chuwak yekih yegenyihw hwunu yekig butog uli, echech eke chupe kalbu eheh nyumneh. Ali ahudak hugikuk uli nyumnah hukli hutoglu abali, yek douk eke wata ichuhul chitak chupe.

⁵⁵Umu moneken, yekihw yegenyihw ohwohw douk hwanubu kobi aduligeichi kakwich umu. Yekig butog ogwog douk chopuk gwanubu kobi aduligeibal abal umu.

⁵⁶Echebuk elpech douk chuwak yekihw yegenyihw hwunu yekig butog uli, echech douk chape yek ali yek yape echech.

⁵⁷Yekinu Aninu douk nanubu bawagas umu agundak chupe kalbu eheh nyumneh ulimu douk nakagasi yek yanaki. Ali yek douk yape dodogowiwemu anan ali eke inubu ipe eheh nyumneh. Ali douk namudak ati. Yek douk dodogowiweli ali echebuk douk chuwak yekihw yegenyihw uli, yek douk eke inekech chunubu chupe kalbu eheh nyumneh.

⁵⁸Yek douk atudak bret douk tagluki gani iluh heven uli. Atudak bret douk wo kobi atudak seiwak ipakich yamech chatawah wakuli echech wata chagak ulimu e, wak. Elpech douk chuwak atudak bret uli, echech eke chunubu chupe kalbu eheh nyumneh.”

⁵⁹Jisas naklipech enyudak balan abuldak wabul Kapaneam. Naklipechen abudak nyultab nape nenek skulumech yopinyi balan gani numun echechitu chape cheyagwleh balan atali wilpat abali.