ISAIA 1:4-22

⁴Kara dika besena e! Emui kerere ese umui ia hametaua noho. Umui be dika taudia momokani, bona kara koikoi dekenai umui manada vadaeni. Umui ese Lohiabada umui rakatania vadaeni. Umui ese Israela ena Dirava Helagana umui negea vadaeni, bona ia dekena amo umui raka siri vadaeni.

⁵Badina dahaka Dirava dekenai umui dagedage noho? Umui ura be panisi umui davaria lou, davaria lou, a? Israela tano e, oiemu kwarana, be idia haberoa vadaeni, bona oiemu kudouna danu be ia manoka noho.

⁶Oiemu aena ela bona oiemu kwarana dekenai, gabu namona ta ia noho lasi, to bero bona toto, bona gudu momo idia noho. Bona bero ena rara be idia huria lasi, idia kumia lasi, bona muramura idia atoa lasi.

⁷Israela taudia e, emui tano be ia dika, aniani ia havaraia diba lasi. Emui hanua be lahi ese ia gabua ore. Idau taudia ese emui tano ena anina idia abia, bona gau ibounai idia hadikaia noho. Edia kara umui itaia noho, to umui goada lasi dainai, edia kara umui hadokoa diba lasi.

⁸Ierusalema be sibona ia noho, vain uma naria tauna ena au raurau ruma bamona, kiukamba umana ena ruma maragina bamona. Ia be tuari taudia ese idia koua hagegea hanua bamona.

⁹Bema Siahu Ibounai Lohiabada ese iseda Iuda taudia, idia do noho taudia, ia hamauria lasi neganai, ita be Sodoma bona Gomora taudia hegeregere do ita lao.

¹⁰Ierusalema e, oiemu lohia taudia bona gunalaia taudia, be Sodoma bona Gomora edia lohia taudia bamona. Ierusalema taudia e, Lohiabada ena hadibaia hereva do umui kamonai.

¹¹Lohiabada ia gwau, “Umui laloa lau be emui boubou gaudia lau ura henia, a? Lasi, emui mamoe umui gabua, bona emui boromakau edia digara, umui gabua gaudia lau abia, be ia davana vadaeni lau dekenai. Lau be boromakau, bona mamoe, bona nanigosi edia rarana dekenai lau hesiku vadaeni.

¹²Lauegu vairana dekenai umui haboua mai neganai, daika ese umui ia hamaoroa, egu Dubu Helaga do umui moia kava, moia kava?

¹³Harihari gaudia, anina lasi gaudia haida ma, do umui mailaia lasi, badina be emui muramura mai bonana, be gau dikana lau dekenai. Emui Hua Matamata Aria, emui Sabati, bona emui guriguri hebou, be emui kara dika ese ia hamiroa vadaeni.

¹⁴Emui Hua Matamata Aria, bona dina helagadia, be lau ura lasi momokani. Idia be gau metauna lau dekenai, huaia dekenai lau hesiku momokani.

¹⁵Emui imana guriguri totona umui abia isi neganai, lau ese egu vairana umui dekena amo do lau hunia. Sedira guriguri momo do umui gwauraia, to lau be do lau kamonai lasi, badina emui imadia be rara dekenai idia honu vadaeni.

¹⁶Umui sibona do umui huria, do umui goeva totona. Inai umui karaia noho kara dika be do umui hadokoa. Io, inai emui kerere do umui hadokoa,

¹⁷bona kara namo karaia dalana do umui tahua. Kota maoromaorona do umui tahua, bona mai dagedage danu taunimanima idia hisihisi henidia taudia, edia kara do umui koua. Mai edia tamana lasi natuna maragidia do umui durua, bona vabu danu do umui gimaia, haida ese do idia hadikaia lasi.”

¹⁸Lohiabada ma ia hereva, ia gwau, “Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona. Momokani emui miro be kakakaka herea, to lau huria neganai ia be kurokuro, mamoe ena huina hegeregerena.

¹⁹Bema lau dekenai umui kamonai henia neganai, tano ena anina namona do umui ania.

²⁰To bema lau dekenai umui dagedage, bona lau dekenai umui kamonai henia lasi neganai, umui be tuari kaia dekena amo do umui mase. Lau inai Lohiabada, lau hereva vadaeni.”

²¹Unai hanua, guna ia be kara momokani hanuana, to hari ia be ariara hahine hegeregerena ia lao vadaeni. Guna be kara maoromaoro taudia momo, Ierusalema dekenai idia noho, to hari be ala-ala taudia sibona, Ierusalema lalonai idia noho.

²²Ierusalema e, guna oi be siliva bamona, to hari oi be anina lasi. Guna oi be uaina namona bamona, to hari oi be ranu sibona bamona.