Ioanes 11:29-46

²⁹Na tahuna e Maria i longoa, i malaviriri kunana i pesi rike, i lakea mai e Isu.

³⁰E Isu i uka ma i bele ma na tanga. I tabana i made na hini i taguia e Marta vona.

³¹Na tahuna e huriki a Iuda ra ri lukea e Maria pololilo na ruma, ri masia i pesi rike hari hari, i pagitala, ri muri maia. Ri luhoi ta ge lakea na hini ni vakatabuli a podane kurabana, ge tangi vonga.

³²Na tahuna e Maria i bele vona a hini i made vona e Isu, i lolu puru tabukoi na vahana i takia, “Bakovi Dagi, ioe bara o made koea, e kurabagu i uka ma ge mate.”

³³Na tahuna e Isu i matai e Marta, e huriki a Iuda, ri valai turana ri tangi, i dodo ria, i rakudu a hatena a hini ri tangi hateka.

³⁴Lakea e Isu i nana ria, “I vai a hini mu vakatabuli a podana vona?” Ri koli ri ta maea, “Bakovi Dagi, o valai o masia.”

³⁵Lakea e Isu i tangi.

³⁶Na tahuna e huriki a Iuda ri masia i tangi, ri ta maea, “Masia, i ngaru hatekea ra bakovi iea!”

³⁷Pali i ranga e huriki ri ta maea, “I vaka­matapara a viri i kepa, pali i navai i uka ma i koria ra bakovi iea, nahea ge mate?”

³⁸E Isu i dodo ria, i rakudu a hatena na hini ri tangi hateka. I vano i bele na lovo. Ra lovo iea a babe, ni tukari na kedo a matana.

³⁹E Isu i taki ria, i ta maea, “Mu kule talea a kedo.” Pali e Marta, re kurabana i mate, i takia, i ta maea, “Bakovi Dagi, i mavuru pali, a vuhuna i tabuli na parava i va pali.”

⁴⁰Lakea e Isu i takia, “Iau a taki ioe pali. Ioe bara o luhoi tora, bara o masia a nitora na Vure.”

⁴¹Muri ri kule talea a kedo. Lakea e Isu i mata rike na hunu, i ta maea, “Tata, a kavurike ioe a vuhuna o longo iau pali.

⁴²A lohoka vomu na parava vakaroro o longo iau. Pali ngane a taki ioe na ngava nga, ge longo e huriki ri pesi tabukoi koea, ri gi luhoi ioe kunana o rudu iau a valai.”

⁴³E Isu i taki lobo a ngava nga, lakea i gale tala dagi, i ta maea, “O Lasarus, o pesirike, o pori valai!”

⁴⁴Lakea a bakovi mate i pesi rike i pori valai. A kakaina, a gina, i tabana ni kae na lavalava. Lakea e Isu i taki ria, i ta maea, “Mu vuka tala a lavalava ni bunu ia vona, ge vano.”

⁴⁵I kupo e huriki a Iuda ri valai ni lukea e Maria. Na tahuna ri masia a maki i ratea e Isu, ri luhoi tora ia ngane.

⁴⁶Pali i ranga e huriki ri lakea ne huriki a Pariseo ri vakalongo ria vona a maki i ratea.