Isirayila Mangɛe I 15:9-25 in Susu

⁹ Isirayila mangɛ Yerobowami xa mangɛya ɲɛ mɔxɔɲɛn nde ra, Asa naxa ti mangɛ ra Yudaya.

¹⁰ A ɲɛ tongo naani nun keren nan naba mangɛya kui Darisalamu. A nga nu xili nɛ Maaka, Abisaalon xa di.

¹¹ Asa naxa Ala waxɔnfe raba alɔ a benba Dawuda a raba ki naxɛ.

¹² A naxa kuye fe kana, a babae naxee fɔlɔ, a langoee keri na sɛrɛxɛbadee xun ma.

¹³ A naxa mangɛ ginɛ binyɛ ba a nga Maaka ma, barima a nu Asera kuye batuma. A naxa na kuye rabira, a a gan, a a xube woli Sediron xure kui.

¹⁴ Hali Asa bɔɲɛ birin to nu na Alatala nan bɛ a xa simaya birin kui, a mu gɛ kuye sɛrɛxɛbadee birin kanade yire itexie Yudaya bɔxi ma.

¹⁵ Asa naxa xɛɛma, gbeti, nun se fanyie raso Alatala xa banxi kui, a tan nun a baba naxee ba Alatala bɛ.

¹⁶ Asa nun Isirayila mangɛ Baasa nu e boore gerema e xa simaya birin kui.

¹⁷ Isirayila mangɛ Baasa naxa te Yudaya gere xili ma. A naxa Rama taa ti, alako a xa kira ibolon Yudaya mangɛ Asa ya ra.

¹⁸ Asa naxa gbeti nun xɛɛma tongo Alatala xa banxi nun mangɛ xa banxi kui, a a so xɛɛrae yi ra, a e xɛɛ Damasi taa, Arami mangɛ Ben Hadada yire yi masenyi ra:

¹⁹ «Won xa saatɛ xiri won tagi alɔ n baba nun i baba a raba ki naxɛ. Sanbase nan ya, xɛɛma nun gbeti. Saatɛ kana naxan na i nun Isirayila mangɛ Baasa tagi, alako a xa makuya n na.»

²⁰ Ben Hadada naxa tin mangɛ Asa xa masenyi ra. A naxa a xa sɔɔri xunyie xɛɛ Isirayila taae suxude. E naxa Iyono, Dana, Abeli Beti Maaka, Kinereti, nun Nafatali bɔxi suxu.

²¹ Baasa to na fe mɛ, a naxa Rama tife wali rati, a lu Tirisa taa kui.

²² Na wali to ti, mangɛ Asa naxa Yudayakae birin xili, e xa fa teku gɛmɛe nun wurie tongode Baasa nu naxee rawalima Rama. E naxa na birin xanin, e a rawali Geba nun Misipa tife ra.

²³ Asa xa taruxui dɔnxɔɛ, a xa geree xa fe, a xa taa tife xa fe, nun a xa fe birin sɛbɛxi Yudaya nun Isirayila mangɛe xa taruxui kui. Asa to fori, fure nde naxa a sanyie suxu.

²⁴ Asa naxa laaxira. E naxa a ragata gaburi kui a benba Dawuda xa taa a benbae fɛ ma. A xa di Yehosafati naxa ti mangɛ ra a ɲɔxɔɛ ra.

²⁵ Yerobowami xa di Nadabo naxa ti Isirayila mangɛ ra Yudaya mangɛ Asa xa mangɛya ɲɛ firin nde ra. Nadabo naxa mangɛya xanin ɲɛ firin Isirayila bɔxi ma.

⁹ عِسِرَيِلَ مَنفّ يٍرٌبٌوَ مِ شَ مَنفّيَ حّ مْشْحّن ندٍ رَ، عَسَ نَشَ تِ مَنفّ رَ يُدَيَ.

¹⁰ عَ حّ تٌنفٌ نَانِ نُن كٍرٍن نَن نَبَ مَنفّيَ كُي دَرِ سَلَمُ. عَ نفَ نُ شِلِ نّ مَاكَ، عَبِسَالٌن شَ دِ.

¹¹ عَسَ نَشَ عَلَ وَشْنقٍ رَبَ عَلْ عَ بٍنبَ دَوُدَ عَ رَبَ كِ نَشّ.

¹² عَ نَشَ كُيٍ قٍ كَنَ، عَ بَبَيٍ نَشٍيٍ قْلْ، عَ لَنفٌييٍ كٍرِ نَ سّرّشّبَدٍيٍ شُن مَ.

¹³ عَ نَشَ مَنفّ فِنّ بِنيّ بَ عَ نفَ مَاكَ مَ، بَرِ مَ عَ نُ عَسٍرَ كُيٍ بَتُمَ. عَ نَشَ نَ كُيٍ رَبِرَ، عَ عَ فَن، عَ عَ شُبٍ وٌلِ سٍدِرٌن شُرٍ كُي.

