João 19:3-31

³Morarame eya tooehse toto, imehnõ soutatu tõ tooehse. —Tuisa konõto, juteu tõ tuisary, tykase toto Jezu a, ipoihtõko rokẽ toh kynexine. Morarame tõtãtãmase eya xine tomarykõ ke.

⁴Morarame Pirato tutũtase ropa tapyi tae. Ynara tykase ynororo imoihmãkomo a, —Mokyro enehse ropa ytõko ase onenerykõme. Aorihmapory se pyra ase. Oty pokoinohxo aorihmapõko ha, tykase Pirato eya xine.

⁵Naeroro tutũtase Jezu tuhpõke, omoxino risẽ ke. Tupoke kurã ke roropa kynexine. —Mosero ynoro. Enetoko ke, tykase Pirato eya xine.

⁶Morarame Jezu eneryke tyya xine ynara tykase toto opore, —Wewe pokona exixihmapoko aorihtohme. Wewe pokona exixihmapoko aorihtohme, tykase toto. Jamihme tõmitase toto. Ynara tykase Pirato eya xine, —Amarokõ arotatoko. Exixihmatatoko. Ywy aorikyry se pyra ase repe. Morara exiryke arotoko, tykase eya xine.

⁷Ynara tykase juteu tomo, —Yna tamuru omihpyry poe aorikyry se ynanase. Ritonõpo mũkurume tõsekarose exiryke aorihmapory se ynanase.

⁸Morara kary etaryke tyya Pirato tõserehse itamurumehxo mokaro omiry etaryke tyya.

⁹Kynomõne ropa tapyi taka Jezu a oturupose. —Oze hmahno? kynako kynoturuzomopone ropa eya. Yrome onezuhpyra kynexine Jezu.

¹⁰Ynara tykase Pirato eya tozuhzomopyra exiryke, —Oty katoh jezuhzomopyra mah? Tuisame ase. Otũtanohpory se ropa jahtao otũtanohpõko ase. Yrome oexixihmapory se jahtao oexixihmapõko ase, tykase ynororo.

¹¹Ynara tykase Jezu Pirato a, —Tuisame oehtoh onekaropyra Ritonõpo ahtao, tuisame pyra mexiry. Yrome tuisame oehtoh tokarose Ritonõpo a exiryke sã rokẽ tuisame mase toehse. Mokyro rokẽ hxirõkohxo mã Ritonõpo jekarohpõ oya. Ohxiropyrahko mana, tykase Jezu eya.

¹²Morara kary etaryke tyya Jezu tũtanohpory se ropa toehse ynororo ipunaka. Yrome juteu tõ sekere tykase opore, —Mokyro tũtanohpory ropahtao oya Ĩperato epeme pyra mase exĩko. “Tuisame ase,” kahpõ mã Ĩperato epeme pyra mana, tykase toto Jezu poko.

¹³Morara kary etaryke Jezu tarose ropa eya jarãnaka ropa. Morarame typorohse Pirato, terekatu porohtoh pona. Moro esety Topu risẽ zara (juteu tõ omiryae moro esety Kapata).

¹⁴Mame tõmehse. Moroae ro kokonie pukuro Paxikoa rĩko toh kynexine. Ynara tykase Pirato juteu tomo a, —Mose otuisarykomo, tykase eya xine.

¹⁵Mame ynara tykase toto eya, —Etapapoko ty! Etapapoko ty! Wewe pokona exixihmapoko, tykase rokẽ toh Pirato a. —Otuisarykõ exixihmapory se hmatou, wewe pokohna? tykase eya xine Pirato. Mame ynara tykase toto eya, —Toiro tutuisake ynanase. Ĩperato rokẽ mã yna tuisaryme, tykase Ritonõpo maro oturuketõ tuisary tomo Pirato a.

¹⁶Morarame soutatu tomo a Jezu tokarose rahkene, wewe pokona exixihmatohme eya xine. Mame Jezu tarose soutatu tomo a rahkene.

