Jon 4:9-22

⁹Urik simu mbara, �Mir Judama mir, an Samariak fehe nir. Mberem ushiwak uksemben a hanak mi akmbaha mi mbandu? Jir Judama mbeek nir Samariak fehenda nga nakrem ni anda ambu nir.�

¹⁰Urik ormu mbara, �Nyir mbeek yariwa ambu nyir, lawe or uksembenjik nyirin silindu. Uhu nyir mbeek mbele jivi las os Avui Wasilaka nyirin hakwak or mbawan hishiyariwa ambu nyir. Os nyi yariwakop am nyi mba, �Wa, uksembe ermba ermbak linda oso kas anin hanak a aka.� Karem mbawa nyir.�

¹¹Urik simu mbara, �Wasilaka, uksembe oson mbeyok mi laku? Mir baket nga nawa ambu mir. Ukwa toso kasalkop nanda sir.

¹²Misumu nihi Jekop maskop or korondari ukwa tosira. Or nga jikisi orhi nga bulmakau, sipsip orhi nga li uksem andari mishi tosira. Hako mir am orin tikrindahik nanda om? Karem mimu hishindu?�

¹³Karem si mbarik ormu mbara, �Ma ol uksembe toson awa ondo jekapnashi lihi hatlayinak indik uksem akwak mbakwa ola.

¹⁴Hako ma ol uksembe os an hanak akwak a mbawa ma ondo mbeek indik uksem akunak mbakwa ambu lir, wahau. Uksembe os a hawa oso avak sungu lihik ukwa hom si nanak ermba ermbak linda oso avak lihik nakwa sir.�

¹⁵Urik simu mbara, �Wasilaka, uksembe oson anin hanak a aka. Uhundanak indik torok ukun a tarmukmbaha a rakwa ambu nir.�

¹⁶Urik Jisas mu mbara, �I hula nyihin sawe laha torok shi raka.�

¹⁷Urik simu mbara, �An mbeek hula ngashi ambu nir.�

¹⁸Urik ormu mbara, �Ome sira, nyir hula nyihi tostava hom nandari lir. Hako ma or ter nyi liwa oto mbeek hula nyihi ambu ri.�

¹⁹Urik simu mbara, �Wasilaka, ter amu heyenduwa. Mir profet lar mira.

²⁰Hako anin sawenak a misi, mberem ushiwak jir Judama karem ji mbandu, os ma lal Avui Wasilakan li lotu uku nahi, wa Jerusalemkop li tirsaha li lotu uka, karem ji mbandu? Hako nir Samariak fehenda neloko walanga nihik sishi raha ter nga os Avui Wasilakan ni lotu ukwa wolo telemba Gerisim orokop ni tirsaha ni lotu unda nir. Hako mir mberem mi hishindu?�

²¹Urik ormu mbara, �Omendingak nyirin amu sawenduwa, kumak os Avui Wasilakan ji lotu ukmbaha ji hishi nahi, yanga yanga os ji liwa mishi orokop orin lotu ukwa jira, telemba orok nembes, Jerusalemik nembes.

²²Avui Wasilaka or Masikome ria. Karem uwosik ma ol orin lotu ukmbaha hishiwa ma ondo Masikome orhi nga mbele mbele omekop nanda nga orin omendingak li lotu uka, yanga yanga os li liwa mishi orok. Ma ol or mbawa nombo orok orin lotu uwa ma ondon rupshinda ri. Hako jir Samariak fehenda mbeek ma or ji lotu undan heyenda ambu jir, wahau. Men lotu unda jir. Hako nir Judama God or ni lotu undan angop ni heyenda ri. Angop maskop Avui Wasilaka mashi las nir Judaman karem or mbari osa, �Kumak Judahi krahak fehe ma lar avak a kamashinak hulaima nokopman jivinakwa ria.� Erem or mbahanda mashi ter osmu omendingak nanduwa.