João 6:2-60

²Târâ Jesus awyly tiuntuduomo, agui kurâ domodo myarâ idâly, toenzepa tâwânuneim modo kua nhedyly tientomobyry wâgâ. Adyesenry anhedyly tientondyze tawylymogue, nhapygue idâlymo.

³Jesus âkuly iwy onwa xina agâ. Târâ xina ekadyly.

⁴Páscoa etyguedo iwaguepa idyly ani.

⁵Jesus wayam wayam warâ MYK idyly. Tyampygue toenzepa kurâ domodo iwy onwa âkuly nhedyly. Aituo Filiperam aguely: — Âdykâ kaise pyni kianâdyly merâ kurâ domodo ipyniryem? — kely.

⁶Kurâdo tuantoem âdy adienkyly awyly tutuzelâ olâ myani Jesus-ro warâ. Âdara Filipe in-hoguly awyly tiuntuhoem kulâ arâ aguely.

⁷Aituo Filipe in-hoguly: — Duzentas moedas pratagueto tainze tâise kurâ, pyni sanâtoem, mâkâem, mâkâem warâ pão epajiwâdoem, tydinheruguepa kurâ — kely. (Tokalâ iguandyly âwanopyry epywado mawânrâ tokalâ moeda pratagueto.)

⁸Aituo Simão Pedro iukono André idâly Jesus agâ agueze.

⁹— Tâlâ tarâ iamudo cinco pão cevadagueto, azagâ kanra âjihuyby warâpeom. Nudupa olâ ise toenzepa kurâ domodo xuatoem — kely.

¹⁰Aituo aguely Jesus xinaram: — Âji iwâkurudâ ekadomoem aguewâtaungâ — kely. Poji wâgâ ekadomoem âji iwâkurube ani târâ. Aituo idânârâ ekadaynlymo. Toenzepa târâ kurâdo awyly, uguondo modo kulelâ cinco mil lelâ.

¹¹Aituo Jesus cinco pão sanânibyryem, Deus agâ aguely: — Koendonro lelâlâ âmâ, Pabai; awylygue xinaem xirâ pão mâunduly — kely. Arâ agueypyem, pão nhepajiwâdyly; xina nhepâdoem nhuduly. Xina nhepâdaynly umelâ kehoem Jesus pão epajiwâdyby agui nhenehonly. Ilâpygueduo, Jesus azagâ kanra âjihuyby nhanâdyly, Deus agâ aguely: — Koendonro lelâlâ âmâ, Pabai; awylygue xinaem merâ kanra mâunduly — kely. Arâ agueypyem, kanra nhepajiwâdyly, xina nhepâdoem nhuduly. Xina nhepâdaynly umelâ kehoem, kanra agui nhenehonly.

¹²Ize tato ara kehoem idânârâ kurâdo âwinduadyly. Kanra âjihuyby nhâdylymo; pão nhedawynlymo; koendâ kehoem iolataynlymo warâ. Koendâ kehoem âwinduapygueduomo, xinaram aguely: — Âsegubydâdyby modo saunkuwâdaungâ, nâxiumebyra itoem — kely.

¹³Ilâpyryem pão, kanra âjihuyby warâ âsegubydâdyby xina nhetadâdyly. Doze cestu tumyke lelâ xina nhekanâdyly.

¹⁴Awârâ adyesenry Jesus anhedyly enipyry modo aguelymo: — Âkealâ mynra, Deus itaumbyry egatuim kinwânwânkylylâ mynra merâ. Roma donro takaze kehoem merâ kywymâryem kyjiene! — kelymo.

¹⁵Tywymâryem tyese kelymo tiuntuduo, mâkâ kulelâ târâpa âxiguely, eagonro âjiam idâly. Pymâ onro anano keba tawyly, tutuze mawânkâ.

¹⁶Iguandyly ume, târâ Jesus cinco pão, azagâ kanra warâgue kurâ domodo nhuantobyrydâpa xina xytâguyly. Galiléia iwaluam xina idâly.

¹⁷Jesus xina agâ nâepyra. Pepi odaxi xina âxiedyly, paru tienkuâdoem, xidadâ Cafarnaumram tâtâhoem. Xina idâzesedyly umelâ, iamadyly.

¹⁸Tahuleim kulâ adapezeinly ton-honre kehoem xina yan-yam; toenzepa kehoem paru adahugânily.

¹⁹Sagunudâpa âxigueybyem, cinco, seis kilômetros awârâem xina awyly ume, paru wâgâ Jesus adakobâdyly xina nhedyly. Xina iwepiry iwaguepa saindyly. Jesus paru wâgâ adakobâdyly tientuo, toenzepa xina âseanedyly.

²⁰Warâ olâ Jesus aguely xinaram: — Tâseanezeba itaungâ! Jesuslâ urâ! — kely.

²¹Aituo Jesus pepi odaji âxiedyly. Toenzepa xina iomazely, mâkâ tagâ awylygue. Inepa xina saindyly eyam tâtâhoam.