¹⁷Toxixihmatoh tarose roropa eya. Toytose toto ypy pona. Ypy esety Upuhpõpo. (Epereu omiryae moro esety Koukota kynexine.)

¹⁸Moroto wewe pokona Jezu toxixihmase eya xine. Imehnõ roropa toxixihmase wewe pokona eya xine Jezu maro. Toiro Jezu apotunuru wino toiro ipoozery wino, enara.

¹⁹Morarame wewe tymerose Pirato a rahkene. Jezu apõ pokona tynymerohpyry tyrise eya emero tonesẽme. “Jezu Nazarepono juteu tõ tuisary,” me tymerose eya.

²⁰Moro tonese juteu tomo a tuhke, atameke pyra pata exiryke exixihmatopõpyry a. Oseruao omi kynexine tymerose eya, epereu omiryae, ratina omiryae, kyreku omiryae. Enara kynexine tymerose eya.

²¹Ynara tykase Ritonõpo maro oturuketõ tuisary tomo, juteu tõ tuisary tomo, —Oty katoh juteu tõ tuisaryme tymerose oya? Ynara rokẽ imeroko, “Ywy ase juteu tõ tuisary, kahpõ mosero,” katoh rokẽ imeroko morotona, tykase toto eya.

²²Ynara tykase Pirato eya xine, —Ynymerohpyry onytyorõmara ase. Ah morara rokẽ nexino, tykase eya xine ynororo.

²³Morarame Jezu toxixihmase ahtao wewe pokona soutatu tomo a, zuponỹpyry tapiakase eya xine tupõkõme. Asakoropane soutatu tõ kynexine. Mame upo mosã tapoise roropa eya xine ixixĩpyny, tytororo exikety.

²⁴Ynara tykase toto, —Onyxihxihkara sehtone. Topu pisarara rokẽ sematone upo mosã apoitohme kyya xine, tykase toto. Morara kynako toto pake Ritonõpo nekarotopõpyryae ro, “Juponỹpyry apiakãko toh mana, tupõkõme. Topu pisarara emãko toh mana juponỹpyry mosã apoitohme tyya xine,” katopõpyryae ro urutõkomo a. Morara tyrise soutatu tomo a rahkene.

²⁵Moroto kynexine Jezu eny. Exixihmatoh myhto kynexine ynororo typaxiry maro. (Imehnõ nohpo tõ maro kynexine, Maria maro. Kyropa pyty Maria kynexine.) Maria Matarena roropa, enara toh kynexine moroto.

²⁶Morarame tyse enene Jezu. Tonuru zamaro exikety enene roropa. Ynara tykase ynororo tyse a, —Aja omũkurume mose tyriko, tykase tyse a ynororo.

²⁷Morarame typoetory a ynara tykase roropa ynororo, —Mose asame tyriko, tykase eya. Morara exiryke Jezu enỹpyry tarose tyya tytapyĩ taka tymarõme aehtohme.

²⁸Morarame toerohtopõpyry otyhkary waro toehse Jezu. Morara exiryke Ritonõpo omihpyryae ro, —Tuna se hano, tykase ynororo.

²⁹Moroto kynexine kasana taõke ikataĩ exikety ke. Morarame mauru panõ tyrise wewe pokona, moro eukuru anỹtohme, Jezu ohpatohme.

³⁰Ẽxĩpo, —Epo. Notyhkano, kynako eya xine toerohtopõpyry poko. Morarame morara kaxĩpo sã rokẽ toetywykase zupuhpyry. Kynorihne rahkene.

³¹Morarame juteu tõ tõturuse Pirato maro. Ynara tykase toto, —Wewe pokona exixihmatyã etapazomopoko. Jaximorykõ zehpyry etapapoko axĩ toto orihtohme, toto outohme ropa wewe poe. Morara se ynanase sextafeirame exiryke. Ahno ekepyry nomory se pyra ynanase wewe poko oserematohme exiryke. Paxikoame exiryke roropa, tykase toto.