João 3:8-26

⁸Tyryrykane ke mana xia xia ke tyryry ãko. Moro etãko mase repe. Yrome, “Ozeino ke oehnõko nae? Aza ytõko nae?” ãko matose zuaro pyra oexirykõke. Moro sã mã Ritonõpo zuzenu poe enuruketomo. Zuaro pyra matose repe yrome Ritonõpo zuzenu poe Ritonõpo poenõme exĩko matose, tykase Jezu eya.

⁹—Otãto keh morohne nae? tykase Nikotemu Jezu a.

¹⁰Ynara tykase Jezu eya, —Juteu tõ amorepaneme mase repe. Otãtome serohne waro pyra mahno? tykase Jezu Nikotemu a.

¹¹—Zae rokẽ ynara ãko ase oya, zuaro jehtoh poko ase ourũko. Josenuhmatopõpyry poko oya ekarõko ase roropa. Yrome jotururu etary se pyra matose.

¹²Ajohpe rokẽ jekarõko mase otarãme senohne poko oururuke ya. Morararo kapuaõkõ poko oururuhtao ajohpe rokẽ jekarõko mase roropa.

¹³Sero nonopõkõ onuhpitopyra mana kapu aka. Ywy rokẽ ase Kapu ae Ayhtohpyry.

¹⁴—Pake Moeze a okoi panõ tyrise, Ritonõpo omi poe, metau risemy. Mokyro tanỹse eya ona po wewe pokona, okoi nesekatyã neneryme, orihpyra toto ehtohme. Mokyro sã mã Kapu ae Ayhtohpyry anỹnõko mã toto wewe pokona,

¹⁵emero porehme enetupuhtohme, orihpyra toehtohkõme jũmãme.

¹⁶Ritonõpo sero nonopõkõ pyno ipunaka. Morara exiryke Tumũkuru toirõ tonehpose eya, emero porehme jenetupuhtohme tosẽkõme, orihpyra ehtohme, jũme ymaro ehtohme.

¹⁷Seropõkõ pynanohse Tumũkuru tonehpose Ritonõpo a, apotoimo htaka omõpyra toto ehtohme.

¹⁸—Ritonõpo mũkuru enetupuhnanõ omõpyra mã toto apotoimo htaka. Mãpyra onenetupuhpynõ omõnõko mã toto apotoimo htaka, onenetupuhpyra toexirykõke.

¹⁹Oty katoh toto wãnohnõko Ritonõpo nae? Ynara exiryke, Tumũkuru tonehpose eya repe. Yrome tyyrypyrykõ se rokẽ seropõkõ mana. Ritonõpo mũkuru saerehkane sã mana. Yrome saerehkane se hkopyra seropõkõ mana. Xinukutumã se rokẽ toto iirypyryme toexirykõke.

²⁰Tyyrypyrykõ poko exiketõ Ritonõpo mũkuru se pyra, saeremã pona ytopyra toehtohkõ samo, tyyrypyrykõ enepory se pyra toexirykõke.

²¹Yrome zae rokẽ exiketõ mã oehnõko Ritonõpo mũkuru a, aomipona toto exiry waro imehnõ ehtohme, tykase Jezu Nikotemu a.

²²Morarame typoetory maro toytose Jezu Jutea pona. Okynã pohto rokẽ kynexine moroto typoetory tõ maro. Moroto typoetory tomo a imehnõ tõpurihkapose morotõkomo.

²³João roropa imehnõ ẽpurihkãko kynexine Aenõ po, tuna nae exiryke itamurume. Sarĩ pata maro Aenõ atameke pyra kynexine. Morotõkõ toytose João a osẽpurihkapose eya.

²⁴(Omõpyra ro kynexine João ãpuruhpyry taka.)

²⁵Morarame tõsezusezuhse toto, João poetory tomo juteu maro. Toekurãkary poko kure ehtohme Ritonõpo a, tõsezusezuhse toto.

²⁶Mame João a toytose ipoetory tõ oturupose, —Wenikehpyra ro hma, oximaro oehtopõpyrykõ poko Joatão mõ poe? Mokyro poko moturuase yna a. Mokyro mã imehnõ ẽpurihkãko. Emero mã ytõko toto eya, tykase toto tosẽkomo a.