Ioanes 9:3-34

³Iesus kotin sapeng: Kaidik i me wiadar dip, pil kaidik in a de sam a, a pwe en Kot a wiawia kan en kasansal kida i.

⁴I en kapwaiada wiawia kan en me kadar ia do arain ansaun ran, pwe pong pan kodo, i ansau solar amen kak dodok.

⁵Arain ai mi sappa, ngai marain en sappa.

⁶A lao kotin masanier met, ap likidi nani pwel, wiakida pwel madak iriski mas a.

⁷Masani ong i: Kolang pil en Siloa (iet wewe: Pakadarado), opinok ia! I ari kola opinok, ap puredo kilangada wasa.

⁸A men imp a kan, o me iang kilangadar, me a men poekipoek amen mas o, rap indada: Kaidik i, me wonon poekipoeki?

⁹Akai me inda: I met; a akai me inda: Likamata i, a pein i indada: Ngai i.

¹⁰Irail ari indang i: Iaduen por en mas om akan a kapad pasang?

¹¹A sapeng indada: Aramas amen me adaneki Iesus, me wiadar pwel madak, iriski mas ai, masani ong ia: Kolang pil en Siloa, opinok ia! I ari kola opinok, ap kilangada wasa.

¹²Irail ap idok re a: Ia i? A sapeng: I sasa.

¹³Irail ap kalualang ren Parisär akan me maskun mas.

¹⁴Ari, ni ran en sapat, me Iesus kotin wiadar pwel, kapad pasang por en mas a kan.

¹⁵Parisär akan pil idok duen me a kilang kida wasa. A sapeng irail: A ki ong pwel ni por en mas ai, i ap opinok, ngai ari kilangada wasa.

¹⁶Parisär kai ap inda: Aramas men et kaidik men ren Kot, aki a sota apwali ran en sapat. Akai indada: Daduen, aramas dipan amen kak wia kilel pukat? Irail ari liak toror pasang.

¹⁷Irail pil kalelapok ren me maskun o: Da me koe lamelame duen i? Pwe a kapad pasang mas om? A sapeng: Saukop amen i.

¹⁸Men Sus oko ap sota kamelele, me a ipwiki wei maskun, ap kilangada wasa. Irail lao ekeredo sam o in en me kilangada wasa.

¹⁹Irail idok re ’ra: Nouma ol men et, me komail indinda, me a ipwiki wei maskun? Iaduen a ngarada wasa ansau wet?

²⁰Sam a in a sapeng ir indada: Se asa, me nait ol et, me ipwiki wei maskun.

²¹A se sasa duen a ngarada wasa o me kapad pasang por en mas a. A malar, kainoma re a, a pan pein sakaraki i.

²²Sam o in a inda mepukat, pweki ar masak Sus oko. Pwe Sus oko inauki pena, ma meamen pan kadede me i Kristus a pan lokidokila sang nan sinakoke.

²³I me sam o in a indada kida: A malar, kainoma re a.

²⁴Irail ap eker aramas maskun kariapak indai ong i: Wauneki Kot, se asa, me aramas men et me dipan amen,

²⁵A sapeng ir indada: I sasa, ma i me dipan amen de so. I eta me i asa, me ngai me maskun mas o, i ap potoan ngaradar wasa.

²⁶Irail ap pil idok re a: Da me a wiai ong uk? Iaduen a kapad pasang mas om?

²⁷A sapeng irail: I indai ong komail er, a komail sota rong? Da me komail pil men rongki? Komail pil pan a tounpadak ala?

²⁸Irail kaurureki indada: A tounpadak amen koe, a kit tounpadak en Moses akan.

²⁹Kit asa, me Kot masani ong Moses. A lap o se sasa, wasa a ko sang ia.

³⁰Aramas o sapeng indang irail: Meid kapuriamui! I me kapad pasang mas ai kat, a komail sasa, wasa a koti sang ia.

³¹Kitail asa, me Kot sota kin mangi me dipan akan. A meamen, me lan Kot, o dadaurata kupur a, iei me a kin kotin mangi.

³²Sang mas kokodo sota me rongadar, me meamen kapad pasang mas en me ipwiki wei maskun.

³³Ma men et sota me ren Kot, a sota pan kak wia meakot.

³⁴Irail sapeng indang i: Koe me ipwiki wei dip akan a koe ap padaki ong kit? Irail ari kasela i.