João 4:4-47

⁴Apim ini amawka ku ig mpiya apuriw Samariyamnaw.

⁵Usuh ayge Samariyamnaw, ig danuh ta apitit pahá paytwempu kewye Sikar kennesa arimkat amekene Jakó giwaxri. Minikwak ig amekene Jakó kakanhawni ta git gikamkayh amekene José.

⁶Amekene Jakó giwnpína ayge. Ig Kiyapwiye Jesus mabe awaku giwewni piyawakad. Nikwe ig batahkiswe aranwa ini unipna.

⁷Usuhme gikannuhnipwi atak paytwempuit adahan isimwiye umana. Igme Kiyapwiye Jesus msekwe ayge. Puwipka abet pahapu tino samariyano danuh atere kapukno guwnra. Ig Kiyapwiye Jesus hiyapni henne, ig awna gut: ―Uyá amnihun ikapun akak un.

⁹Egme kaytwa giwn: ―Mmah pis kinetihwa nukakhu? Pis judeyene. Hiyeg judeyenepwi gikakkis hiyeg samariyenepwi igkis ka pasamrakti pawtak.

¹⁰Igme kaytwa guwn: ―Waké pis hiyakbe ku pariye Uhokri ik adahan ikí pit, waké pis hiyakbe ku pariyene nah, nikwekam pis makahpawkam un nuthu. Nahme ikkam pit un ku pariye keh pis aymuhwa adahan apanenekwa.

¹¹Egme no tino awna git: ―Kiyapwiye, pis yuma ariknawnama adahan pis kapukne piwnra. Inin unipna mihad. Nikwe kitak pis utí ini un ku pariye keh wis aymuhwa adahan apanenekwa?

¹²Mmah pis ik adahan ikí nuthu un ku pariye pi kabayte ariw wahawkriwiy amekene Jakó gidahan? Mmah pis pi kiyatte giw? Mmanawa igwa amekene Jakó iké wothu inin unipna. Igwa higap niwntak payak gikakkis gikamkayupwi madé akak gipigpu.

¹³Igme Kiyapwiye Jesus kaytwa guwn: ―Ku pahapwi higá inin un, kuwewanek ig arabyu un akiwnek.

¹⁴Henneme ku pahapwi higá un nuwntak, iggi ka arabyuti akiw. Ini un nuwntak humaw ke un ariwtyakbe kane makarati in padeknenekwa dehetniki adahan apanenekwa.

¹⁵Egme no tino kaytwa giwn: ―Kiyapwiye, uyá ik nuthu ariwntak piwnra adahan nah ka arabyu un akiw, adahan nah ka diyudyuka adahan nah kapuknano akiw.

¹⁶Igme awna gut: ―Su ta iwá pigihgi ayta.

¹⁷Egme kaytwa giwn: ―Nah yuma nugihgi. Igme Kiyapwiye Jesus awna: ―Piwnapriknawa ku samah pis awna. Pis yuma pigihgi.

¹⁸Mmanawa ayipa kuwis pis pohowku gikebyikis pigihgiwenepwi. Igme ner pahapwinene ku kakak pis ay kuri, ig ka pigihgima. Hennewa piwnapriknawa.

¹⁹Egme kaytwa giwn: ―Kiyapwiye, kuri nah hiyakpi ku pis Uhokri gawnepe.

²⁰Uyá akki nuthu nikwe adahan ku kiney wixwiy kiyé Uhokri. Madikte amekenegben samariyenepwi igkis kiyé Uhokri ay apit inin waxri. Yisme yis hiyeg judeyenepwi yis awna ku amawka hiyeg kiyé Uhokri ayhté apit paytwempu Jerusalém. Mmani pit? Pariye Uhokri akki pit adahan ku kiney wixwiy kiyegi?

²¹Igme kaytwa guwn: ―Kiyapuno, ihanaba nuwnhu kuri nah awna pit. Aysawnemenek yis ka kiyé Wigwiy ay apit inin waxri, iné ayhté apit Jerusalém.

