Ioanej 7:13-40

¹³Jota me lokaia janjal duen i, pweki ar majak Juj oko.

¹⁴Lao lel ailepan kamadip o, Iejuj ap kotin kodalan im en kaudok o kaukaweweda.

¹⁵A Juj akan ap puriamui kila indada: Da duen men et aja wewe en kijin likau, pwe a jota ian padakki.

¹⁶Iejuj ap kotin japen irail majani: Kaidin ai padak, me I kin kida a en me kadar ia do.

¹⁷Meamen wiawia kupur a, pan weweki ai padak, ma a ren Kot, de jan ren pein nai.

¹⁸Me kin padapadak jan ni pein i, kin rapaki pein wau i, a me kin rapaki wau en me kadarala i, iei me melel o jota man jued kot pit.

¹⁹Kaidin Mojej, me ki on komail kapun o, a jota amen komail kin kapwaiada kapun o? A da me komail rapakiki kame ia la?

²⁰Aramaj oko japen indada: Koe me tanwar en tewil, ij me rapaki kame uk ala?

²¹Iejuj kotin japen majani on irail: Dok taieu, me I wiadar, a komail puriamui kila.

²²Mojej ki on komail er jirkomjaij, a kaidin tapi jan ren Mojej, pwe jan ren jam akan, a komail kin jirkomjaij aramaj ni ran en japat.

²³Ari ma aramaj amen ale jirkomjaij ni ran en japat, pwe kapun en Mojej ender japunala, a komail kin juede kin ia, pweki ai kakelailada aramaj pon ni ran en japat?

²⁴Der kadeikada duen pali liki, a komail kajaui nin tiak en kadeik pun.

²⁵Men Ierujalem kai ap inda: Kaidin i, me re raparapaki en kamela?

²⁶A kilan, a padapadak janjal, a re jota man lokaia on i, de muein jaumaj akan ajaer mau, me i Krijtuj?

²⁷Ari, je ajaer, waja men et ko jan ia, a Krijtuj lao kotido jota me pan aja waja, me a pwarado jan ia.

²⁸Iejuj ap kotin kapitie laudeda kawewe nan im en kaudok majani: Komail aja ia o waja I ko jan ia. Ari, kaidin pein nai, me I kokido, a me kadar ia dor, me melel, me komail jaja.

²⁹A I aja i, pwe I kodo jan re a, o i me kadar ia dor.

³⁰Irail ap jon jaikidi i, a jota me jair i, pwe a anjau kaikenta leler,

³¹Aramaj toto jan nan pokon o pojonla i indada: Iaduen, Krijtuj lao pwarado, a pan wia kilel toto jan mepukat, me men et wiadar?

³²Parijär akan ronadar, me aramaj akan lokelokaia mepukat duen i. Jamero lapalap o Parijär akan ap kadarala papa kan, en jaikidi i.

³³Iejuj ap kotin majani: I pan mi re omail anjau motomot. I ap pan kola ren me kadar ia do.

³⁴Komail pan rapakin ia, ap jota diar, a waja, me I pan mi ia, komail jota pan kak on.

³⁵Juj oko ap inda nan pun arail: A pan kola ia, pwe jen jolar diar i? A pan kola ren me jalonalar ren men Krik kan, kaukawewe on men Krik?

³⁶Iaduen majan en, me a indada: Komail pan rapakin ia, ap jota diar, a waja, me I pan mi ia, komail jota pan kak on?

³⁷Ni ran en kamadip a nikilar, ni ran lapalap o, Iejuj kotida, kapitie laudeda majani: Meamen men nim piladar, i en ko don ia nim.

³⁸Me pojon ia, duen kijin likau kan indada, jan nan war a pil memaur pan pwilipwili jan ia.

³⁹Mepukat a kotin majani duen Nen, me irail, me pojon i, en tunole; pwe Nen jaikenta pakadarado, aki Iejuj jaikenta linanlar.

⁴⁰Ari, akai jan nan pokon o ni ar ronadar majan pukat ap indada: Melel Jaukop o.