Jesu tondiba tuona 27:2-43

²Ti den kua ya inbiagu n ani Adamita dogu nni ki baa gedi ya dogu n yi Asi nuganu po. Ti den fii ki caa, ke Akilitaka, Maseduana diema Tesalonika dogu yua yegi leni ti.

³Lan den yendi, ti den pundi Sidoni ki sedi. Juliyusa den kubi Polo leni mi buama, ki puni o ke o ñani ku inbiagu nni, ki gedi ki fuondi o dalinba ki baa mi todima bikani.

⁴Ti den fii lankani ki suagi liiga ki balini Sipila kpendegili kelima u faalu den togidi ti.

⁵Ti den suagi liiga ki poandi mi inciama, ki balini Silisi leni Panfili diema, ki sedi Mila dogu nni.

⁶Lankani aminteela yudaano den laa inbiatoagu, yaagu n ani Alisandili dogu nni ki baa gedi Itali, ki kuani ti ku niinni.

⁷Ti den suagi ki cuoni dindini danaba ki nagini Sinida dogu leni fala. U faalu n go den togidi ti ke tii den fidi ki suagi liiga, ti den lebidi ki balini Kileta kpendegili ki teli Salimone po.

⁸Ti den suagi liiga leni fala hali ki ban balini ki pundi ya dogu n yi ti inbiadi sedikaanhamu yu n ku leni Lase dogu ki sedi.

⁹Ti cenli den waagi hali ke li den ban pundi yaa yogunu ke ku inbiagu cenli biagidi kelima mi oalolima yogunu den pendi. Lane ke Polo den tuodi ki waani ba.

¹⁰Ki yedi: N sua ke ti ya suagi liiga ku ñinbiagu cenli baa biagi. Laa tie ku inbiagu leni kun tugi yaa tuga bebe ka baa bodi, ti miana moko baa ti taani lienni.

¹¹Ama a minteela yudaano den dugi ku inbiagu gobidikoa leni ku daano po ki cie Polo maama.

¹²Kelima ban den ye yaa inbiadi sedikaanu yeni naa den dagidi bipo ban ya ye likani hali ku fawaagu. Lane ti siiga yaaba, yaaba n den yaba ki cie den yedi ke li baa hani tin go fiini a cabiciama ki a likani ki moandi ki la ti yaa baa fidi ki suagi ki pundi Fenikisi dogu ki sedi lankani hali ku fawaagu yogunu n pendi. Fenikisi yeni den tie Kileta inbiadi sedikaanu ki tiegi jienu ki goa nintuali po, leni ganu ya nintuali po.

¹³Yaa faalu n ani ganu den figi waamu waamu ke bi tama ke bi baa fidi ki tieni nani ban den jagi maama. Bi den fiini ku inbiagu kubikpiagili yaali n sieni gu ki suagi ki balini Kileta kaa foagi leni li jaali.

¹⁴Ama la den yen waamu puoli faaligu den ani li kpendegili po ki figi boncianla.

¹⁵Ku faaligu yeni den taa ku inbiagu ke ku naa go fidi ki baa togidi gu. Lane ti den cedi ke ku faaligu taa gu ki gedini kun bua naani.

¹⁶Ti den balini li kpendegili ke li wa ki yi Kiloda ganu po. Nani lin den sieni tipo ku faaligu waamu yeni, ti den fidi ki cuo ki inbiabiga, ama leni fala.

¹⁷Bi den yugidi ga ki kuani ga ki inbiabiga nni. Li yaa puoli bi den soali i baabi ku inbiagu tiipo ki loli bonhanla. Bi den jie ke u faalu baa tudi ki gedini ti Libi boanjaali ya tanbitinga po. Lane, bi den jiini ku dagbeegu, ki cedi ke u faalu tudi ki gedini ti.

¹⁸Kelima u faalu n go den waani ti fala boncianla maama po, lan den yendi bi den cili ki luni a tugitiama mi ima nni.

¹⁹Li dantaali daali bani biba den taa ku inbiaciangu tuonsoantiadi ki luni mi ima nni.

²⁰Dana boncianla den pendi ke ki yenga leni o hmaalo naa den ani. Ku faaligu den figi ki bia hali boncianla ke tii go den daani ke ti baa ye leni miali.

²¹Li den waagi danaba ke niloba kuli ki den dini. Lani Polo den sedi bi siiga ki yedi ba: Li den baa hani yi yaa den cengi n maama kaa den fii Kileta. Ti kan bi lu ti tuga ki go la yaa fala n tie na.