²²Yis hiyeg samariyenepwi yis kiyé Uhokri kuri henneme yis ka hiyakri ku pariyene ig. Usuhme hiyeg judeyenepwi usuh hiyaknig ku pariyene ig. Mmanawa ner ku pariye ayta gamnihtenkis madikte hiyeg ig ayta gibetitakkis hiyeg judeyenepwi.

²³Henneme kurinewa aysawnemenek madikte hiyeg ku pariye inyerwa kiyé Wigwiy, ignes kiyegi ay abet gihiyakemnikis. Ayge iwetrit adahan ku kiney wis inyerwa kiyene Wigwiy. Henne Wigwiy gimawkan adahan wis kiyegi.

²⁴Mmanawa ig Uhokri yuma gipit kema hiyegma amadgaya inin adahan ig msakwa apit pahawo iwetrit. Ku pariye hiyeg kiyenenepwi Uhokri amawka ignes kiyegi ay abet gihiyakemnikis. Amawka igkis kiyegi inyerwa.

²⁵Egme tino kaytwa giwn: ―Nah hiyakni ku Uhokri gikanyan adahan ukumaduketniwiy, ig Cristo, ig danuh atannek. Ayge nikwe ig akkamnih madikte wotwiy.

²⁶Igme Kiyapwiye Jesus kaytwa guwn: ―Nahnewa ku pariye kinetihwene pikak nahnewa Cristo. Hennewatbaki ig Kiyapwiye Jesus awna gut.

²⁷Udiyhemni nikwe, usuh gikannuhnipwi danuh atere. Usuh wakaymnibdi ku samah ig kinetihwa gukak pahapu tino ku pariye samariyano. Henneme usuh marenpi gibohri adahan usuh ayapri ku pariye gimawkan ta gut. Nikwe usuh ka ayapri ku samah ig kinetihwa gukak.

²⁸Ayteke eg tino ikise gunratiy ayge, eg sigise ta paytwempuit. Eg danuh atere, eg awna ta gitkis hiyeg aygnenepwi:

²⁹―Ba yi ayta iwasa pahapwi awayg ay. Ig akkamnih nuthu madikte ku pariye nukehnitnene. Mmah kawki nernema Uhokri gikanyan adahan ukumaduketniwiy?

³⁰Igkis timapni henne, igkis pes paytwemputak. Igkis tipikwiyes ta gimkanit Kiyapwiye Jesus.

³¹Apimwata ini usuh gikannuhnipwi awna ta git Kiyapwiye Jesus: ―Kiyapwiye, ahah pimana. Uyá ax.

³²Igme awna wothu: ―Nah kamana ku pariye yis kane hiyak.

³³Usuh timapni henne, usuhweke kinetihwa pawtak: ―Mmah nawenéwatma hiyeg kuwis ewk gimana git?

³⁴Igme awna wothu: ―Nah kehne nawahkisten gibetki, ini ikí nawaygyi ke numanabe. Nah kehne gannipwi, ini kewa numanabe nuthu.

³⁵Ayteke ig awna akiw. Giwn: ―Ta yit muwaka paxnika kayg adahan tariswiki was. Henneme nuthu ka hennema. Araytak ayipa ahegbet kuwis. Sarayhnay yipegyi ta gimkatkis nerras samariyenepwi aytniyepwi. Igkis kuwis ahegbet adahan kamaxwepye ta nupitit. Nuthu igkis kewa pahak wasbe ku pariye ipatrik ahegbet adahan tariswiki. Kuwis Uhokri giwn ke wotbe in mutuhkabe ay gibetkis. Kuri muwaka hiyeg kene tarisnepwibe. Ku pahapwi ekkene gitkis hiyeg adahan ku samah igkis kamaxwa ta nupitit ig ke wotbe tarisnebe hiyeg ndahan.

³⁶Ku pahapwi hiyeg wagesne hiyeg henne ndahan, iggi katiwnihkanek. Hawwata nerras hiyeg ku pariye kamaxwa ta nupitit igkis aymuhwanek gimun Uhokri adahan apanenekwa. Ayge nikwe ig ner pahapwi bateke ginaktinnek payak gikakkis madikte nerras ku pariye kit kinetihwa numinhu ta gitkis.

