John 8:34-42

³⁴Ma nikabai reyo, “Rama iniye ya nida: amiye tau gade, kaere vegu no rededi, bi vegu no di moimai rei tavoi rededi vene.

³⁵Moimai rei tavoi redo amiye bi toga toga yavari de amego, idu mida bi toga toga minari amebigo.

³⁶Mina dada, Mida yaku ya erufugo vonisi, bi ya erufuna iniye rego.

³⁷Na diba ya bi Abraham di tutubena vene, idu ya na umuyegi maina rededi, adina nai ago yi uka ideri bi de.

³⁸Beika nai Babasa veyafa bi mina ago nida, idu ya bi beika yi baba rofu neideyadi mina rededi.”

³⁹Kamini nikabai reyadi, “Uni baba bi Abraham.” Ma niyo, “Ya bi Abraham di mida vonisi, bi ini reremama regamo kana mina rebiyagadu.

⁴⁰Idu gua na umuyegika maina rededi—ago rama Sei rofu neideyaka, mina maka bi ya rofu oteimagamaka mini. Abraham yaku makai de reyo!

⁴¹Yi baba yaku regamo mina rededi.” Kamini niyadi, “Una bi diya mena de rema di mida mida; uni Baba yokoi maka bi Sei.”

⁴²Ma niyo, “Sei bi yi Baba vonisi, bi na rofu uka maragadu, adina na Sei rofu deyaka ma gua na mini. Naike nai vava dudu soka de reyaka, idu na nifeideyo.