²²Emetybyem, Jesus tuizemo myakâwâm târâ paru emelay, xina pepi odaxi âxiedobyrydâ. — Âdykâ Jesus? — kelymo. — Tokalâ kulâ keankâ pepi taunlo. Jesus olâ keankâ iodaxi nâxiebyra. Eynynonro modo lelâ keankâ âxieni. Mâkâ pebalâ keankâ idâlymo. Iwerâ olâ tarâpa — kelymo.

²³Aguelymo ume, xidadâ Tiberíadesdâpa âetyby modo paru nhekuâdylymo. Tywepiry odaypa âzetywâdylymo, Jesus kurâ domodo tuantoem, “Koendonro lelâlâ âmâ, awylygue xina ipyniry mâunduly” kehobyry iwaguepa. Xuize idâwânmomy, nepyramo olâ myakâwâm.

²⁴Jesus, xinalâ warâ târâpa awyly tientuomo, Tiberíadesdâpa âetaymby modo tywepiry odaji âxiedaynlymo, paru tienkuâdoem. Cafarnaum iduantaji saintybyem xuize idâlymo.

²⁵Paru ekuânibyryem, Cafarnaumram saintybyem, Jesus agâ oxiodylymo. Eyam aguelymo: — Âmâ enra xina nhuinly, Jesus. Âdaraka xarâ aindyly? — kelymo.

²⁶— Kopaelâgâ pãogue âwatomobyry wâgâ kulâ uilymo, âdaituo adyesenry modo kehoem agânhedyly awyly mâuntuhomoem inkâba. Pão agui kânhenehonly medâmo lelâlâ wâne, adâituo agânhedyly awyly mâuntuba olâ âmaemo.

²⁷Pyni inepa adainrim, inakanhe ini warâ wâgâ inkâba âpaunzedaungâ. Tâlâ ise pyni emyenro âmaemoem, âdaunloenlâ inakanhe itânry. Emakewâni modo aunloenlâ Deus agâpa tyetuneba ise. Igueduo, aunloenlâ eagâ tâitoem eyam idâzemo. Âzeon-hondâdaungâ, xirâ augueho tâlâ mitomoem. Urâ, Uguondo Kaynâpa Âetyby kelygue tâzekeim, xuduze urâ âyanmo, yeinwândylymo-ro watay. Awârâ agânhetoem kâewyly awyly nutuen-ho Pabai Deus — kely Jesus.

²⁸Aituo Jesus nhapâiguelymo: — Âdyka Deus xina anhedyse ato awârâ amyguehobyry xina nhemakehoem, awârâ pyni emyenro? — kelymo.

²⁹Aituo Jesus in-hoguly: — Âdaunlo âwanu mâkeba ise amânhekylymo. Yeinwândylymo kulâ Deus ize ato, urâ mâkâ ingonotyby — kely.

³⁰— Adyesenry pylâ aiekâ, Messiaslâ mawyly, xina nheinwântoem. Âdyka ise amânhekyly, Deus Ingonotyby mawyly mâenehon-hoem?

³¹Iweâpa kydamudo Egitodâba egaseday, âji âdy peba ato einkâ adakobâdaymo, maná myakâwândy ipynirymo. Iwenibyem Deus itaumbyry awo wâgâ: “Pão kaynâpa eyanmo ingonokyly nhedawyn-homoem” — kelymo Jesusram.

³²Aituo Jesus aguely: — Kaynâpa Deus ingonotyby maná kehogue, kydamudo xuamâmy Moisés. Pabai Deus lelâ mawânkâ pyni kuolanâni emyenro xudunri. Xirâ mâuntudyzemo kuru wato.

³³Deus, kydamudo tâwindygue niguepa itoem maná kau odaypa tingonotobyry, ara lâpylâ mâkâ ugonodyly xarâ onro anaxi. Pyni ize kurâ kyiguepa kitoem, arâ lâpylâ yeinwântaungâ, aunloenlâ Deus agâ mitomoem, âdaunloenlâ eagâpa mipyra mitomoem — kely.

³⁴— Pymâ, aunlolâ awârâ amygueho xinaram xudugâ, awârâ pyni mygueho — kelymo.

³⁵— Urâlâ mawânrâ mârâ pyni emyenro. Urâlâ ise yeinwânni modo aunloenlâ Deus agâ ienehonri, eagâpa ienehondânry warâ. Ynynonro modo nâsewinzedondaymba natuandondaymba warâ ise.

³⁶Deus eon-honrugue agânhekyly mâendylymo umelâ olâ auguehobyry mâinwândyseba mawylymo.

³⁷Idânârâ yeinwânniem Pabai ize ato modo, urâ xurâ lelâ. “Yam âetaungâ, aunloenlâ yagâ mitomoem” warâ auguely yeinwândysedo modoram. Yam âetaymby modo âdaunloenlâ izepa witaymba urâ.

³⁸— Deusdâpa ani kâewyly, ize ato agânhetoem, ize wato aiese inkâba.

³⁹Pabai koendâ yeinwântaynrim modo kâendyse awyly. Ynynonro modo tydâpa iedyly ize inkâba mâkâ. Xypyry etay, ynynonro modo kurâem kânhetondyze mâkâ, aunloenlâ eagâ itomoem.