³⁷Hiyeg gibetkikis awna: “Mpuse wannipwiy. Pahapwime gannipwi adahan mutuhne was, pahapwime gannipwi adahan tarisne was.” Inakni yuwit hawwata kawih yidahan.

³⁸Nah kuwis awahkisyi adahan yis wagesne hiyeg ndahan. Henneme ka yisnema ku pariye ahegbete gihiyakemnikis adahan igkis kamaxwa nupitit. Inere nawenépwi hiyeg gannipwikis. In Uhokri gawnepepu pitatyepwi gannipwikis. Minikwak igkis kinetihwa gitkis hiyeg numinhu. Kuri yisme akki gitkis adahan ku samah igkis kamaxwa ta nupitit. Yisme ke pahapwibe ku pariye taris pahak was ku pariye nawenéwa hiyeg gamuthan. Hennewatbaki ig Kiyapwiye Jesus awna.

³⁹Ayipa kuwis kaayhsima nerras samariyenepwi paytwempuyenepwi igkis ihe ku ig Kiyapwiye Jesus iggi Uhokri gikanyan adahan ukumaduketniwiy. Mmanawa igkis ihe guwn no tino ku pariye awna gitkis: “Ig akkamnih nuthu madikte ku pariye nukehnitnene.”

⁴⁰Ayteke nikwe igkis danuh atere git Kiyapwiye Jesus, igkis awna git: ―Kiyapwiye, uyá msakwa ay umun adahan aynessa hawkri. Igme kaytwa giwnkis: ―Ihkata nikwe. Ig tipik gihaptikis, ig msekwe ayge gimunkis adahan pina hawkri.

⁴¹Ayge nikwe kaayhsima hiyeg akiw kamaxwe ta gipitit Kiyapwiye Jesus awaku ku samah igkis timap giwn.

⁴²Apim ini igkis awna ta gut no tino: ―Kuri usuh kamaxwa ta gipitit Kiyapwiye Jesus. Ka inenwatma awaku ku samah pis kinetihwa gimin, henneme awaku ku samah usuhwa timap giwn ku samah ig awna. Kuri usuh hiyakni ku ig igyerwa wamnihtenwiy, ig keh madikte hiyeg isamtawnek.

⁴³Ariwnteke ini pina hawkri ig Kiyapwiye Jesus pes ayteke. Ig tahhan apitit Galiléyamnaw. Henneme ig ka atak ta apitit giwaxriwa Nazaré.

⁴⁴Mmanawa ig Kiyapwiye Jesus gibetki awna: ―Yuma pahapwinama Uhokri gawnepe kiyathaka gapitkis hiyegipiyene ku pariye apitya giwaxriwa. Hennewa in danuh ku samah inakni giwn.

⁴⁵Ig danuh atere apitit Galiléyamnaw, igkis galiléyenepwi ayge amapig kabayhtiwa. Igkis amapig awaku ku samah igkis hiyá madikte gannu ku pariye ig keh abet fet ayhté paytwempu Jerusalém. Mmanawa igkis hawwata igkis fetya ayge.

⁴⁶Ayteke ariwnteke ini ig diyuhe ta apitit paytwempu Kana ku kiney kuhwekwa ig wages un win. Kennesa arimkat Kana pahá paytwempu akiw kewye Kafarnawh. Ayge pahapwi awayg ku pariye kannipwiye gimun pahapwi hiyaptigi. Ig ner awayg gikamkayh kaayhsima ig kakahrip.

⁴⁷Ig awayg kinetni Kiyapwiye Jesus gak ku ig danuh aytontak Judeyamnawtak ta apitit Galiléyamnaw. Ig timapni henne, ig tipik atere gimkat Kiyapwiye Jesus. Ig danuh atere, ig awna ta git: ―Kiyapwiye, uyá amnihun. Uyá atak nuhapti ta nupinwat adahan pis piyih nukamkayh. Ig me miyapimet.