¹⁴ هَلِ عَسَ بْحّ بِرِن تٌ نُ نَ عَلَتَلَ نَن بّ عَ شَ سِمَيَ بِرِن كُي، عَ مُ فّ كُيٍ سّرّشّبَدٍيٍ بِرِن كَنَدٍ يِرٍ عِتٍشِيٍ يُدَيَ بْشِ مَ.

¹⁵ عَسَ نَشَ شّيمَ، فبٍتِ، نُن سٍ قَنيِيٍ رَ سٌ عَلَتَلَ شَ بَنشِ كُي، عَ تَن نُن عَ بَبَ نَشٍيٍ بَ عَلَتَلَ بّ.

¹⁶ عَسَ نُن عِسِرَيِلَ مَنفّ بَاسَ نُ عٍ بٌورٍ فٍرٍ مَ عٍ شَ سِمَيَ بِرِن كُي.

¹⁷ عِسِرَيِلَ مَنفّ بَاسَ نَشَ تٍ يُدَيَ فٍرٍ شِلِ مَ. عَ نَشَ رَ مَ تَا تِ، عَلَكٌ عَ شَ كِرَ عِبٌلٌن يُدَيَ مَنفّ عَسَ يَ رَ.

¹⁸ عَسَ نَشَ فبٍتِ نُن شّيمَ تٌنفٌ عَلَتَلَ شَ بَنشِ نُن مَنفّ شَ بَنشِ كُي، عَ عَ سٌ شّيرَيٍ يِ رَ، عَ عٍ شّي دَ مَسِ تَا، عَرَ مِ مَنفّ بٍن هَدَدَ يِرٍ يِ مَسٍنيِ رَ؛

¹⁹ «وٌن شَ سَاتّ شِرِ وٌن تَفِ عَلْ ﭑ بَبَ نُن عِ بَبَ عَ رَبَ كِ نَشّ. سَنبَسٍ نَن يَ، شّيمَ نُن فبٍتِ. سَاتّ كَنَ نَشَن نَ عِ نُن عِسِرَيِلَ مَنفّ بَاسَ تَفِ، عَلَكٌ عَ شَ مَكُيَ ﭑ نَ.»

²⁰ بٍن هَدَدَ نَشَ تِن مَنفّ عَسَ شَ مَسٍنيِ رَ. عَ نَشَ عَ شَ سْورِ شُنيِيٍ شّي عِسِرَيِلَ تَايٍ سُشُدٍ. عٍ نَشَ عِيٌنٌ، دَنَ، عَبٍلِ بٍتِ مَاكَ، كِنٍرٍتِ، نُن نَقَتَلِ بْشِ سُشُ.

²¹ بَاسَ تٌ نَ قٍ مّ، عَ نَشَ رَ مَ تِقٍ وَلِ رَتِ، عَ لُ تِرِ سَ تَا كُي.

²² نَ وَلِ تٌ تِ، مَنفّ عَسَ نَشَ يُدَيَكَيٍ بِرِن شِلِ، عٍ شَ قَ تٍكُ فّمّيٍ نُن وُرِيٍ تٌنفٌدٍ بَاسَ نُ نَشٍيٍ رَوَلِمَ رَ مَ. عٍ نَشَ نَ بِرِن شَنِن، عٍ عَ رَوَلِ فٍبَ نُن مِسِثَ تِقٍ رَ.

²³ عَسَ شَ تَرُشُي دْنشْي، عَ شَ فٍرٍيٍ شَ قٍ، عَ شَ تَا تِقٍ شَ قٍ، نُن عَ شَ قٍ بِرِن سّبّشِ يُدَيَ نُن عِسِرَيِلَ مَنفّيٍ شَ تَرُشُي كُي. عَسَ تٌ قٌرِ، قُرٍ ندٍ نَشَ عَ سَنيِيٍ سُشُ.

²⁴ عَسَ نَشَ لَاشِرَ. عٍ نَشَ عَ رَفَتَ فَبُرِ كُي عَ بٍنبَ دَوُدَ شَ تَا عَ بٍنبَيٍ قّ مَ. عَ شَ دِ يٍهٌسَقَتِ نَشَ تِ مَنفّ رَ عَ حْشْي رَ.

²⁵ يٍرٌبٌوَ مِ شَ دِ نَدَبٌ نَشَ تِ عِسِرَيِلَ مَنفّ رَ يُدَيَ مَنفّ عَسَ شَ مَنفّيَ حّ قِرِن ندٍ رَ. نَدَبٌ نَشَ مَنفّيَ شَنِن حّ قِرِن عِسِرَيِلَ بْشِ مَ.