1Gii mendatupa pateamopa, Goteme Abrakame minao makande pia. Goteme lao pituu, “Abrakame!” lea. Dopa leamopa baame, “Namba ae kalyo dake” lea.
2Dokopa Goteme Abrakame lamaiyoo, “Embanya ikiningi mendai iki Aisake, embanya auu kaenge doko lanyoo, Moraiya yuu dokonya pupi. Pupala manda mende nambame laitaka pitu dokonya, baa kundi joo, tao mulyina yangape” lea.
3Oo yongama wamba Abrakame sakatatala, baanya kalai akali lapo-pipa, baanya ikiningi Aisakepi lanyepala, kundi yangapenge ita waiyami. Dopa petala, dongi mende nyepala, oapi dupa mandisakamaiya. Mandisetala Goteme pena leamo yuu dokonya paanya, kaita peami.
4Pao yuu gii tepo dokonya omo kandameamopa, Goteme yuu manda leamo doko sia.
5Siamo kandatala, baanya kalai akali dolapo lamaiyoo, “Namba wane kole dakepa omosa loma soo kundi yangala pelyambano. Yangatala dee ae pilyambanana, nyakamba dongi dake-pipa asa kalyepape” lea.
6Dopa latala Abrakameme ita waiyepae dupa nyoo, Aisakeme sina maitala, baame wua kema dokopa, ita kaiyepae dokopa, nyoo minia. Nyoo minao kaita peambi.
7Peambinopa, Aisakeme, “Apane” leamopa, Abrakameme, “Apea laa” lea. Dopa leamopa, Aisakeme takange tipa pyoo, “Nalimba ita kaiyepaepi, ita waiyepaepi, dupa salambane-lamo doko, sipisipi yakane yangapenge doko anja kalyape?” lea.
8Abrakameme pii yanu pyao, “Gote tangeme sipisipi yakane dita mende yangambanana” lea. Dopa latala, nyakamba peambino doko pao,
9Goteme yuu manda mende leamo dokonya pyakameambi. Pyakamatala, Abrakameme kundi yangapenge kana toko mende petala, toko ketae dokonya ita dupa depa lea. Depa latala baanya ikiningi Aisake doko kingi mokopi nyoo yaki petala, toko ketae dokonya setea.
10Setapala wane doko pyalanya, wua kema doko nyiamopa,
11kaiti-kisa katao, Kamongonya enjele mendeme, “Abrakame! Abrakame!” lao wii lea. Dopa leamopa, Abrakameme, “Namba ae kalyo dake” lea.
12Dokopa Kamongonya enjele dokome Abrakame lamaiyoo, “Wane doko koeyasala kaeya. Embanya wane mendai iki doko, namba nanditu latala kaeyala naeyaleno dokonya, embame Gote paka kaeyalene-lamo lao kandelyona” lea.
13Dokopa Abrakameme ita waingi kuki mendenya, sipisipi maipa mende nengenya pyalya minatae kateamo kandea. Kandatala baanya ikiningi doko yakinatala, sipisipi doko nyepala, Aisake alo pyoo pyapala, tao mulyina yangea.
14Kamongome sipisipi maiyamo doko masetala, Abrakameme yuu manda doko kenge, “Kamongo dokome dita” lea. Epapupi, “Kamongonya manda dokonya, baame ditana” lengema.
15Kamongonya enjele dokome kaiti-kisa katao, Abrakame lao dee lapo pyoo, wii lao pituu,
16“Namba Kamongo dokome nambanya kenge dokonya etete kyeto joo kiningi etete lelyo: Embame nambanya pii nepatala, embanya wane mendai iki doko namba nanditu latala, kaeyala naeyalene-lamo dokonya, nambame emba minao auu pisoto. Embanya mandipaenya mandipae palitamino dupa kaitinya bui-pipa, endaki lembasa kea-pipa, kapa pena lasoto. Embanya mandipae dupame nyakamanya yandapipi dupa pyao ita minatala, yuu dupa nyakama nyetami.
18Embame nambanya pii watalene-lamo dokonya, embanya mandipaenya mandipae mendeme endakali yuunya palitamino dupa pitaka auu pisetana” lea.
19Dokopa Abrakame baanya kalai akali kateambino dokonya pilyetala, dolapo apata Besiba yuu dokonya peami. Pupala Abrakame baa yuu dokonya katea.
20Dokonya kateamopa, endakali mendeme Abrakame lamaiyoo, “Embanya kaiminingi Neo etanenge Milikame wane ane 8-pela mandeana” lea.
21Wane mandeamoli pyoo kenge dupa: Usa, Basa, Kemuele, Kesete, Aso, Pilidasa, Jidilapa, Betuelepi lenge. Kemuele baa Arame takange. Betuele baa Rebeka takange.
24Neonya enda maitapyao nyiamo doko Reuma lenge. Enda dokome wane ane kitomende mandeamo dutupa: Teba, Game, Tasa, Makapi lenge.
