Isaiah 1:6-31

⁶Nisiwik kore te, se tarigi nisipiling mone te, mu yam yukuwa sora saparam, lot gawir se lot gue tiwinan ago maga saparam, gue tiwinan anuwa nunga ale kaola nunga mu mena.

⁷Nenenga sor mu lilim la magaram kueneram, ninga wonong suen la mu tama no saparam; nina loagawasan se nemotam te sor bo ko kariimet ninga melmasak gi karogo namasan, sor iwareng ko kariimet taiman ale ninga sor ali ninguru maguwuman silataman.

⁸Zion ko Nanawus mu waen ningam ko sasal iwita, milen ningam ko sasalang iwita, kager kari memek wonong ira baguman karogo bagasan iwita beteman se bagoso.

⁹Nunguningta, Yawe Sokel Garagar anananga kariimet sang me nunga saongam se bagasan le mu, ana Sodom agi Gomorrah wonong mena a namaman iwita le.

¹⁰Nina kari supuling alo, Yawe ko den ewere ikialko, nina kariimet alo, anananga Kaem ko kiti guruga den ewere ikialko: nina ninga munan Sodom Gomorrah ko kariimet nunga munan iwita!

¹¹Yawe maso, “Agi ani pa nenenga tama gira agowom bita aisa mu ko munan ko kua lagasam e? Ani sipsip anumang se mel saki welang ago te tama betera mu ago terong maem; ani bull, se sipsip, se goat mel nunga gue ko me amilmilasam.

¹²Awiri nenenga kagin munan ko baluwoso wore gisan ale karogo ani angama te taisan? Nina aninga kawam laili ngual kasik ko betesan!

¹³Udagi ofa kumik ningo bo mena me ago tairalko! Ninga tama bur siring ani ikiekko me kuesam! Nina memek ago, se ani ninga sige iru ko kagin, se ninga Sabbath tom se biguwura duap duap am me ko kuesam nunguningkiri.

¹⁴Ani nenenga sige iru ko kagin ta, se tom bibiya ko biguwura am ta dulursam nunguningkiri.

¹⁵Ale kam nina guranek beteralko nigiting kanuwal, mu ani angama motam kaluwurekko. Guranek ta bita lagaralko, bare ani me ta ikiekko: nenenga nigiting mu memek gue ago.

¹⁶Ninimi anu kam ninimi nungal burangaral ale ninga kiwem memek nibiring tualko! Munan memek memek ani angama te me beteralko!

¹⁷Kasa ningo ningo wore la beteralko! Munan ningo diram mu la ninga ningi anirukko mu ko sail tagi se lagaralko: awiriya kituwura guat mu nuguting duap ningi nunga iluwalko; kuriang nuam nuet mena mu nunga saongalko; imet kuari kuera mu buring ko sanamaralko.”

¹⁸Yawe iwita balso, “Tairal se ninga munan memek umu balu nungurnakko,” maso. “Nunguningta, nenenga memek mu guarkiriyam, bare mu aking taiti nuwi iwita sirarma kaparukko; ale gueyam, bare mu wool iwita sirarma saparukko.

¹⁹Nina nengemang nengemang den iki karo tuiwaral mu, ninga ali imi ko inang welang ningo mu nalko.

²⁰Bare uwuta ko me ikial, ale am nisipiling lagawuruk mu, asele baenat kore te memek talko.” Imi Yawe ko kuring.

²¹Arigalko, diram la baga se iki karo tua ko wonong yawara mu aitak lage luan imet iwita aratam! Ekela uleng ko mu, nu munan ningo diram se, diram la karo tua ko munan noko ningi anikaso, bare aitak mu kariimet mora se kuera ko wonong ko aratam!

²²O Jerusalem, nika silver yawara mu aitak kapa darong batuwutuk am wore iwita, se nika waen yawara mu yu ago guruguman se magaram iwita.

²³Nika kari supuling alo mu den kuluka ko kari alo; nuna tere kari nongorak nunumi gia ko kari alo. Nuna nunga munan memek ko koma to nana ko kari alo la, se munan memek koma mel ningo gimonko nodogotak taung taung geragasan. Nuna kuriang nungumik nunam nonet mena mu nunga ikup ningi me nunga sangorsan; nuna imet gerewa nunga ikup ikimonko node bagusan.

²⁴Bore te se, Kari Biya, Yawe Sokel Garagar, Israel ko Kakirip Sokel Garagar, iwita balso: “Ah ... me namamonkowo! Aga kariimet agarak dun kopa ilu lagaman mu memek koma nungarik se, udagi memek bo agate me betemonko.

²⁵Ikialko. Ani nanamara ningarik ale yugur gawa te biliken kaetam iri kam ninga irirek se, karur memek ningimik te mu kapa saparukko.

²⁶Ani nika den tuetera kari alo iru nunga ilu nungek se, girakala ko mu bagaman iwita bagamonko; ka kiti guruga kari alo mu iru tala nunga atumukirek se motam motam la ko bagaman mu iwita bagamonko. Asesele ninga balmon Munan Ningo Diram Karo Tua ko Wonong, se Diram la Karo Tua ko Wonong mamonko.”

²⁷Zion mu munan diram ko munan te gopa palagukko, se ko kariimet nongomang motam guruguman mu munan ningo diram mu te bagara ningo arigimonko.

²⁸Bare den kuluka ale memek betera ko kariimet alo mu memek biya tamonko, Yawe kuring mel yam ko betera alo mu maga namamonko.

²⁹Nunguningta, nina ninguru dola maguwuralkowo, mu awuk, nina tam bibiya perr nungaru se amilmil te tam nung tuagu mu kagin kuwim laili ko bita lagaman.

³⁰Ikialko. Nina mu tam biya bo, marakam ale gawa kapa saparam wore iwita bagasan, agi ningam yu bugulik me kau tam se maraka garagaramam iwita bagasan.

³¹Se ninga kari supuling bibiya mu tam maraka kam marakamonko, ale nunga munan memek memek umu ago biguwura la, tama buluk palagoso ale tairate mel kai saposo iwita, nunga kai maliluwurokko; awiriya bo ta tama umu iruwurokko me terong kowo.