Isaia 11:1-13

¹Yɛse miↄna a vlãpa a zĩ́nau, a gↄ̃na a bↄ, i nɛ'i.

²Dii Nisĩna aↄ kuwà, a aà gba ↄ̃nↄ ń wɛzɛ̃o, a aà gba gbãa ń lɛdaama zɛ́o, a aà gba dↄ̃a, i to aàↄ Dii vĩa vĩ.

³Vĩakɛa Diiɛ a aà kã́si. A yã́gↄ̃gↄ̃ gbɛ̃́ↄnɛ lá wɛ́ lɛ́ ewao, a yãkɛkɛnɛ́ lá àlɛ mawao.

⁴A yã́kpalɛkɛ taasideↄnɛ a zɛ́wa, a dṹnia wɛ̃nadeↄ yãnakpámá. Aà yã́ a dṹnia gbɛ̃́ↄ gbɛ̃ lán gowa, a vãikɛnaↄ dɛdɛ ń a lɛ́'ĩanao.

⁵A yã́zɛde kuluka báa ũ, a náai dↄ a pi asana ũ.

⁶Àwalɛwana aↄ ku sãnu ń sãnɛo, gbɛaana a wúlɛ kↄ̃ saɛ ń bleo. Gáaena ń nↄ̀ↄmusuo aa pↄble sãnu, nɛ́fɛ̃nɛna mɛ́ a dↄaanɛ́.

⁷Zuda ń wàio aaↄ dɛ kↄ̃gbɛ̃ↄ ũ, an nɛ́ↄ wúlɛ gudoũ. Nↄ̀ↄkusi a sɛ̃ ble lán zuwa.

⁸Nɛ́ yↄ̃mina a kↄ̃̀ↄ'o kyã́ ɛlɛ, nɛ́ kɛ̃a a ↄgɛ̃ píligonazi.

⁹Pↄ́ pↄ́ ì ń kɛ'ĩa ge pↄ́ pↄ́ ì ń dɛ aↄ ku Dii gbɛ̀sĩsĩ pↄ́ a kua adoawao, asa Dii dↄ̃a a li dṹniaaɛ, lá í ì dagua ísiaiwa.

¹⁰Zĩbeezĩ Yɛse zĩ́na aↄ dɛ gudↄkↄ̃ɛkĩi ũ buiↄnɛ. Wa aà kĩ́i wɛɛlɛ mɛ́ aà kúkĩi aↄ gawi vĩ.

¹¹Zĩbeezĩ Dii a ɛa ↄbↄ a gɛ̃n plaade, i a gbɛ̃́ kↄ̃na pↄ́ gↄ̃̀ↄ bo. Aa bↄ Asili ń Egipio ń Etiopio ń Elaũo ń Babilonio ń Amatao ń ísia gũgũnaↄ.

¹²A gudↄkↄ̃ɛkĩi dilɛ buiↄnɛ, i Isaili zĩ̀zↄↄ kãaa. A Yuda pↄ́ fãaaapiↄ sɛ́lɛ za dṹnia gola síiↄ̃ↄwa.

¹³Ɛflaiũ buiↄ zaańgu a midɛ, aaↄ za Yudaↄgu lↄo. Yudaↄ íbɛlɛ a láa, aa íbɛlɛsɛ ń Ɛflaiũ buiↄ lↄo.