Ioane 7:2-23

²Iudea adi mataasi esau go’u numadi mataasina i hanahanau.

³Arinai ede ena tataoyao se ribalau ia arinai si ene, “Dimo ta u laugabaei u lau Iudea, am paisoa wa u abidi em heaheata hinage abo se itadi.

⁴Taba tau i henua ia i hemasarahauioi ginauri nige i ginauri‐yamuyamui. Ena ginauri u ginauridi u hemasaraham, tanoubu abo se itam.”

⁵Ena tataoyao hinage ia nige se sunumaei.

⁶Iesu abo i ribalau isi aridi eai, i ene, “Egu huia sora nige i lagema: huia gamagamagari ta omi emi huia.

⁷Tanoubu nige i hewaiunuemiu; eau i hewaiunuegu, paana ede ea ribahemasaraha ta ena abi se baaea.

⁸Mataasi ne omi au lau arinai: eau sora taba nige ea sae mataasina arinai paana ede egu huia sora nige i lagema.”

⁹Ina riba ta i heribadi, ia Galilaia eai miana.

¹⁰Ena tataoyao se laolao’o, abotai abo ia hinage ie sae mataasi arinai; nige i laumasaraha, i lauyamuyamui.

¹¹Iudea tataodi aba mataasi eai ia abo se eooi, si ene, “Ia haedi?”

¹²Tatao ia se monunuei: headi si ene, “Ia tau lolo:” headi si ene, “Nige’e; tatao i boraboraidi.”

¹³Taiede nige tau esau riba ne i hemasaraha, paana Iudea tataodi se matausiedi.

¹⁴Mataasi duaduarina eai Iesu i awasae numa uura alona eai, abo i lauheata.

¹⁵Iudea tataodi se nooei si ene, “Ina tau ta sonoga edoha ena abiabina, ia nige se heata?”

¹⁶Iesu i ribalau isi aridi eai i ene, “Riba ta eau nige egu riba, tauhetamariguma ia ena riba ede ina.

¹⁷Ena tau esau Eaubada ena nuatu i abiwatai, riba wa abo i nuatulobai, Eaubada ena riba, e, eaubom enagu ea ribaei.

¹⁸Taba tau esau iabom enana i ribaei, i ribatausaeuioi: ia tauhetamariamana i ribatausaei ia mo i dudurai, taba nige baaea ia arinai.

¹⁹Mose laugagaeo i leawa, e nige’e? Omi arimiu eai nige esau laugagaeo i lauwatai. Aue saha bena au unuigu?”

²⁰Tatao wa abo se ribalau ia arinai si ene, “Diabolo esau i luim! Eai bena i unuim?”

²¹Iesu i ribalau isi aridi eai i ene, “Agu paisoa esega ea ginauri, eo omi gamagarimiu au nooei.

²²Mose peritome i leawa; (hinage nige Mose enana, tamamiuyao enadi;) omi hinage asubena Sabati eai tatao au heperitomedi.

²³Taba asubena Sabati eai tau esau au heperitome, ata Mose ena laugagaeo au utusi; aue saha au ouyalayalaegu, paana ede asubena Sabati eai tau esau tauna maudoina ea hemaurikomakomani?