1Iau Jems nenge fafauun ke God ke ke Kumguui Iesu Karisito. Ia sisiit usuf gam sangful ini u e mat tina Israel ae gam kiis sararah na foron maleh tikii na piklinbat. Famais kiak usuf gam.
2Foron tuaklik, aunbiing foron marmarsan tatawin i tapiek lo gam, gamen laes sau,
3wara le gam usum le, aunbiing gam tafe tatawin ae i tof unune kimi, in farakrakai gam isi gamek tifat.
4Male gamen tifat, ke unune kimi in matuk ma gamen tapiek tortores, ke biil gamen to bilbiling isi ti tier.
5Male tikas lo gam biil imel e rokap na wolwol kia, i rokap le in sising, isi God ik ta u usuf i, wara le God i sapeng la na lima usuf fanu tikii, ke biil i balkut la tura ier ae i sising u.
6Isau le aunbiing i sising, in sising tom ini unune, ke ini in tikii sau e wolwol. Wara le seh ae iwu e wolwol kia, i fasih sau arae nenge panaf ae kif i kufe u una foron falifuh tikii.
7Kaltu ae iwu e wolwol kia, gong i wol le in kep ti tier sing Kumguui.
8Male iwu e wolwol kia, ke biil i fasih in tifat na foron foim tikii i tel u.
9Male nenge tualik kerer na asa Iesu, i lauu, ke in laes sau wara le God tom ka falaumet pes ta u.
10Ke kaltu ae ifuun e minmara, in laes sau aunbiing God in fasabiro u. Wara le liu kia i fasih sau arae sian au ae i maing sape.
11Pisiih i susupiek ini tara tuntun, ke ka famang au ae. Sia ka luut ke rokap na parpar lo ka mangmangal. Ifasih sau arae kaltu ae ifuun e minmara, in mangmangal aunbiing i muduung na foron foim kia.
12Seh i tifat na aunbiing i tafe foron fatoftof, i kalok. Wara le seh i tifat, in kep bangbang na liu fitliu ae God ka use ta u le in ta u sing fanseh ae ri ier isi God.
13Aunbiing ti tier i falamlam tikas isi in luut na sinang laulau, gong i tara le God i falamlam u. Wara le sinang laulau biil i fasih in falamlam God, ke God tom biil i fasih in falamlam tikas isi ik luut na sinang laulau.
14Wolwol laulau ken temtem tikii na kaltu tom, i dat u ke ka falamlam u isi tel sinang laulau.
15Aunbiing wolwol laulau i laumet, ka fang sinang laulau. Namih sinang laulau in laumet, ke ik fang minet.
16Foron rokap na tuaklik, gong gam somangat pes tikas isi in fabal gam.
17Foron rokap na fafen tikii ae i kalkaluu kanaka, i puh la tom tinbae na kukulii. Ri la tinbae sing God ae i fakiis ta pisiih, ke funiil, ke foron keltot. Isau le God biil i sokiliis la, arae pisiih ae i popos la na siat ma na wor biil.
18Na wolwol kia tom, ke kerer ka pang fuuh sabin ini orek tekentu kia. I fule pes ta kerer tina foron fakfakiis tikii kia, arae inen famu tina mok ae ri ta u la usuf God.
19Foron rokap na tuaklik, gamen usum na tier igii: I rokap le gam tikii gamen wong sape, isau le gong gam orek sape, ke gong gam ngaliaf sape.
20Wara le ngaliaf ken nenge kaltu, biil i fasih in fatapiek tortores na sinang ae God i ier isi.
21Pesu gamen susuaf na tel foron sinang ae i duh, ke foron sinang laulau tikii ae i fuun na piklinbat. Ke gamen fasabiro pes gam tom ma gamek somangat pes orek ke God ae ri ka so ta u na balmi, ae ifasih in faliu gam.
22Gamen misuut na orek ke God, gong gam ongen foes u sau, tarama gam ka fabal fafis gam tom.
23Seh i ongen foes orek ke God, i arae kaltu sau ae i tutues ma ka par posong na mata.
24Aunbiing i la tinaiwa, i ruruu sape sau na posong na mata arafah i par arae.
25Isau male tikas i ongen fakasi foron tortores na orek na nagogon ke God ae i fasengsegeng fanu la, ma i misuut la lo, ma biil i ruruu lo, God in fakalok u na foim kia.
26Male tikas i wol le i nenge tom lotu tekentu, isau le biil i fofonoi rokap na ngusu, lotu kia i tier foes sau, ma i fabal fafis u tom.
27Lotu tekentu ae i kalkaluu ma biil ti tier i laulau lo na mata God Tama kerer, i aragii: Keren lupes foron natun sih, ke foron makos na foron tatawin kiri, ke keren fofonoi sabin lo kerer tom koseng foron sinang tinaga na piklinbat ae i duh.
