Johannes 7:17-29

¹⁷Iö a mochen föri letipen Kot epwe silei ika mine üa eäni afalafal a feito seni Kot, are üa chök kapas fän püsin itei.

¹⁸Eman mi kapas fän püsin itan, a chök püsin kütta iteüöchün. Nge eman mi kütta iteüöchün ewe eman a tinato, i eman aramas mi let, nge esap wor och mine a mwäl won.

¹⁹Ifa usun, Moses esap ngenikemi ekewe Allük? Nge esap wor eman leimi a aleasochisi ekewe Allük. Pwota oua ekiekin nieila?”

²⁰Ekewe aramas ra pölüeni, “Eman anün rochopwak a wänuk. Iö a ekiekin niikela?”

²¹Jesus a pölüeniir, “Üa föri eu chök manaman, nge ämi meinisin oua mairü ren.

²²Iwe, Moses a allük pwe oupwe sirkomsaisi nöümi ät. (Nge ei esap pop seni Moses, nge ämi kewe lewo ra popuetä.) Iei usun oua sirkomsaisi eman ät lon ewe ränin sapat.

²³Are än Moses kewe Allük resap ta ren ämi sirkomsaisi eman ät lon ewe ränin sapat, pwota oua song ngeniei pokiten üa apöchökülätä unusen inisin eman mwän lon ewe ränin sapat?

²⁴Ousap apwüngü eman ren mine oua küna me lükün, nge oupwe eäni apwüng fän pwüng.”

²⁵Iwe, lon ewe chök otun ekoch aramasen Jerusalem ra popuetä le ais, “Ifa usun, sap iei i ewe mwän ekewe nöüwis ra ekiekin ar repwe niela?

²⁶Nengeni, a kapas le pwäpwäla, nge esap wor eman a pölüeni! Ifa usun, ir mi silei pwe i Kraist?

²⁷Nge lupwen Kraist epwe war, esap wor eman epwe silei ia a feito seni ie.”

²⁸Iwe, lupwen Jesus a afalafal lon ewe imwenfel, a leüömong le apasa, “Ifa usun, oua wesewesen sileei? Oua silei ia üa feito me ie? Ngang üsap feito fän püsin itei, nge ewe mi tinieito a let. Ämi ousap silei i.

²⁹Nge ngang üa silei i, pun ngang üa feito seni, i a tinieito.”