Iragátane Jesos 10:1-34

¹Canta Sesáreaquë ainta sërari jitacha Coronerio. Iriro capitán itingomi soraro icarati 100 Itariasati.

²Iquemisantasantiri Tosorintsi aisati iniacobeingacari. Aisati imatsiguenga quemisantatsi. Tojai imitocoiguëri matsiguenga icábintsaiguëri. Përosati cara yamanopianti.

³Aroque ochapinitanë cara iconijatomopëri ironomire Tosorintsi irisaanganetsite icampëri: —Coronerio.

⁴Inetsëntobëri Coronerio itsorogasantanëri yosamitobëri: —¿Pairo ojita, Natingomi? Icampëri: —Iquemaquemi Tosorintsi cara pamanopiantëri. Aisati iniaquemi cara pomitocoiguiri matsiguenga.

⁵Yamai pigátiri matsiguenga cara Jopequë ingaimëntiri Simón, aisati ijita Peroro.

⁶Itimi ibangoquë isometi Simón ira masitsiberi. Aiti ibango onamijaquë angaare. Iriro cantëmine ora pinganque.

⁷Cara isaanganai ironomire Tosorintsi ira comantapëri Coronerio, icaimë pite iromeraro aisati paniro isorarote, maba quemisantiri Tosorintsi.

⁸Icomantaguequeri antagaisati ora iniaque, igáqueri Jopequë.

⁹Itimanë abatsiquë. Oquëtaguetamananaque iquenaque irooti catinga. Pënibaque irarequima Jopequë. Itanë Peroro jonoquë pongotsiquë yamanaque.

¹⁰Itasegasantë icoque irape Peroro. Iroontita osobira pobetsiquëro perintsi tsinane, iniobëro Peroro ora cantaca quisanitagantsi igaguitaga iriro.

¹¹Jonoquë yamanasegui Peroro iniabetobacaro paguëpë oquibemaronca tocoya yoguëshotaguequero Tosorintsi yoguëtopiantëro.

¹²Ainta yoguëtocoqueri pairiraca quimingaripague: chancho, marangue, saniri, paguitsa, tiso, antagaisati ijiqueri quimingari joríojegui.

¹³Aisati Peroro iquemobëro Irinibare Tosorintsi. Ocampëri: —Pingabiritima, Peroro. Póguiri pijagueri.

¹⁴Carari yotabitanëri Peroro: —Quero naaguiri, Natingomi, irianti quimingari.

¹⁵Aisati icanqueri: —Ira noguëtetai Naro, quero pijitiri quimingari obiro.

¹⁶Aro pipiganaja tocoya jonoquë, paguëtopiantë, mabataque iniobëro Peroro paguëque aro pogainocanaca.

¹⁷Iroontita iquianquero Peroro ora iniaque aisati ora iquemobë, yaretaigaca maba sërari iragátane Coronerio. Yosamitëcobempëri nega itimi Simón. Yaretaigapa omoroquë ibango.

¹⁸Icaimapëri yosamitapëri: —¿Aro itimi Simón yaca aisati ijita Peroro?

¹⁹Përosati cara iquianca Peroro, aro ocomantëri Isëre Tosorintsi: —Pinetse ainta maba sërari icoguimini.

²⁰Pingabiritima piguëtanë piguiatanëri aroquenta nigáquemiri Naro. Quero pitsoinguiri.

²¹Yaguëtanë Peroro icabëri sërari: —Naro picogaigui. ¿Pairo pipocasiti?

²²Yotabitaiganaqueri: —Nopaniaca Sesáreaquë. Igátaiguëna Coronerio, igapitante isorarote icarati 100. Iriro caninari. Iniacobeingacari Tosorintsi. Aisati iniacaninatëri iriro joríojegui. Cani iconijatomoqueri ironomire Tosorintsi icanqueri: “Yamai pigátiri matsiguenga iromapëri yaca pobangoquë ira Simón aisati ijita Peroro. Pinguemisantiri cara ingomantëmiro Irinibare Tosorintsi”.

²³Icabëri Peroro: —Pingapë. Yamai pintimopë yaca. Naramani naguiatëmi. Oquëtaguetanë iáiguë Peroro, iromeraro Coronerio, aisati itsibataigacari quemisantatsiri.

²⁴Otsitinitanë, oquëtaguetanai yaretaigaca Sesáreaquë. Ainta Coronerio aroque yapatotaiguëri ibangoquë tojai imatsiguenga aisati itimanamitane.

²⁵Icapë Peroro, yobetsatobacari Coronerio yobaticagueritotasitobacari.

²⁶Icabiriqueri Peroro icanqueri: —Pingabiritima. Cagarina naro Tosorintsi. Naanti matsiguenga aisa nacanta pibega obiro.

²⁷Inibatobaca pitirooti, icapë Peroro iniopëri tojai matsiguenga botoitachari.

²⁸Icantaigapëri: —Naro jorío. Pigóigui obirojegui te iranintacaguina nomatsiguenga nantsibatimari basiniati matsiguenga. Teni iraninte naniaiguemi. Carari yogomequinaro Tosorintsi cara quero najitajiri pairiraca quimingari.

²⁹Iroro nipoguëpë omanapague cara picaimagantëna. Yamai nosamitapëmi, ¿Pairo picaimagantobiquina?

³⁰Yotabitanëri Coronerio: —Cani otsibasati cataguiteri aroque ochapinitanë canoca namanaque yaca nobangoquë, aro naniobëri matsiguenga iquitsagataro catarisonori iguitsagare.

³¹Icampëna: “Coronerio, iquemaquemi Tosorintsi cara pamaniri. Aisati iniaquemi cara pomitocoiguiri matsiguenga.

³²Yamai canta Jopequë pingaimagantiri Simón aisati ijita Peroro. Itiomoqueri basini Simón ira masitsiberi timatsi onamijaquë angaare”.

³³Aito cara nigáqueri nomeraro ingaimëntimi. Yamai caninataque cara pipogopë. Ainta napatoitomocari Tosorintsi. Nocogaiguini yamai pingomantaigapënaro pairoraca igáquemi Atingomi.

³⁴Aique iparintaca inibatë Peroro icanque: —Yamai nigótasantë aisonori Tosorintsi te ingasiriconiatitiri matsiguenga antagaisatinta aisati icantaiga nibegaiga naro.