⁴⁰Pabai ize ato mawânrâ idânârâ tymery einwânni modo, aunloenlâ eagâ awyly, eagâpa nipyra. Aguehobyry awylygue ise xypyry etay kurâem kânhetondylymo — kely Jesus.

⁴¹Judeu domodo ewy nehoguebyra Jesus tywâgâlâ aguely: “Urâlâ Deus tydâpa ingonotyby pyni emyenro” kehobyry.

⁴²Aituo aguelymo: — José imery kulâ awâkâ Jesus. Nhunwym, ise warâ tutuze kurâ. Alâ “Deusdâpa kâewyly” kely. Kewâdyly kulâ awâkâ. Nuduwâpyra awâkâ Deusdâpa âetoem! — kelymo.

⁴³Jesus aguely eyanmo: — Inakanhe kulâ amyguelymo imowâdaungâ.

⁴⁴Âwâlâ kulâ ânguy yeinwântaymba, Pabai ugononibyry yeinwântomoem aniempyra watay. Pabai ugononibyry mawânkâ kurâdo yeinwântoem aienehoim. Xypyry etay olâ kurâem itondomoem aienehonze urâ.

⁴⁵Saguhoem Deus itaumbyry aguewâni modo ewy warâ akâwândy inwenily: “Idânârâ ise Deusram âzenomedâolymo, âdara einwândyly awyly wâgâ.” Idânârâ Pabai nhenomedâdo idani modo, tyangahu odaji ieni modo warâ yeinwânsemo.

⁴⁶Ânguy xirâ anano modo Pabai ugueho netaymba. Urâ lelâ mâkâ eni. Eydâlâma kâewyly.

⁴⁷— Idataungâ auguely. Yeinwântaynrim modo Deus agâpa nitaymbamo ise. Igueduo, Deusram idâzemo, aunloenlâ eagâ itomoem.

⁴⁸Pyni emyenro urâ. Urâlâ ise yeinwântaynrim modo aunloenlâ Deus agâ ienehoim.

⁴⁹Âji âdy peba ato einkâ tadakobâdyly ume maná myakâwândy kydamudo ipyniry. Manágue âduahonwânmo lelâlâ wâne, iguewânmo olâ.

⁵⁰Deusdâ âetyby einwânni modo, iguezemo lelâlâ wâne, nadaimpamo olâ ise. Idâzemo aunloenlâ Deus agâ tâitomoem. Pyni emyenro mawânkâ Deus Ingonotyby.

⁵¹Pyni emyenrolâ urâ on-hondâzemo Deus ingonotyby. Yeinwântaynrim modo Deus agâpa tyetuneba ise. Iguelymo-ro watay, idâzemo Deusram, aunloenlâ eagâ tâitomoem. Yiguely ise, ynynonro modo aunloenlâ Deus agâ itomoem. Ynynonro modo eon-hondâniem, wodo pylâ ipynirymo-ro waunlo ara ise — kely Jesus.

⁵²Aituo idanipyry modo âjigue aguelymo: — Kypyniryem nitaymba ise awâkâ sodo! — kelymo.

⁵³Jesus aguely eyanmo: — Wodo mâmpyra âmaemo, unu mâenypa âmaemo warâ-ro watay, aunloenlâ Deus agâ mitaymba ise âmaemo.

⁵⁴Wodo sâni, unu enyim warâ olâ aunloenlâ ise Deus agâ awylymo, eagâpa tyesebamo. Xypyry etay ise kurâem âiehondylymo-ro warâ. Xirâ mâuntudyzemo kuru wato — kely.

⁵⁵Jesus aguely: — Pyni lelâlâ wodo, tânyzeim lelâlâ unu warâ.

⁵⁶Wodo sâni, unu enyim warâ watay, aunloenlâ ise yagâ awyly. Eagâlâ ise urâ; yagâlâ ise warâ.

⁵⁷Pabai ugononibyry igueypyem inkâba; aunlolâ mâkâ tâlâ awyly. Eagâ wawylygue, kadainwâpyra ise urâ; tâlâ lelâ. Wodo sâni modo lâpylâ yagâpa nipyramo, nadainwâpyramo warâ ise, tâlâ lelâ. Iguelymo-ro watay, eydâ watoam idâzemo, aunloenlâ yagâ tâitomoem.

⁵⁸Waunlo urâ pyni emyenro Deus eydâ atodâ igonotyby. Kydamudo ipynirybyry maná emyenro keba urâ. Maná tâinzemo lelâlâ wâne myakâwândy kydamudo, iguewâm olâ. Deus ezaypa xytâguybylâ urâ. Wodo sâni, unu enyim warâ yagâpa nâiehowâbyramo ise. Tyigueduo, idâzemo aunloenlâ Deus agâ tâitomoem — kely Jesus.

⁵⁹Cafarnaumdâ Jesus xirâ modo aguely, âtâ tâdâtâdyguyho oday tienomedâdylymo ume.

⁶⁰Awârâ tindatuo, Jesus nhapygueni modo ewy aguelymo: — Arâ agueduo kiuntuwâbyra kurâ âdakeze aguely awyly. Kieinwântoem nuduwâpyra awârâ! — kelymo.