Johannes 19:7-15

⁷Nge ewe mwichen aramas a pölüeni, “A wor rem eu allük a apasa pwe ätei epwe mäla, pun a apasa pwe i Nöün Kot.”

⁸Lupwen Pilatus a rong ekei kapas, a fokun niuokus.

⁹A liwinsefälilong lon ewe imw o aisini Jesus, “Ia ka feito me ie?” Nge Jesus esap pölüeni och.

¹⁰Iei mine Pilatus a üreni, “Ifa usun, kosap mochen kapas ngeniei? Kosap silei pwe a wor ai pwüüng ai üpwe angasookala, pwal ai pwüüng ai üpwe apasa pwe kopwe iräpenges?”

¹¹Jesus a pölüeni, “A chök wor om pwüüng woi pokiten Kot a ngonuk. Iei mine ätewe mi atolongaei lepoumw a kon watte an tipis lap seni om.”

¹²Iei mine Pilatus a sotuni le kütta efoch al an epwe angasa Jesus. Nge ewe mwichen aramas a kökkö ngeni fän leüömong, “Are en kopwe angasala ätei, kosap chiechien Sisar! Pun eman mi püsin apasa pwe i king, a ü ngeni Sisar!”

¹³Lupwen Pilatus a rongorong ekei kapas, a emwenawu Jesus lükün o a mottiu won an lenien motun souapwüng, lon ewe leni itan “Chech fau.” (Lon kapasen Ipru: Kapata.)

¹⁴Ei otun ina epwe le arapakan leoloasen ewe rän mwen ewe chulapen Pasofer. Pilatus a üreni ekewe aramas, “Nengeni, iei i nöümi we king!”

¹⁵Nge ir ra kökkö ngeni fän leüömong, “Kopwe niela, kopwe niela, kopwe iräpengesi!” Pilatus a aisiniir, “Ifa usun, oua mochen pwe üpwe iräpengesi nöümi king?” Ekewe souasor mi lap ra pölüeni, “Esap wor eman nöüm king pwe Sisar chök.”