Ioanes 9:3-37

³E Isu i koli, i ta maea, “A naro hale vona i uka ma i rata ia ge kepa. A naro hale ne tamana e kinana ranga, i uka ma i ratea ge kepa. I kepa a vuhuna a Vure i ngaru a leho vona ge bele kavakava.

⁴Ngane si gi rata a leho na viri i rudu iau a valai, a vuhuna i tabana ni palala a hini. Pali i uka ma ge tabaka, bara i rodo a hini, lakea i uka tara viri ge leho.

⁵Na tahuna a tabana ni made na malala, iau a nipara ne huriki a bakovi a ngatavine.”

⁶E Isu i taki lobo a ngava nga, i kalupea a malala, i ratea i beta manga kota. Muri i bolea a malala, i ravua na matana bakovi.

⁷Lakea i takia, “O vano o vahilolo a matamu na lomu e Silom.” Lakea a bakovi iea i vano i vahilolo a matana, lakea i matapara. Muri i hamule lakea na tanga vona.

⁸E huriki a bakovi a ngatavine na tanga vona, e huriki ri lohoka vona ri vanana, ri ta maea, “Ra bakovi iea, ia kunana a viri i made lake, i nonongi a maki ne huriki?”

⁹I ranga e huriki ri taki ta ia kunana, pali i ranga e huriki ri lavuni ri ta maea, “I uka, a bakovi i mata manga ia.” Pali ra bakovi iea i ta tora hateka, i ta maea, “Iau kunana!”

¹⁰Lakea e huriki ri nanea, “Ni vakamatapara navai a matamu?”

¹¹A bakovi i koli, i ta maea, “A bakovi, a rane Isu, i kalupe tahoa a malala i ratea i beta, i ravua na matagu. Muri i rudu iau a vano a hilolo na lomu e Silom. A hilolo lobo, i malaharere a matagu, a matapara.”

¹²Lakea ri nanea, “Pali avia ngane ra bakovi iea?” A bakovi i koli, i ta maea, “Ai, i uka ma lohoka vona.”

¹³Muri e huriki ri tuli lakea ne huriki a Pariseo a bakovi i kepa muga.

¹⁴A Parava Nimalo, ra parava e Isu i kalupe tahoa a malala, i vakamataparea a kepa.

¹⁵Lakea e huriki a Pariseo ri nanea vona a matana i malaharere navai. Lakea i taki ria, i ta maea, “I ru a kokota na matagu, muri a hilolo, a matapara.”

¹⁶Lakea e huriki a Pariseo ranga ri ta maea, “Ra bakovi i vakamataparea a bakovi iea, i uka ma i valai na Vure, a vuhuna i leho na Parava Nimalo.” Pali i ranga e huriki ri nana maea, “A bakovi hale ge rata navai a nivakasiri?” Lakea ri vahehe lae na ngava.

¹⁷Muri ri nana tabua ra bakovi i kepa muga, ri ta maea, “Ioe kunana ra viri i vaka­matapara ioe. O luhoi navia ra bakovi iea?” Lakea a bakovi i koli, i ta maea, “Ia a propet.”

¹⁸E huriki a Iuda i uka ma ri luhoi tora a nita na bakovi iea, ra i takia ta i kepa muga, muri e Isu i vakamataparea. Lakea ri rudu mai a ngava ne kinana e tamana, ru gu valai taro ne ria.

¹⁹Na tahuna ru bele, e huriki a Pariseo ri nana rua, “Ra bakovi iea e tune marua? Ra bakovi iea kunana muru takia ta ni poda tala i kepa liu? Pali i navai ngane i matapara?”

²⁰Ru koli, ru ta maea, “Miri lohoka vona ia e tune maria, ni poda i kepa liu.

²¹Pali a hini i matapara ngane, e rei i vaka­matapara ia, i uka ma miri lohoka vona. Mu nanea, ge koli a ninana ne mua. I uka ma ia a koma kiroko. Bara i koli a ninana ne mua.”

²²E tamana e kinana ru ta mavonga a vuhuna ru mangenge ne huriki a Iuda. Ru mangenge a vuhuna ri kado puru a ngavana viri ge taki e Isu ge ia e Kristo, bara ri tono talea liu na roho na vaponga.

²³Ru mangenge mavonga e tamana e kinana, lakea ru ta maea, “I uka ma ia a koma kiroko. Mu nanea.”

²⁴Ri gale vilia tabua a bakovi i kepa muga, ri takia, “O kavurikea a Vure. Mi lohoka vona a bakovi iea a bakovi hale.”

²⁵A bakovi i kepa muga i koli, i ta maea, “Iau i uka ma lohoka vona, ia a bakovi kamumu o ia a bakovi hale. A maki i taku a lohoka vona. Muga iau a kepa, pali ngane a matapara!”

²⁶Muri ri nanea, “A ra i ratea vomu? I vaka­matapara navai ioe?”

²⁷A bakovi i koli, i ta maea, “A taki mua pali, i uka ma mu longo mai a hini a taki. I navai mu ngaru ni longo tabu a ngava a taki muga pali? Mua ranga mu ngaru ge mua a murimuri vona?”

²⁸Lakea ri harogi pilea, ri ta maea, “Ioe a murimuri vona! Mia a murimuri ne Moses!

²⁹Mi lohoka vona a Vure i ta turane Moses, pali ra bakovi iea i uka ma mi lohoka vona i valai vai.”

³⁰A bakovi i koli, i ta maea, “I nangi tebi liu a nitane mua! I uka ma mu lohoka vona a hini i valai vona a bakovi iea, pali ia kunana i vakamatapara iau.

³¹Si lohoka vona a Vure i uka ma i longo mai e huriki a bakovi hale. I longo mai kunana e huriki ri kavurike ia, ri ramai a ningaru vona.

³²I uka ma ni matai hosi tara viri ge vakamatapara a bakovi i kepa na tahuna ni poda tala.

³³Pali ra bakovi iea, a Vure i uka ma i rudua ge valai, i uka ma ge ratea tara maki mavonga.”

³⁴Lakea ri koli mule ri ta maea, “I navai o vara kolikoli mia? A naro hale i madoko vomu na tahuna ni poda tala.” Muri ri tono talea ge vano liu.

³⁵E Isu I longoa a bakovi iea ni tono tala liu, lakea i vano i masia, i takia, “Ioe o luhoi tora a Tuna Bakovi?”

³⁶A bakovi iea i koli, i ta maea, “Bakovi Dagi, e rei a bakovi iea? O vakasiri iau vona ga luhoi tora ia.”

³⁷Lakea e Isu i ta maea, “Ra bakovi iea o masia pali, ngane i ta turamu.”