Ioanej 5:19-47

¹⁹Iejuj ap kotin japen majani on irail: Melel melel I indai on komail, a jota kak, Na en pein wia meakot, pwe i eta, me a kilan ren Jam, me a wiada. Pwe me a kin wiada, iei me Na pil kin wiada.

²⁰Pwe jam pok on Na o kajanjale on i karoj, me pein i kin wiada. O a pan kajale on i wiawia kan, me lapa jan met akan, pwe komail en puriamui kila.

²¹Pwe duen Jam kin kapikapirida me melar akan, kamaur ir ada, iduen Na pil kamaureda me a mauki.

²²Pwe jota me Jam kin kadeikada, pwe a kotiki on Na kadeik o.

²³Pwe karoj en wauneki Na, dueta ar wauneki Jam. Me jota wauneki Na, jota kin wauneki Jam, me kadar i dor.

²⁴Melel, melel I indai on komail, meamen ron ai padak o pojon, me kadar ia do, a aneki maur joutuk. A a jota pan panalan kadeik o, pwe a japale jan mela japal on maur.

²⁵Melel, melel I indai on komail, anjau kokodo, iei a leler, me melar akan pan ronada nil en Nain Kot, a me ronadar pan maureda.

²⁶Pwe duen Jam a udan maur, iduen a ki on Na, en pil udan maur.

²⁷O a kotiki on i manaman, en kaunda kadeik o, pweki Nain aramaj i.

²⁸Der puriamuiki met, pwe anjau kokodo me irail, me mi nan joujou kan, pan ron nil a.

²⁹Irail ap pan pwarada: Me wiadar me mau, en maureda, pwen memaur, a me wiadar mejued, en maureda, pwen panalan kadeik o.

³⁰Jota me I kak wiada jan pein nai, duen me I kin ron, iduen I kin kadeikada, o ai kadeik me pun, pwe I jota kin rapaki injen ai, pwe kupur en i, me kadar ia do.

³¹Ma I kadede pein nai, ai kadede jota melel.

³²Amen me kadede ia, a I aja melel, me a kadede ia me melel.

³³Komail me ilakilan Ioanej, i ari me kadede melel.

³⁴A I jota kin ale kadede ren aramaj, a iet me I indawei, pwe komail en dorola.

³⁵I me jer umpul o marain eu, a komail men perenki a marain anjau kij.

³⁶A ai kadede me lapa jan en Ioanej. Pwe dodok kan, me Jam o kotiki on ia, I en kapwaiada, iei dodok kan, me I kin wiawia, me kadede ia, me Jam kadar ia dor.

³⁷A Jam, me kadar ia dor, pein i kadede ia. Komail jota ronadar nil a, o jota kilan mom a.

³⁸O a majan jota kin kot re omail, pwe komail jota pojon, me a kadarador.

³⁹Komail kin kalelapok nan kijin likau kan, pwe komail lamelame, me maur joutuk mi lole. Ari, iei irail, me kin kadede ia.

⁴⁰A komail kan ko don ia, pwe komail en aneki maur.

⁴¹I jota kin mauki ale wau ren aramaj akan.

⁴²I aja komail, limpok en Kot jota kin mi re omail.

⁴³I kodo ni mar en Jam ai, a komail jota kin kajamo ia. A ma amen pan kokido pein ad a, komail pan kajamo i.

⁴⁴Pala komail kak pojon ni omail nononki wau ren aramaj, ap jota rapaki wau jan ren Kot.

⁴⁵Der kiki on, me I pan mpäkin komail ren Jam, amen me kin mpäkin komail: Mojej, me komail kin kaporoporeki.

⁴⁶Pwe ma komail pojonla Mojej, komail pan pojon ia, pwe i me intiniedier duen nai.

⁴⁷A ma komail jo kamelele a intin kan, pala komail pan kamelele ai padak kan?