²²Moala n waani yi ke yin paagi mani yi pala, kelima yi siiga oba kuli kan bodi kali ku inbiagu bebe.

²³Kelima U Tienu yua n die nni ke n tuuni opo yeni yaa maleki doagidi o yuli npo ku naa iagu.

²⁴Ki yedi nni: Polo han da jie liba. Li tie tiladi han pundi ki sedi Sesa nintuali. U Tienu go hanbi opo ki puni a ke yaaba n ye leni a ku inbiagu na niinni kuli siiga, baa yendo kan bodi.

²⁵Lanwani yin paagi mani yi pala, kelima n pia li dandanli U Tienu po ke li baa tua nani wan yedi nni maama.

²⁶De tiladi ti baa tuoni kpendegiliba jaali kani.

²⁷Li piiga n dannaali daali iagu, u faalu den pengipengi ti ki caani ganu leni jienu Adiliatika yaa incianma po. Ku yasiigu ku inbiagu tuonsoanba den tama ke ti nagini tingaba.

²⁸Bi den luni mi incianma bonbiigikaala, ki sua ke mi ima ua ki pundi nukpanduna piiyia. Lan pendi waamu, bi gi den biigi ki sua ke mi ua ki pundi piiluoba n nukpanduna muu.

²⁹Bi den jie ke ku inbiaciagu baa kpaabi ya tanciama n ye likani mi ima nni, ke bi taa ya kubikpiaginaada n ye ku juodima ke kun da go cuoni. Lani bi den miadi lan fa, ki gu leni mi yanjegibima

³⁰Ku inbiagu tuonsoanba den tieni nani bi baa jiini yaa kubikpiaga n ye ku yuli po yeni, ama bi go den jiini ki inbiabiga mi ima nni ki baa kua ki niinni ki ha ku inbiaciangu ki sani ki ciadi.

³¹Polo den yedi a minteela yudaano leni a minteela kuli: Bi jaba yeni yaa sedi ku inbiagu nni, yi kan ciadi.

³²Lanwani a minteela den jia ya baabi n doali ki inbiabiga leni ku inbiaciangu, ki cedi ke ki baa, ke mi ima taa ga ki gedini.

³³Lan den bua ki fa Polo den mia bikuli ban je waamu, ki yedi ba: Dinla n tie piiga n dana naa ke yi ji leni fala ki naa dini jiemaba kuli.

³⁴N mia yi yin je mani, lan baa todi yi yin ciadi. Yi siiga baa niyendo yuyengu kan bodi.

³⁵Wan den yeni, o den taa dupen ki tuondi U Tienu bikuli nintuali ki cabidi ki hmani.

³⁶Lane bikuli den baa li papaali ki dini.

³⁷Tinba yaaba n den ye ku inbiagu yeni niinni kuli den pundi kobiga n piilele n niba luoba.

³⁸Ban den dini ki dagidi, bi den luni ban tugi ya halikama mi ima nni ke ku inbiagu yuagi.

³⁹Lan den fa, baa den bandi ban baali yaa tinga, ama bi den laa ku kpenkadigu ke ku jaali tie tanbitinga. Bi den jagi ke li ya baa tuo ban nagini ku inbiagu ki sieni gu lankani.

⁴⁰Bi den jia yaa baabi n kubi a kubikpiaga kuli ki ha ha mi ima nni, ki go lodi yaa baabi n luo ku inbiagu bonpegidikaala. Lani bi den yugidi ya cabicianli n ye ku inbiagu yuli kani ke u faalu tudi ku inbiagu ke ku teli li jaali po.

⁴¹Ban den pundi ya tanbijuali n ye m ima nni, ku inbiagu den kpaabi li ki sedi. Ku oabu den feli mi tanbiima yeni niinni jinjini, a inguona den poa ku puoli po leni u paalu hali ki teni ke ku kuakua bonjenajena.

⁴²A minteela den jagi ke bi baa kpa a kadibila, kelima baa den bua bi siiga baa yendo n kua mi ima nni ki dugi ki ciadi.

⁴³Ama bi yudaano yua n den bua ki ga Polo miali, den yie bipo ke ban da tieni yeni. O go den yedi ke yaaba n bani li indugili n kpa yugi ki baa mi ima nni ki dugi ki pundi li jaali.